ຕາມຂ່າວທີ່ໄດ້ອອກໃນເວລາ 6  ໂມງ ຂອງວັນທີ 15 ມິຖຸນາ ຂອງຄະນະຊີ້ນໍາແຫ່ງຊາດກ່ຽວກັບວຽກງານປ້ອງກັນ ແລະ ສະກັດກັ້ນໂລກລະບາດໂຄວິດ - 19 ໃຫ້ຮູ້ວ່າ ວັນທີ 15 ມິຖຸນາ ແມ່ນພໍດີ 2 ເດືອນເຕັມ ທີ່ຫວຽດນາມບໍ່ພົບກໍລະນີຕິດເຊື້ອພະຍາດໂຄວິດ - 19 ໃໝ່ຕື່ມອີກໃນຊຸມຊົນ.

        ໄລ່ຮອດປັດຈຸບັນ,ຈໍານວນຜູ້ຕິດເຊື້ອພະຍາດໂຄວິດ - 19 ທີ່ໄດ້ຮັບການປິ່ນປົວຫາຍດີຢູ່ຫວຽດນາມ ແມ່ນ 323/334 ກໍລະນີ ເຊິ່ງກວມເອົາ 96,7% ຍອດຈໍານວນຜູ້ຕິດເຊື້ອທັງໝົດຢູ່ຫວຽດນາມ. 11 ກໍລະນີຕິດເຊື້ອພະຍາດທີ່ຍັງເຫຼືອ ພວມໄດ້ຮັບການປິ່ນປົວຢູ່ບັນດາໂຮງໝໍ, ຄົນເຈັບສ່ວນຫຼາຍມີອາການສຸຂະພາບເປັນປົກກະຕິ, ກໍລະນີເປັນໜັກທີ່ສຸດແມ່ນ ນັກບິນຊາວ ອັງກິດ ກໍສາມາດຫາຍໃຈດ້ວຍຕົນເອງ ໄດ້ 60 ຊົ່ວໂມງແລ້ວ.

        ໃນຂະນະນັ້ນ, ຕາມເວັບໄຊ ສະຖິຕິ worldometers.info, ໂລກລະບາດໄດ້ແຜ່ລະບາດອອກສູ່ 213 ປະເທດ ແລະ ເຂດແຄວ້ນໃນໂລກ. ໄລ່ຮອດເວລາ 8 ໂມງເຊົ້າຂອງວັນທີ 15 ມິຖຸນາ (ຕາມເວລາຫວຽດນາມ), ຈໍານວນຜູ້ຕິດເຊື້ອພະຍາດໂຄວິດ - 19 ທັງໝົດໃນທົ່ວໂລກ ແມ່ນ  7.984.432 ກໍລະນີ, ໃນນັ້ນ ມີ 435.111 ກໍລະນີເສຍຊີວິດ, 4.104.373 ກໍລະນີໄດ້ຮັບການປິ່ນປົວຫາຍດີເປັນປົກກະຕິ. ຈໍານວນຜູ້ຕິດເຊື້ອພະຍາດມີທ່າອ່ຽງຫຼຸດລົງຢູ່ ປະເທດສ່ວນຫຼາຍໃນໂລກ, ເຖິງຢ່າງໃດກໍຕາມ, ການຜັນແປທີ່ໜ້າເປັນຫ່ວງແມ່ນ ບາງປະເທດ ອາຊີ ຄື ຈີນ, ສ.ເກົາຫຼີ, ອິນເດຍ... ຕ້ອງປະເຊີນໜ້າກັບຄວາມສ່ຽງໂລກລະບາດລະເບີດຂຶ້ນຄັ້ງທີ 2.

        ອາເມລິກາ ຍັງຄົງແມ່ນປະເທດຢືນອັນດັບທີ 1 ກ່ຽວກັບຈໍານວນຜູ້ຕິດເຊື້ອກໍຄືຜູ້ເສຍຊີວິດ, ຖັດມາແມ່ນ ບຣາຊີນ.