ສະຖານທູດຫວຽດນາມປະຈຳອິນເດຍມານະພະຍາຍາມໜູນຊ່ວຍແຂກທ່ອງທ່ຽວຫວຽດນາມຍັງຄ້າງໄວ້ຢູ່ເນປານ
ປະຊາຊົນເນປານ ໄປຫຼົບໄພພາຍຫຼັງເຫດແຜ່ນດິນໄຫວ
(ພາບ: TTXVN)
|
(vovworld) – ທ່ານ ເຈີ່ນກວາງຕ໋ວຽນ, ອັກຄະລັດຖະທູດ ສະຖານທູດ ຫວຽດນາມ ປະຈຳ ອິນເດຍ ໃຫ້ຮູ້ວ່າ: ມີຊາວ ຫວຽດນາມ ປະມານ 20 ຄົນພວມໄປທ່ອງທ່ຽວ ເນປານ. ວັນທີ 26/4, ສະຖານທູດ ໄດ້ຕິດຕໍ່ພົວພັນກັບກຸ່ມໜຶ່ງລວມມີ 6 ຄົນປະຈຸບັນພວມຢູ່ຊົ່ວຄາວໃນຄ້າຍຫຼົບໄພທີ່ ເນປານ ພາຍຫຼັງເຫດແຜ່ນດິນໄຫວເກີດຂຶ້ນເມື່ອວັນທີ 25/4. ສະຖານທູດ ໄດ້ສະໜອງບັນດາເບີໂທລະສັບທີ່ຈຳເປັນເພື່ອໃຫ້ເຂົາເຈົ້າຕິດຕໍ່ພົວພັນ ແລະ ຈະຊອກຫາວິທີໜູນຊ່ວຍເພື່ອສາມາດອອກຈາກ ເນປານ ໃນໄລຍະໄວທີ່ສຸດ. ສະຖານທູດ ຫວຽດນາມ ໄດ້ຝາກຈົດໝາຍທາງການເຖິງກະຊວງການຕ່າງປະເທດ ເນປານ, ພ້ອມທັງເຮັດວຽກກັບກົມພາກໃຕ້, ກະຊວງການຕ່າງປະເທດ ອິນເດຍ ເພື່ອສະເໜີຊ່ວຍນຳແຂກທ່ອງທ່ຽວ ຫວຽດນາມ ທີ່ພວມຄ້າງໄວ້ຢູ່ ເນປານ ໄປ ນິວເດລີ ເພື່ອສືບຕໍ່ໜູນຊ່ວຍເຂົາເຈົ້າກັບເມືອປະເທດຢ່າງປອດໄພ. ບັນດາອົງການກ່ຽວຂ້ອງຂອງ ເນປານ ແລະ ອິນເດຍ ໄດ້ຮັບຮູ້ຈະພະຍາຍາມຈົນສຸດຄວາມສາມາດເພື່ອໜູນຊ່ວຍພົນລະເມືອງ ຫວຽດນາມ.
ບັນດາປະເທດພວມເພີ່ມທະວີບັນດາຄວາມມານະພະຍາຍາມໜູນຊ່ວຍ ເນປານ ແກ້ໄຂຜົນຮ້າຍຢ້ອນຫຼັງຈາກເຫດແຜ່ນດິນໄຫວທີ່ຮ້າຍແຮງດັ່ງກ່າວ. ວັນທີ 26/4, ອາເມລິກາ ໄດ້ແຈ້ງໃຫ້ຮູ້ວ່າ ພາລະກອນກູ້ໄພກູ້ຊີບ 70 ຄົນ ທີ່ນຳເອົາສິນຄ້າ 45 ໂຕນ, ເປັນຕົ້ນແມ່ນອຸປະກອນໜູນຊ່ວຍກູ້ໄພກູ້ຊີບພວມໄປຍັງ ເນປານ ດ້ວຍເຮືອບິນຂົນສົ່ງການທະຫານ. ກໍ່ໃນວັນດຽວກັນ, ກະຊວງສະພາວະສຸກເສີນ ລັດເຊຍ ກໍ່ໃຫ້ຮູ້ວ່າ: ເຮືອບິນ 2 ລຳຂອງປະເທດນີ້ໄດ້ຂົນສົ່ງກຸ່ມກູ້ໄພກູ້ຊີບເຊິ່ງແມ່ນນັກຊ່ຽວຊານລວມມີ 90 ກ່ວາຄົນ, ພ້ອມກັບອຸປະກອນ ແລະ ສິນຄ້າກູ້ໄພກູ້ຊີບໄດ້ໄປຮອດ ເນປານແລ້ວ. ບັນດາປະເທດຄື: ອັງກິດ, ຝຣັ່ງ, ເຢຍລະມັນ, ແຟງລັງ, ແບນຊິກ, ລຸກຊຳບວກ, ການາດາ, ຍີ່ປຸ່ນ, ຈີນ, ອິນເດຍ… ລ້ວນແຕ່ໄດ້ສົ່ງກຳລັງກູ້ໄພກູ້ຊີບໄປຊ່ວຍ ເນປານ ແກ້ໄຂຜົນຮ້າຍຢ້ອນຫຼັງຈາກເຫດແຜ່ນດິນໄຫວປະຫວັດສາດນີ້.
ວັນທີ 26/4, ຄະນະກຳມະການ ເອີລົບ ໄດ້ປອຍບ້ວງເງິນຊ່ວຍເຫຼືອຮີບດ່ວນທີ່ມີມູນຄ່າ 3 ລ້ານ ເອີໂຣ ໃຫ້ແກ່ ເນປານ. ບັນດາປະເທດຄື: ອັງກິດ, ອົດສະຕາລີ, ນິວຊີແລນ, ສ. ເກົາຫຼີ, ເຢຍລະມັນ, ປອກຕູຍການ, ນອກແວ ກໍ່ໃຫ້ຄຳໝັ້ນສັນຍາອຸປະຖຳໃຫ້ແກ່ເນປານ.