ສື່ມວນຊົນ ອັກຊັງຕີນ ໃຫ້ຂ່າວກ່ຽວກັບການປະຕິວັດເດືອນສິງຫາ
(ພາບ: Vietnam+)
(vovworld) – ວັນທີ 19/8, ສື່ເອເລັກໂຕນິກຂອງ ອັກຊັງຕີນ ໄດ້ໃຫ້ຂ່າວຢ່າງຫຼວງຫຼາຍກ່ຽວກັບຄວາມໝາຍ ແລະ ບົດຮຽນປະຫວັດສາດຂອງການປະຕິວັດເດືອນສິງຫາຂອງ ຫວຽດນາມ, ເນື່ອງໃນໂອກາດສະເຫຼີມສະຫຼອງ 71 ປີແຫ່ງເຫດການສຳຄັນຍິ່ງນີ້ (19/8/1945 – 19/8/2016).
ດ້ວຍຫົວຂໍ້ວ່າ “ຫວຽດນາມ, ປະເທດສັນຕິພາບ”, ສື່ເອເລັກໂຕນິກ Acercando Naciones ຂອງ ອັກຊັງຕີນ ໄດ້ມີບົດຂຽນເນັ້ນໜັກວ່າ: ຊາດ ຫວຽດນາມ ແມ່ນຊາດວິລະຊົນ, ຍາມໃດກໍ່ຍາດເອົາໄຊຊະນະເພື່ອປົກປັກຮັກສາອະທິປະໄຕ. ບົດຂຽນໄດ້ຕີລາຄາການປະຕິວັດເດືອນສິງຫາປີ 1945 ແມ່ນບາດຄ້ອນແຮງທີ່ເລັ່ງໃສ່ລັດທິລ່າເມືອງຂຶ້ນ, ເປີດສາກໃຫ້ແກ່ຂະບວນການປົດປ່ອຍຊາດໃນທົ່ວໂລກ. ນີ້ແມ່ນການສົມທົບລະຫວ່າງການຕໍ່ສູ້ທາງດ້ານການເມືອງ ແລະ ການຕໍ່ສູ້ດ້ວຍກຳລັງອາວຸດໄດ້ຮັບການນຳໃຊ້ຢ່າງເໝາະສົມກັບແຕ່ລະສະພາບການ. ຕາມບົດຂຽນແລ້ວ, ການປະຕິວັດເດືອນສິງຫາ ແມ່ນການພິສູດໃຫ້ເຫັນແຜນນະໂຍບາຍທີ່ຖືກຕ້ອງກໍ່ຄືຄວາມສາມາດຊີ້ນຳນຳພາຂອງພັກກອມມູນິດ ຫວຽດນາມ ແລະ ແນວໂຮມ ວຽດນິນ, ປະກອບສ່ວນຍາດໄດ້ໄຊຊະນະຂອງຊາດ ຫວຽດນາມ, ສະຖາປະນາປະເທດ ສາທາລະນະລັດ ປະຊາທິປະໄຕ ຫວຽດນາມ ໃນວັນທີ 2/9/1945.
ສື່ເອເລັກໂຕນິກຂອງສູນຄົ້ນຄ້ວາເສດຖະກິດ ແລະ ສັງຄົມ ອັກຊັງຕີນ (CIEYS) ໄດ້ຫວນຄືນແຕ່ລະໄລຍະຂອງການຕໍ່ສູ້ຕ້ານລ່າເມືອງຂຶ້ນຝຣັ່ງຂອງ ຊາດ ຫວຽດນາມ. ໃນຂະນະນັ້ນ, ສື່ເອເລັກໂຕນິກ ArgenPress ກໍ່ແນະນຳໄລຍະທາງປະຫວັດສາດຂອງ ຫວຽດນາມ ໄລຍະ 1954 – 1975.