ທ່ານຮອງນາຍົກລັດຖະມົນຕີຫວຽດນາມ ຫງວຽນຊວນຟຸກ
ຕອບຄຳຊັກຖາມຂອງບັນດາ ສ.ສ.ຊ (ພາບ: baochinhphudientu)
|
Vovworld- ພາຍຫຼັງດຳເນີນມາເປັນເວລາກ່ວາ 2 ວັນ, ການເຄື່ອນໄຫວຊັກຖາມບັນດາສະມາຊິກລັດຖະບານໃນຂອບເຂດກອງປະຊຸມສະໄໝສາມັນເທື່ອທີ 5 ສະພາແຫ່ງຊາດຫວຽດນາມຊຸດທີ່ 13 ໄດ້ສິ້ນສຸດລົງດ້ວຍການໃຫ້ຄຳຕອບຂອງ ທ່ານຮອງນາຍົກລັດຖະມົນຕີຫວຽດນາມ ຫງວຽນຊວນຟຸກ, ຊຶ່ງໄດ້ເຕື້ອງເຖິງ ຫຼາຍບັນຫາໃຫຍ່ຂອງປະເທດຊາດ. ນັ້ນແມ່ນວິທີການແກ້ໄຂເພື່ອບັນລຸຈຸດໝາຍ ພັດທະນາຂອງປີ 2013, ລະດັບການສ້າງໂຄງປະກອບເສດຖະກິດຄືນໃໝ່, ນະໂຍບາຍຍົກສູງຄຸນນະພາບການສຶກສາ, ຮັບປະກັນຄວາມປອດໄພທາງຄົມມະນາຄົມ, ການປ້ອງກັນ ແລະ ຕ້ານການສໍ້ລາດບັງຫຼວງ, ການປະຕິຮູບດ້ານການບໍລິຫານ. ຕອບຄຳຖາມຂອງ ສ.ສ.ຊ ກ່ຽວກັບແຜນນະໂຍບາຍ ແລະ ວິທີການແກ້ໄຂຂອງລັດຖະບານ ແນໃສ່ບັນລຸ ແລະ ລື່ນກາຍແຜນການທີ່ໄດ້ວາງອອກໃຫ້ປີ 2013. ທ່ານຮອງນາຍົກລັດຖະມົນຕີຫວຽດນາມ ຫງວຽນຊວນຟຸກ ໃຫ້ຮູ້ວ່າ ຫວຽດນາມເອົາໃຈໃສ່ເຖິງການພັດທະນາແບບຍືນຍົງ. ທ່ານກ່າວວ່າ :
“ ຖ້າຫາກພວກເຮົາຢາກພັດທະນາ, ແຕ່ຊີ້ນຳບໍ່ແໜ້ນແຟ້ນ, ກໍຈະກັບຄືນສູ່ໄພເງິນເຟີ້. ຍ້ອນເຫດນີ້ເອງ, ພວກເຮົາບໍ່ຄວນພັດທະນາແບບຟ້າວຝັ່ງຫາກຄວນພັດທະນາແບບຍືນຍົງ. ລັດຖະບານຈະສືບຕໍ່ຊຸກຍູ້ບັນດາກະຊວງ, ຂະແໜງການ ແລະ ທ້ອງຖິ່ນຕ່າງໆ ປະຕິບັດບັນດາມາດຕະດານ, ພັດທະນາເສດຖະກິດສັງຄົມ ປີ 2013ຊຶ່ງລັດຖະບານໄດ້ຊີ້ອອກ. ປະຕິບັດບັນດາເນື້ອໃນຊຶ່ງມະຕິ 02 ກ່ຽວກັບການແກ້ໄຂຄວາມຫຍຸ້ງຍາກ, ສ້າງເງື່ອນໄຂໃຫ້ແກ່ການຜະລິດ, ດຳເນີນທຸລະກິດພັດທະນາ. ທີ 3 ແມ່ນຍູ້ໄວການປ່ອຍເງິນທຶນກໍ່ສ້າງພື້ນຖານ. ຈັດແບ່ງທຶນສຳລັບກິດຈະກຳທີ່ຊັກຊ້າສູ່ກິດຈະກຳທີ່ສາມາດສຳເລັດໄວ ”
ກ່າວຄຳເຫັນສະຫຼຸບການເຄື່ອນໄຫວຊັກຖາມຂອງ ສ.ສ.ຊ ສຳລັບບັນດາສະມາຊິກລັດຖະບານ, ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ໄດ້ຕີລາຄາສູງຄວາມມານະພະຍາຍາມຂອງລັດຖະບານ, ບັນດາລັດຖະມົນຕີໃນການຜັນຂະຫຍາຍໜ້າທີ່ເສດຖະກິດສັງຄົມ, ການປ້ອງກັນຊາດ ປ້ອງກັນຄວາມສະຫງົບຂອງປະເທດຊາດ. ທ່ານ ປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ກ່າວວ່າ :
