ສະພາສູງອາເມລິກາຮັບຮອງເອົາມະຕິຮຽກຮ້ອງຈີນເຮັດໃຫ້ທະເລຕາເວັນອອກກັບຄືນສູ່ສະພາບເດີມຄືກ່ອນວັນທີ1/5/2014
(vovworld)- ດ້ວຍບັດເຫັນດີທັງໝົດ, ວັນທີ 10/7, ສະພາສູງອາເມລິກາ ເຫັນດີຮັບຮອງເອົາມະຕິ ຄັດຄ້ານບັນດາການກະທຳເກາະຜິດຂອງຈີນຢູ່ທະເລຕາເວັນອອກ ແລະ ທະເລຮວາຕຸງ. ພິເສດ ມະຕິໄດ້ ຮຽກຮ້ອງຈີນ ຖອນຮ້ານເຈາະນ້ຳມັນ ໄຮຢາງ 981 ພ້ອມກັບບັນດາກຳລັງຄຸ້ມຊູ, ເຮັດໃຫ້ທະເລຕາເວັນອອກກັບຄືນສູ່ສະພາບເດີມຄືກ່ອນວັນທີ1/5/2014. ມະຕິສະບັບດັ່ງກ່າວໄດ້ຢືນຢັນຄືນການສະຫນັບສະຫນູນຂອງລັດຖະບານ ອາເມລິກາ ສຳລັບຄວາມເສລີໃນການເດີນທະເລ, ການນຳໃຊ້ບັນດາເຂດທະເລ ແລະ ເຂດນ່ານຟ້າຢູ່ພາກພື້ນ ອາຊີ ປາຊີຟີກ ຢ່າງຖືກຕ້ອງກັບກົດໝາຍ ກໍຄືມາດຕະການທາງການທູດ, ສັນຕິພາບ ສຳລັບການທວງເອົາ ແລະ ຄວາມຂັດແຍ້ງຢູ່ທະເລຕາເວັນອອກ ແລະ ຜືນແຜ່ນດິນ.
ກຳປັ່ນຄຸ້ມຊູຂອງຈີນ ຢູ່ ໃກ້ກັບບໍລິເວນຕັ້ງຮ້ານເຈາະນ້ຳມັນ
|
ມະຕິສະບັບດັ່ງກ່າວຊີ້ແຈ້ງວ່າ ໂດຍແມ່ນປະເທດມະຫາອຳນາດຢູ່ ອາຊີ ປາຊີຟີກ, ອາເມລິກາມີຜົນປະໂຫຍດແຫ່ງຊາດໃນການຮັກສາຄວາມເສລີການເຄ່ືອນໄຫວໃນເຂດນ່ານທະເລ ແລະ ເຂດນ່ານຟ້າສາກົນຢູ່ ອາຊີ ປາຊີຟີກ ກໍຄືໃນທົ່ວໂລກ. ສະພາສູງອາເມລິກາ ກ່າວປະນາມບັນດາການກະທຳ ນາບຂູ່ ຫລືນຳໃຊ້ກຳລັງອາວຸດ ເພື່ອກີດຂວາງຄວາມເສລີໃນການເຄື່ອນໄຫວຢູ່ເຂດນ່ານຟ້າສາກົນ, ປ່ຽນແປງສະພາບເດີມ ຫລືກໍ່ຂາດຄວາມສະຖຽນລະພາບສຳລັບພາກພື້ນ ອາຊີປາຊີຟີກ.
ມະຕິຊີ້ແຈ້ງ ບັນດາການທວງເອົາອະທິປະໄຕຜືນແຜ່ນດິນຂອງຈີນ ພ້ອມກັບບັນດາການກະທຳຫນູນຫລັງໃຫ້ແກ່ການເຄື່ອນໄຫວຂອງຮ້ານເຈາະນ້ຳມັນຢູ່ເຂດເສດຖະກິດຈຳເພາະ ແລະ ໄຫລ່ທະວີບຂອງຫວຽດນາມ ແມ່ນການຄິດໄລ່ຕາມລຳພັງຝ່າຍດຽວເພື່ອປ່ຽນແປງສະພາບການຢູ່ທະເລຕາເວັນອອກ ດ້ວຍການນຳໃຊ້ກຳລັງອາວຸດ ແລະ ມີສັນຍານລະເມີດຖະແຫລງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ.
ມະຕິໄດ້ຮຽກຮ້ອງລັດຖະບານຈີນ ຖອນຮ້ານເຈາະນ້ຳມັນ ແລະ ບັນດາກຳລັງທະເລທີ່ກ່ຽວຂ້ອງອອກຈາກເຂດເສດຖະກິດຈຳເພາະ ແລະ ໄຫລ່ທະວີບຂອງຫວຽດນາມ, ຢຸດຕິການກະທຳລະເມີດສົນທິສັນຍາສາກົນ ກ່ຽວກັບການປ້ອງກັນການຕຳກັນຢູ່ທະເລຕາເວັນອອກ ແລະ ເຮັດໃຫ້ທະເລຕາເວັນອອກກັບຄືນສູ່ສະພາບເດີມຄືກ່ອນວັນທີ1/5/2014.