ທ່ານນາຍົກລັດຖະມົນຕີ ຫງວຽນເຕີນຢູ້ງ ພົບ 112 ອົງການສື່ສານ
(ພາບ: sggp.org.vn)
|
(vovworld) – ເນື່ອງໃນໂອກາດສະເຫຼີມສະຫຼອງ 90 ປີແຫ່ງວັນສື່ມວນຊົນປະຕິວັດ ຫວຽດນາມ (21/6/1925 – 21/6/2015), ຕອນບ່າຍວັນທີ 19/6, ຢູ່ຮ່າໂນ້ຍ, ກະຊວງຖະແຫຼງຂ່າວ ແລະ ສື່ສານໄດ້ຈັດຕັ້ງງານພົບປະສັງສັນກັບການນຳ 112 ອົງການສື່ສານ, ໜັງສືພິມ ແລະ ບັນດານັກຂ່າວຜ່ານໄລຍະຕ່າງໆ. ກ່າວຄຳເຫັນນະທີ່ນີ້, ທ່ານນາຍົກລັດຖະມົນຕີ ຫງວຽນເຕີນຢູ້ງ ເນັ້ນໜັກວ່າ: ພັກ, ລັດ ແລະ ປະຊາຊົນ ມີຄວາມເອກອ້າງທະນົງໃຈຕໍ່ບັນດາບາດກ້າວເຕີບໃຫຍ່ ແລະ ພັດທະນາຂອງສື່ມວນຊົນປະຕິວັດ ຫວຽດນາມ. ສື່ມວນຊົນປະຕິວັດ ຫວຽດນາມ ຍາມໃດກໍ່ຈົ່ງຮັກພັກດີຕໍ່ພາລະກິດປະຕິວັດຂອງພັກ, ລັດ ແລະ ປະຊາຊົນຜ່ານໄລຍະຕ່າງໆ, ຍາມໃດກໍ່ມານະພະຍາຍາມສູ້ຊົນ, ຂະຫຍັນຂັນເຄື່ອນ, ມີຫົວຄິດປະດິດສ້າງ, ປະຕິບັດສຳເລັດພາລະໜ້າທີ່, ໜ້າທີ່ເຊິ່ງໄດ້ຮັບມອບໝາຍ, ປະກອບສ່ວນສຳຄັນ, ໃຫຍ່ຫຼວງເຂົ້າໃນຜົນສຳເລັດລວມຂອງປະເທດຊາດໃນພາລະກິດຕໍ່ສູ້ຍາດເອົາເອກະລາດ, ເສລີພາບ, ໂຮມປະເທດຊາດເປັນເອກະພາບກ່ອນນີ້ ກໍ່ຄືໃນພາລະກິດສ້າງສາ, ພັດທະນາ ແລະ ປົກປັກຮັກສາປະເທດຊາດໃນປະຈຸບັນ. ທ່ານນາຍົກລັດຖະມົນຕີ ຫງວຽນເຕີນຢູ້ງ, ເນັ້ນໜັກວ່າ:
“ສື່ມວນຊົນຫວຽດນາມ ເວົ້າລວມ ແລະ ຖັນແຖວຜູ້ເຮັດວຽກງານສື່ສານຂອງ ຫວຽດນາມ ເວົ້າສະເພາະ ໄດ້ເຕີບໃຫຍ່ເຂັ້ມແຂງ. ການເຕີບໃຫຍ່ທັງດ້ານສະຕິ ແລະ ຄຸນນະທາດການເມືອງ, ທັງດ້ານວິຊາສະເພາະ, ລະດັບເຕັກໂນໂລຢີໃນເງື່ອນໄຂປະເທດຊາດພວມເຊື່ອມໂຍງ, ຕ້ອງອັບເດັດຂໍ້ມູນຂ່າວຢ່າງໄວກັບໂລກ, ໃນເງື່ອນໄຂເຕັກໂນໂລຢີພັດທະນາໄວຄືປະຈຸບັນ. ສື່ມວນຊົນ ແລະ ບັນດາຜູ້ເຮັດວຽກງານສື່ສານຕ້ອງເຕີບໃຫຍ່, ເຂັ້ມແຂງ, ຮຽງບ່າຮຽງໄຫຼ່ພ້ອມກັບເພື່ອນມິດສາກົນຢ່າງແທ້ຈິງ.”