ສະພາແຫ່ງຊາດຮຽກຮ້ອງກະຊວງກະສີກຳ ແລະ ພັດທະນາຊົນນະບົດ ຈົ່ງດຳເນີນບັນດາມາດຕະການທີ່ຈຳເປັນເພື່ອສືບຕໍ່ຍູ້ແຮງການຜະລິດກະສີກຳ, ຮັບປະກັນໃຫ້ກະສີກຳພັດທະນາຢ່າງຮອບດ້ານ ແລະ ໝັ້ນຄົງ. ສຳລັບ ລັດຖະມົນຕີກະຊວງແຮງງານ, ທະຫານເສຍອົງຄະ ແລະ ສັງຄົມ, ສະພາແຫ່ງຊາດຕັ້ງບັນຫາໃຫຍ່ແມ່ນບຳລຸງສ້າງວິຊາຊີບ, ຮ່ວມມືກັບຕ່າງປະເທດເພື່ອສົ່ງແຮງງານໄປຕ່າງປະເທດ, ກວດກາຄືນນະໂຍບາຍສຳລັບຜູ້ທີ່ມີຄຸນງາມຄວາມດີ, ເອົາໃຈໃສ່ເຖິງການຫຼຸດຜ່ອນຄວາມແຕກໂຕນກັນລະຫວ່າງຄວາມຮ່ັງມີ ແລະ ທຸກຍາກ ”
ກ່ອນໜ້ານັ້ນ ໃນຕອນເຊົ້າ ວັນທີ 14/6, ບັນດາສ.ສ.ຊ ໄດ້ສຸມໃສ່ຊັກຖາມ ຫົວໜ້າອົງການໄອຍະການປະຊາຊົນສູງສຸດ ທ່ານ ຫງວຽນຮ່ວາບີງ ກ່ຽວກັບບັນດາບັນຫາທີ່ກ່ຽວຂ້ອງເຖິງການກະກຽມແຫຼ່ງຊັບພະຍາກອນມະນຸດໃຫ້ແກ່ຂະແໜງຕຸລາການ, ປະຕິບັດເສັ້ນທາງການປະຕິຮູບດ້ານຕຸລາການ, ຍົກສູງຄຸນນະພາບການໂຕ້ແຍ້ງກັນຢູ່ສານ. ກ່ຽວກັບມາດຕະການພັດທະນາ ແຫຼ່ງຊັບພະຍາກອນມະນຸດ, ຫົວໜ້າອົງການໄອຍະການປະຊາຊົນສູງສຸດ ທ່ານ ຫງວຽນຮ່ວາບີງ ໃຫ້ຮູ້ວ່າ :
“ ກ່ຽວກັບພະນັກງານບັນຈຸ, ພວກຂ້າພະເຈົ້າໄດ້ລາຍງານຕໍ່ຄະນະປະຈຳສະພາແຫ່ງຊາດກ່ຽວກັບການເພີ່ມຈຳນວນ ພະນັກງານບັນຈຸໃນເບື້ອງຕົ້ນ ແລະ ເພີ່ມຢູ່ບ່ອນສຳຄັນ, ໝາຍຄວາມວ່າ ເພີ່ມຢູ່ຂັ້ນເມືອງ ຊຶ່ງແມ່ນແຫ່ງແກ້ໄຂ 91% ຈຳນວນຄະດີໃນທົ່ວປະເທດ ແລະ ເພີ່ມຢູ່ບັນດາພາກສ່ວນທີ່ສຳຄັນ, ຍົກຕົວຢ່າງຄື: ນຳໃຊ້ເຕັກໂນໂລຢີຂໍ້ມູນຂ່າວສານ ແລະ ຢູ່ອົງການສືບສວນ. ກ່ຽວກັບການບຳລຸງສ້າງ, ພວກຂ້າພະເຈົ້າເພີ່ມທະວີການບຳລຸງສ້າງຢູ່ພາຍໃນປະເທດບົນພື້ນຖານປ່ຽນໃໝ່ຫຼັກສູດການສອນ, ຍົກສູງຄຸນນະພາບຂອງຄູອາຈານຢູ່ບັນດາຮາກຖານບຳລຸງສ້າງໃນຂະແໜງ. ພວກຂ້າພະເຈົ້າ ຍັງສົມທົບຢ່າງແໜ້ນແຟ້ນກັບ ບັນດາຮາກຖານບຳລຸງສ້າງຢູ່ຕ່າງປະເທດອີກດ້ວຍ”
ເມື່ອເຕື້ອງເຖິງຄຸນນະພາບການໂຕ້ແຍ້ງກັນຢູ່ທີ່ປະຊຸມສານ, ຫົວໜ້າອົງການໄອຍະການປະຊາຊົນສູງສຸດ ທ່ານ ຫງວຽນຮ່ວາບີງ ໃຫ້ຮູ້ວ່າ ນີ້ແມ່ນຄວາມຮຽກຮ້ອງເພື່ອກໍ່ສ້າງພື້ນຖານຕຸລາການທີ່ແຂງແຮງ ແລະ ທັງແມ່ນຄວາມຮຽກຮ້ອງຂອງການປະຕິຮູບດ້ານຕຸລາການ. ວິທີການແກ້ໄຂຂອງຂະແໜງໃນໄລຍະທີ່ຈະມາເຖິງ ແມ່ນຍົກສູງລະດັບວິຊາຊີບຂອງພະນັກງານໄອຍະການ, ພິເສດແມ່ນພ້ອມກັບສານ ດຳເນີນບັນດາການປະຊຸມສານເປັນແບບຢ່າງໃຫ້ນັບມື້ນັບຫຼາຍຂຶ້ນເພື່ອຖອດຖອນບົດຮຽນ, ຜູກຮັດວຽກງານໄອຍະການກັບວິວັດການສືບສວນ.
ແລະ ກໍໃນຕອນເຊົ້າຂອງວັນດຽວກັນ, ທ່ານນາງລັດຖະມົນຕີກະຊວງແຮງງານ, ທະຫານເສຍອົງຄະ ແລະ ສັງຄົມຫວຽດນາມ ຝ້າມທິຫາຍຈວຽນ ໄດ້ຕອບຄຳຊັກຖາມຂອງບັນດາສ.ສ.ຊ ກ່ຽວກັບລະບອບສຳລັບບັນດາເປົ້າໝາຍນະໂຍບາຍ, ຮັດແຄບຊອງວ່າງລະຫວ່າງຄວາມຮັ່ງມີ ແລະ ທຸກຍາກຢູ່ບັນດາເຂດແຄ້ວນ........