ເຮືອນຊານຖືກເປເພພາຍຫຼັງການບຸກໂຈມຕີທາງອາກາດ
(ພາບ: ສຳນັກຂ່າວສານ ຊິນຮວາ)
|
|
(vovworld) – ວັນທີ 18/9 (ຕາມເວລາ ຫວຽດນາມ), ສະພາຄວາມໝັ້ນຄົງ ສປຊ ໄດ້ຈັດຕັ້ງກອງປະຊຸມດ່ວນທີ່ແກ່ຍາວເປັນເວລາ 1 ຊົ່ວໂມງກ່ຽວກັບບັນດາການບຸກໂຈມຕີທາງອາກາດໂດຍທະຫານປະສົມສາກົນ ໂດຍ ອາເມລິກາ ນຳໜ້າປະຕິບັດຢູ່ ຊີຣີ. ກອງປະຊຸມດັ່ງກ່າວໄດ້ຮັບການຈັດຕັ້ງຕາມຂໍ້ສະເໜີຂອງລັດເຊຍ ຍ້ອນ ປະເທດນີ້ຖືວ່າບັນດາເຫດບຸກໂຈມຕີດັ່ງກ່າວເຮັດໃຫ້ທະຫານ ຊີຣີ ຫຼາຍຄົນເສຍຊີວິດ ແລະ ອາດສາມາດເຮັດໃຫ້ຂໍ້ຕົກລົງຢຸດຍິງໂດຍ ມົດສະກູ ແລະ ວໍຊິງຕັນ ເປັນກາງໄກ່ເກ່ຍຖືກປະລາໄຊ. ກ່າວຄຳເຫັນທີ່ກອງປະຊຸມ, ທ່ານນາງ Samantha Power, ເອກອັກຄະລັດຖະທູດ ອາເມລິກາ ປະຈຳ ສປຊ ໃຫ້ຮູ້ວ່າ ວໍຊິງຕັນ ຍັງຕ້ອງສືບສວນກ່ຽວກັບເຫດບຸກໂຈມຕີດັ່ງກ່າວ. ທ່ານນາງ Power ຖະແຫຼງວ່າ: “ຖ້າຫາກຢັ້ງຢືນວ່າພວກຂ້າພະເຈົ້າໄດ້ບຸກໂຈມຕີພົນທະຫານ ຊີຣີ ນີ້ບໍ່ແມ່ນພວກຂ້າພະເຈົ້າໄດ້ຕັ້ງໃຈ ແລະ ອາເມລິກາ ຮູ້ສຶກເສຍດາຍທີ່ສຸດ”. ໃນຂະນະນັ້ນ, ເມື່ອຖືກຖາມກ່ຽວກັບເລື່ອງເຫດບຸກໂຈມຕີດັ່ງກ່າວແມ່ນການສິ້ນສຸດໃຫ້ແກ່ຂໍ້ຕົກລົງຢຸດຍິງໂດຍ ອາເມລິກາ ແລະ ລັດເຊຍ ຈັດຕັ້ງຫຼືບໍ່? ທ່ານ Vitaly Churkin, ເອກອັກຄະລັດຖະທູດ ລັດເຊຍ ປະຈຳ ສປຊ ຖືວ່າ ນີ້ຍັງແມ່ນຄຳຖາມບໍ່ທັນມີຄຳຕອບ. ຕາມທ່ານ Churkin ແລ້ວ, ອາເມລິກາ ອາດສາມາດລໍຖ້າຮອດເວລາ ມົດສະກູ ແລະ ວໍຊິງຕັນ ເລີ່ມຮ່ວມມືດ້ານການທະຫານຮ່ວມໃນ 2 ວັນຈະມາເຖິງ ແທນທີ ປະຈິບັດບັ້ນຮົບບຸກໂຈມຕີທີ່ຮ້າຍແຮງ.