(vovworld) - ຕອນຄ່ຳວັນທີ 30/11, ທ່ານເອກອັກຄະລັດຖະທູດວິສາມັນ, ຜູ້ມີອຳນາດເຕັມແຫ່ງສປປລາວ ປະຈຳຮ່າໂນ້ຍ ທອງສະຫວັນ ພົມວິຫານ ໄດ້ຈັດງານລ້ຽງຢ່າງສົມກຽດເນື່ອງໃນໂອກາດສະເຫຼີມສະຫຼອງ 40 ປີແຫ່ງວັນຊາດສປປ.ລາວ (02/12/1975 – 02/12/2015). ເຂົ້າຮ່ວມພິທີມີທ່ານ ເລຮົ່ງແອງ, ກຳມະການກົມການເມືອງ, ຜູ້ປະຈຳການຄະນະເລຂາສູນກາງພັກ; ທ່ານນາງ ຫງວຽນທິຢວານ, ກຳມະການສູນກາງພັກ, ຮອງປະທານປະເທດ; ທ່ານ ຫວູວັນນິງ, ກຳມະການສູນກາງພັກ, ຮອງນາຍົກລັດຖະມົນຕີ ພ້ອມກັບຜູ້ຕາງໜ້າບັນດາກະຊວງ, ຂະແໜງການຂອງຫວຽດນາມ ແລະ ບັນດາເອກອັກຄະລັດຖະທູດ, ນັກການທູດ ແລະ ຜູ້ຕາງໜ້າບັນດາອົງການຈັດຕັ້ງສາກົນຢູ່ຮ່າໂນ້ຍ.
(ທ່ານເອກອັກຄະລັດຖະທູດລາວ ທອງສະຫວັນ ພົມວິຫານ)
ກ່າວຄຳເຫັນທີ່ພິທີ, ທ່ານເອກອັກຄະລັດຖະທູດລາວ ທອງສະຫວັນ ພົມວິຫານ ຊີ້ແຈ້ງວ່າ, ຈາກປະເທດທີ່ຫຼ້າຫຼັງ, ດ້ອຍພັດທະນາ, ພາຍຫຼັງ 40 ປີ, ພິເສດແມ່ນພາຍຫຼັງ 29 ປີແຫ່ງການປະຕິຮູບ, ລາວ ໄດ້ພັດທະນາເທື່ອລະກ້າວ, ລະດັບເຕີບໂຕດ້ານເສດຖະກິດ GDP ຄິດສະເລ່ຍແມ່ນປະມານ 7%/ປີ; ອັດຕາສ່ວນປະຊາຊົນຮູ້ໜັງສືກວມເອົາ 99%; ພົນລະເມືອງ 98% ສາມາດສຳພັດກັບບັນດາການບໍລິການດ້ານສາທາລະນະສຸກ ແລະ 89% ຈຳນວນຄອບຄົວໃນທົ່ວປະເທດມີໄຟຟ້ານຳໃຊ້. ກ່ຽວກັບພື້ນຖານໂຄງລ່າງເສດຖະກິດ - ສັງຄົມ ແມ່ນໄດ້ຮັບປັບປຸງເທື່ອລະກ້າວ, ມີເສັ້ນທາງຄົມມະນາຄົມເຊື່ອມຕໍ່ລະຫວ່າງເມືອງ… ດ້ວຍຜົນງານ ແລະ ໂຊຊະນະໃນຫຼາຍດ້ານດັ່ງກ່າວ, ປະຈຸບັນ, ລາວ ໄດ້ກາຍເປັນປະເທດ ມີຄວາມໝັ້ນຄົງດ້ານການເມືອງ, ຮັບປະກັນຄວາມສະຫງົບປອດໄພທາງສັງຄົມ, ເສດຖະກິດນັບມື້ນັບພັດທະນາ, ທ່ານເອກອັກຄະລັດຖະທູດກໍເນັ້ນໜັກວ່າ, ໃນຕະຫຼອດ 40 ປີຜ່ານມາ, ເຖິງວ່າສະພາບໂລກ ແລະ ພາກພື້ນມີການຜັນແປຢ່າງສັບສົນ ຍາກທີ່ຈະຄາດຄະເນໄດ້, ແຕ່ສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງລາວ ແລະ ຫວຽດນາມ ຍັງຄົງໄດ້ຮັບການພັດທະນາຢ່າງບໍ່ຢຸດຢັ້ງໃນທຸກຂົງເຂດ. ທ່ານເອກອັກຄະລັດຖະທູດ ທອງສະຫວັນ ພົມວິຫານ ໃຫ້ຮູ້ວ່າ.
(ທ່ານເອກອັກຄະລັດຖະທູດລາວ ທອງສະຫວັນ ພົມວິຫານ)
(ທ່ານນາງຮອງປະທານປະເທດ ຫງວຽນທິຢວານ)
ກ່າວຄຳເຫັນທີ່ພິທີ, ທ່ານນາງຮອງປະທານປະເທດ ຫງວຽນທິຢວານ ໄດ້ອວຍພອນບັນດາໄຊຊະນະອັນຍິ່ງໃຫຍ່, ຮອບດ້ານ ແລະ ມີຄວາມໝາຍປະຫວັດສາດເຊິ່ງປະເທດລາວ ບັນລຸໄດ້ໃນຕະຫຼອດ 40 ປີຜ່ານມາ.
“ພັກ ແລະ ລັດຫວຽດນາມ ຍາມໃດກໍຖືເປັນສຳຄັນ ແລະ ໃຫ້ບຸລິມະສິດສູງສຸດໃຫ້ແກ່ການປັບປຸງ ແລະ ເພີ່ມທະວີສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານກັບລາວ ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາຢູ່ພາກພື້ນ ແລະ ໃນໂລກ. ຕາງໜ້າໃຫ້ພັກ, ລັດ ແລະ ປະຊາຊົນຫວຽດນາມ, ຂ້າພະເຂົ້າຂໍອວຍພອນໃຫ້ປະຊາຊົນລາວ ອ້າຍນ້ອງ, ພາຍໃຕ້ການຊີ້ນຳນຳພາອັນສະຫຼາດສ່ອງໃສຂອງພັກປະຊາຊົນປະຕິວັດລາວ, ໂດຍທ່ານເລຂາທິການໃຫຍ່, ປະທ່ານປະເທດລາວ ຈູມມາລີ ໄຊຍະສອນ ນຳໜ້າຈະສືບຕໍ່ຍາດໄດ້ບັນດາໄຊຊະນະໃໝ່ທີ່ຍິ່ງໃຫຍ່ກວ່າອີກ ໃນພາລະກິດປົກປັກຮັກສາ ແລະ ສ້າງສາປະເທດລາວ ແຫ່ງສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະ ວັດທະນາຖາວອນໃຫ້ປະສົບຜົນສຳເລັດ.”
ພາຍຫຼັງພິທີ, ບັນດາຜູ້ແທນໄດ້ຮັບຊົມບັນດາວາດຟ້ອນທີ່ເປັນສັນຍາລັກຂອງລາວ ນັກສຶກສາລາວ ພວມຮ່ຳຮຽນ ຢູ່ຫວຽດນາມ ແລະ ພ້ອມກັນຮັບປະທານອາຫານທີ່ເປັນມູນເຊື້ອຂອງລາວ.