ສະຖານທູດຫວຽດນາມ ຢູ່ຫຼາຍປະເທດຈັດພິທີ ໄຫວ້ອາໄລ ພົນເອກ ຫວໍງວຽນຢາບ
(ສະຖານທູດຫວຽດນາມ ປະຈຳລາວ
ຈັດພິທີໄຫວ້ອາໄລ ພົນເອກຫວໍງວຽນຢາບ)
(vovworld) - ວັນທີ 13 ຕຸລາ, ພິທີໄຫວ້ອາໄລ ແລະ ເຊັນປື້ມໄວ້ອາໄລ ພົນເອກຫວໍງວຽນຢາບ ຖືກຈັດຂຶ້ນຢູ່ສຳນັກງານຄະນະຜູ້ແທນຫວຽດນາມ ຢູ່ຄຽງຂ້າງສະຫະປະຊາຊາດ, ອົງການຄ້າສາກົນ (WTO) ແລະ ບັນດາອົງການສາກົນອື່ນຢູ່ ເຊີແນວ, ປະເທດສະວິດ. ໃນບັນຍາກາດທີ່ເຄັ່ງຂຶມ, ເຄົາລົບ, ພະນັກງານບັນດາອົງການຕາງໜ້າຫວຽດນາມ ແລະ ບຸກຄົນໄດ້ຖະຫວາຍທູບທຽນຕໍ່ໜ້າຮູບພາບພົນເອກຫວໍງວຽນຢາບ ແລະ ໄດ້ເຊັນປື້ມໄວ້ອາໄລ ດ້ວຍຄວາມໂສກເສົ້າເສຍດາຍ. ເນື້ອໃນທີ່ຂຽນລົງປື້ມໄວ້ອາໄລ, ທ່ານອັກຄະລັດຖະທູດ ຝ້າມກວກຈຸ, ຮອງຫົວໜ້າຄະນະທູຕານຸທູດຫວຽດນາມ ປະຈຳ ເຊີແນວ, ໄດ້ສະແດງຄວາມທີ່ເຄົາລົບນັບຖືສັ່ງລາພົນເອກ ແລະ ຂໍໃຫ້ວິນຍານຂອງເພີ່ນໄປສູ່ສຸຄະຕິ ແລະ ຈະສືບຕໍ່ດົນບັນດານໃຫ້ຊາດຫວຽດນາມ ໃນສັນຕິພາບ, ວັດທະນາຖາວອນ, ປະຊາຊົນມີຄວາມຜາສຸກຕະຫຼອດໄປ. ທ່ານອະດີດປະທານາທິບໍດີ ສະວິດ Pascal Couchepin ໄດ້ເຂົ້າຮ່ວມພິທີໄຫວ້ອາໄລ ແລະ ໃຫ້ຂໍ້ສັງເກດວ່າ ພົນເອກຫວໍງວຽນຢາບ ແມ່ນນັກຍຸດທະສາດການທະຫານທີ່ດີເດັ່ນ, ແມ່ນນັກປະຕິວັດຂອງຫວຽດນາມ ແລະ ໂລກໃນສະຕະວັດທີ 20 ແລະ ກໍ່ແມ່ນຜູ້ທີ່ລຽບງ່າຍ, ສະຫຼາດສະຫຼຽວ ແລະ ໃກ້ຊິດ.
ທີ່ພາກພື້ນອາເມລິກາລາຕີນ, ບັນດາໂທລະເລກຂອງຄະນະບໍລິຫານງານສູນກາງພັກກອມມູນິດ ຈີເລ, ພັກສັງຄົມ ຈີເລ, ສະຖາບັນວັດທະນະທຳ ຈີເລ - ຫວຽດນາມ, ຄະນະກຳມະການສາມັກຄີຈີເລ - ປາແລດສຕິນ ແລະ ເພື່ອນມິດຈີເລ ບາງຄົນທີ່ຝາກມາສະຖານທູດຫວຽດນາມ ປະຈຳຈີເລ ໄດ້ແບ່ງເບົາຄວາມເສົ້າສະຫຼົດໃຈຢ່າງເລິກເຊິ່ງເຖິງຄອບຄົວພົນເອກຫວໍງວຽນຢາບ ແລະ ພັກກອມມູນິດ, ລັດ ແລະ ປະຊາຊົນຫວຽດນາມ. ບັນດາໂທລະເລກ ລ້ວນແຕ່ຮັບຮູ້ຜົນງານອັນໃຫຍ່ຫຼວງຂອງພົນເອກຫວໍງວຽນຢາບ ທີ່ມີຕໍ່ພາລະກິດຕໍ່ສູ້ຍາດເອົາເອກະລາດ, ເສລີພາບ, ໂຮມປະເທດຊາດເປັນເອກະພາບໃນເມື່ອກ່ອນ ແລະ ໃນພາລະກິດສ້າງສາ ແລະ ປົກປັກຮັກສາປະເທດໃນປະຈຸບັນ. ກົງສູນໃຫຍ່ສະຖານທູດຫວຽດນາມ ປະຈຳ San Francisco, ລັດ California, ອາເມລິກາ ໄດ້ຕັ້ງແທ່ນບຸຊາ ແລະ ຈັດຕັ້ງພິທີໄຫວ້ອາໄລ ແລະ ເຊັນປື້ມໄວ້ອາໄລ ພົນເອກຫວໍງວຽນຢາບ ຢ່າງສົມກຽດ.
ແລະກໍ່ໃນວັນດຽວກັນ, ສະຖານທູດຫວຽດນາມ ປະຈຳອາເມລິກາ, ລາວ, ສ.ເກົາຫຼີ, ອານເຢຣີ, ໄທ, ອິດສຣາແອນ, ອີຍີບ, ອິນໂດເນເຊຍ... ກໍ່ຈັດພິທີໄຫວ້ອາໄລ ແລະ ເຊັນປື້ມໄຫວ້ອາໄລ ພົນເອກຫວໍງວຽນຢາບ ຢ່າງສົມກຽດ.