ພິທີຕ້ອນຮັບທ່ານປະທານປະເທດ ເຈີ່ນດ້າຍກວາງ
(vovworld) - ໃນຂອບເຂດການຢ້ຽມຢາມ ກຳປູເຈຍ ຢ່າງເປັນທາງການ, ວັນທີ 15/06 ທ່ານປະທານປະເທດ ຫວຽດນາມ ເຈີ່ນດ້າຍກວາງ ມີບັນດາການເຈລະຈາກັບພະບາດສົມເດັດພະບໍລົມມະນຽດ Norodom Sihamoni ແຫ່ງລາຊະອານາຈັກ ກຳປູເຈຍ, ເຈລະຈາກັບທ່ານປະທານສະພາສູງ ກຳປູເຈຍ Samdech Say Chhum, ທ່ານປະທານສະພາແຫ່ງຊາດ ກຳປູເຈຍ Samdech Heng Samrin ແລະ ພົບປະທ່ານນາຍົກລັດຖະມົນຕີ ກຳປູເຈຍ Samdech Techo Hun Sen.
ເນື່ອງໃນໂອກາດນີ້, ສື່ມວນຊົນ ກຳປູເຈຍ ລ້ວນແຕ່ໃຫ້ຂ່າວ ແລະ ຮູບພາບກ່ຽວກັບການຢ້ຽມຢາມ ກຳປູເຈຍ ຢ່າງເປັນທາງການຂອງທ່ານປະທານປະເທດ ເຈີ່ນດ້າຍກວາງ ຕາມຄຳເຊີນຂອງທ່ານພະບາດສົມເດັດພະບໍລົມມະນຽດ Norodom Sihamoni ແຫ່ງລາຊະອານາຈັກ ກຳປູເຈຍ. ໜັງສືພິມລັດສະໝີ ແມ່ນໜຶ່ງໃນບັນດາໜັງສືພິມໃຫຍ່ຢູ່ ກຳປູເຈຍ ຖືວ່າ: “ການຢ້ຽມຢາມຄັ້ງນີ້ ສະແດງຄວາມເອົາໃຈໃສ່ແຖວໜ້າຂອງ ຫວຽດນາມ ໃນການເພີ່ມທະວີນ້ຳໃຈມິດຕະພາບ, ຄວາມສາມັກຄີ, ການຮ່ວມມືທີ່ເປັນມູນເຊື້ອລະຫວ່າງ 3 ປະເທດ ກຳປູເຈຍ - ລາວ - ຫວຽດນາມ”. ໜັງສືພິມ ລັດສະໝີ ເນັ້ນໜັກວ່າ: ການຢ້ຽມຢາມດຳເນີນໄປ ໃນຂະນະທີ່ 2 ລັດ ແລະ ປະຊາຊົນ 2 ປະເທດພວມກະກຽມບັນດາການເຄື່ອນໄຫວສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດລະຫວ່າງ 2 ປະເທດ (24/06/1967 – 24/06/2017). ສິ່ງນັ້ນ ຍັງປຸກລະດົມນ້ຳໃຈສາມັກຄີລະຫວ່າງປະຊາຊົນ 2 ປະເທດກ່ວາອີກ. ໜັງສືພິມ PRESH NEWS ແລະ AKP ພ້ອມກັບໜັງສືພິມບາງສະບັບອື່ນໆຂອງ ກຳປູເຈຍ ກໍ່ໃຫ້ຫລາຍຂ່າວ ແລະ ບົດທີ່ເນັ້ນໜັກວ່າ ການຢ້ຽມຢາມຂອງທ່ານປະທານປະເທດ ເຈີ່ນດ້າຍກວາງ ເຖິງປະເທດ ກຳປູເຈຍ ສະແດງໃຫ້ເຫັນຄວາມເອົາໃຈໃສ່ແຖວໜ້າຂອງ ຫວຽດນາມ ໃນການເພີ່ມທະວີ, ຄວາມສາມັກຄີມິດຕະພາບ, ການຮ່ວມມືທີ່ເປັນມູນເຊື້ອກັບ ກຳປູເຈຍ.