ສື່ມວນຊົນລາວໃຫ້ຂ່າວກ່ຽວກັບການມາຢ້ຽມຢາມແລະເຮັດວຽກຢູ່ຫວຽດນາມຂອງທ່ານເລຂາທິການໃຫຍ່ບຸນຍັງວໍລະຈິດ
ໜັງສືພິມ “ປະຊາຊົນລາວ”
(vovworld) – ໃນໜ້າທຳອິດຂອງບັນດາໜັງສືພິມຢູ່ລາວ ສະບັບອອກວັນທີ 28/4, ໄດ້ລົງພິມຫຼາຍຂ່າວ, ບົດ, ພາບຖ່າຍ ແລະ ຖະແຫຼງການຮ່ວມ ຫວຽດນາມ-ລາວ ກ່ຽວກັບການໄປຢ້ຽມຢາມ ສັນຖະວະໄມຕີ ຫວຽດນາມ ຢ່າງເປັນທາງການ ຂອງ ທ່ານເລຂາທິການໃຫຍ່, ປະທານປະເທດລາວ ບຸນຍັງ ວໍລະຈິດ ໃນລະຫວ່າງ ວັນທີ 25-27/4.
ໜັງສືພິມ “ປະເທດລາວ” ເນັ້ນໜັກວ່າ: ການໄປຢ້ຽມຢາມ ສັນຖະວະໄມຕີຫວຽດນາມ ຢ່າງເປັນທາງການ ແມ່ນການເຄື່ອນໄຫວທາງການທູດ ຢູ່ຕ່າງປະເທດຄັ້ງທຳອິດ ຂອງທ່ານ ບຸນຍັງ ວໍລະຈິດ ພາຍຫຼັງ ທ່ານໄດ້ຮັບດຳລົງຕຳແໜ່ງເປັນເລຂາທິການໃຫຍ່, ປະທານປະເທດ ສປປ ລາວ. ສິ່ງດັ່ງກ່າວ ໄດ້ສະແດງໃຫ້ເຫັນວ່າ ສປປ ລາວ ຢາມໃດກໍ່ຖືເປັນສຳຄັນ ການພົວພັນກັບ ຫວຽດນາມ. ໜັງສືພິມ “ປະຊາຊົນລາວ” ຢັ້ງຢືນວ່າ: ເຖິງວ່າສະພາບການໂລກ ແລະ ພາກພື້ນ ມີການຜັນແປຫຼາຍຢ່າງກໍ່ຕາມ, ແຕ່ການຮ່ວມມືຮອບດ້ານ ຄວາມສາມັກຄີແບບພິເສດ ລະຫວ່າງ ສອງປະເທດ ຫວຽດນາມ ແລະ ລາວ ຍັງສືບຕໍ່ໄດ້ຮັບການເສີມຂະຫຍາຍ ທັງລວງກ້ວາງ ແລະ ລວງເລິກ; ການພົວພັນດ້ານການເມືອງ ສືບຕໍ່ໄດ້ຮັບການປັບປຸງ; ການພົວພັນດ້ານເສດຖະກິດ, ການຄ້າ, ການລົງທຶນ, ການສຶກສາ, ວັດທະນະທຳ ແລະ ວິທະຍາສາດເຕັກໂນໂລຊີ ໄດ້ຮັບການເປີດກວ້າງຢ່າງລຽນຕິດ, ນຳມາເຊິ່ງຜົນປະໂຫຍດທີ່ແທດຈິງ ໃຫ້ທັງສອງປະເທດ… ໃນຂະນະນັ້ນ, ໜັງສືພີມ “ວຽງຈັນທາມ” ໄດ້ຄັດສະເໜີ ຄຳປາໄສຂອງທ່ານ ເລຂາທິການໃຫຍ່, ປະທານປະເທດລາວ ບຸນຍັງ ວໍລະຈິດ ຢູ່ສະຖາບັນການເມືອງແຫ່ງຊາດ ໂຮຈີມີນ, ຢືນຢັນວ່າ: ບັນດາເຈົ້າໜ້າທີ່ຂັ້ນສູງຂອງລາວ ທີ່ເຄີຍຮຽນ ຢູ່ສະຖາບັນການມືອງ, ຕົ້ນຕໍແມ່ນແຫຼ່ງຊັບພະຍາກອນມະນຸດ ອັນລ້ຳຄ່າ, ປະກອບສ່ວນໃຫ້ການພັດທະນາ ແລະ ປົກປັກຮັກສາປະເທດຊາດລາວ; ພ້ອມນັ້ນກໍ່ເປັນຂົວ “ເຊື່ອມຕໍ່”, ເປັນ “ແກ່ນສານ” ເພື່ອສືບຕໍ່ພັດທະນາສາຍພົວພັນ ທີ່ສະໜິດຕິດພັນ ແລະ ຫາຍາກ ລະຫວ່າງ ສອງປະເທດ ລາວ-ຫວຽດນາມ. ກໍ່ໃນວັນດຽວກັນ, ໜັງສືພິມ “Lao Phatthana” (ລາວພັດທະນາ) ຂອງສະມາຄົມນັກຂ່າວລາວ ໄດ້ລົງພິມບົດ ແລະ ພາບຖ່າຍ ດ້ວຍຫົວຂໍ້: “ໝາກຜົນການໄປຢ້ຽມຢາມສັນຖະວະໄມຕີ ຫວຽດນາມ ຢ່າງເປັນທາງການ ຂອງ ທ່ານເລຂາທິການໃຫຍ່, ປະທານ ປະເທດລາວ ບຸນຍັງ ວໍລະຈິດ”, ໃນນັ້ນໄດ້ເຕື້ອງເຖິງ ຄວາມເຫັນດີເປັນເອກະພາບ ຂອງການນຳສອງປະເທດ ກ່ຽວກັບບັນຫາທະເລຕາເວັນອອກ, ໂດຍຢືນຢັນວ່າ: “ສອງຝ່າຍໄດ້ເນັ້ນໜັກເຖິງຄວາມສຳຄັນ ຂອງການຮັກສາສັນຕິພາບ, ສະຖຽນລະພາບ, ຄວາມໜັ້ນຄົງ, ຄວາມປອດໄພ ຢູ່ທະເລຕາເວັນອອກ”; ແລະ ເຫັນດີເປັນເອກະສັນ ຊຸກຍູ້ການແກ້ໄຂບັນດາການຂັດແຍ່ງກັນ ຢູ່ທະເລຕາເວັນອອກ ໂດຍສັນຕິວິທີ, ບົນພື້ນຖານກົດໝາຍສາກົນ; ພ້ອມກັບບັນດາຝ່າຍ ປະຕິບັດຖະແຫຼງການ ກ່ຽວກັບການປະພຶດ ຂອງບັນດາຝ່າຍຕ່າງໆ ຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ມີປະສິທິຜົນ ແລະ ບັນລຸໄດ້ປະມວນຂໍ້ກຳນົດ ການປະພຶດຢູ່ທະເລຕາເວັນອອກ (COC) ໂດຍໄວ ເພື່ອແນໃສ່ ປົກປັກຮັກສາສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາ ຢູ່ພາກພື້ນ ແລະ ໃນໂລກ.