ທ່ານຮອງນາຍົກລັດຖະມົນຕີ ຫວຽດນາມ Nguyen Xuan Phuc
ຕອບຄຳຊັກຖາມກ່ຽວກັບບັນດາບັນຫາເສດຖະກິດ-ສັງຄົມ
( ພາບ : chinhphudientu)
|
Vovworld- ໂດຍພາຍໃຕ້ການເປັນປະທານຂອງ ທ່ານປະທານສະພາແຫ່ງຊາດ ຫວຽດນາມ Nguyen Sinh Hung , ຕອນເຊົ້າວັນທີ 15/6 ສະພາແຫ່ງຊາດໄດ້ສິ້ນສຸດວາລະປະຊຸມຊັກຖາມບັນດາສະມາຊິກລັດຖະບານ. ຜ່ານວາລະຊັກຖາມເປັນເວລາ ກ່ວາ 2 ວັນ, ໄດ້ມີກວ່າ 160 ຄຳຊັກຖາມຂອງຜູ້ມີສິດເລືອກຕັ້ງ. ມີລັດຖະມົນຕີ 19 ທ່ານ ແລະ ການນຳຂະແໜງການຕ່າງໆໄດ້ເຂົ້າຮ່ວມຕອບຄຳຊັກຖາມ. ໃນຕອນເຊົ້າ 15/6 ທ່ານຮອງນາຍົກລັດຖະມົນຕີ ຫວຽດນາມ Nguyen Xuan Phuc ໄດ້ຂຶ້ນ ຕອບຄຳຊັກຖາມກ່ຽວກັບບັນດາບັນຫາເສດຖະກິດ-ສັງຄົມຊຶ່ງ ຜູ້ມີສິດເລືອກຕັ້ງມີຄວາມສົນໃຈ.
ສຳລັບບັນຫາພັດທະນາເສດຖະກິດ-ສັງຄົມ, ທ່ານຮອງນາຍົກລັດຖະມົນຕີ Nguyen Xuan Phuc ໃຫ້ຮູ້ວ່າ ປະຈຸບັນປະເທດຊາດໄດ້ຜ່ານມາໄລຍະທີ່ຫຍຸ້ງຍາກທີ່ສຸດ ແລະ ເລີ່ມມີທ່າອຽງພັດທະນາເປັນຢ່າງດີ. ທ່ານຮອງນາຍົກລັດຖະມົນຕີ Nguyen Xuan Phuc ຊີ້ແຈ້ງວ່າ :
“ ການຄວບຄຸມໄພເງິນເຟີ້ , ສ້າງເສດຖະກິດມະຫາພາກເປັນປົກກະຕິ ແມ່ນຈຸດໝາຍທີ່ສຳຄັນເພື່ອໃຫ້ປະເທດຊາດພັດທະນາເປັນປົກກະຕິ ແລະ ບັນລຸໝາກ ຜົນທີ່ດີງາມໃນໄລຍະທີ່ຈະມາເຖິງ. ນັ້ນແມ່ນລັກສະນະຢ່າງສະເໝີຕົ້ນສະເໝີປາຍຂອງການນຳພາຂອງລັດຖະບານ. ບໍ່ຄວນຖືເປັນສຳຄັນກ່ຽວກັບລະດັບການເຕີບໂຕ ແຕ່ກໍບໍ່ແມ່ນວ່າບໍ່ເອົາໃຈໃສ່ເຖິງຄາດໝາຍເງິນເຟີ້, ບໍ່ປະໃຫ້ໄພເງິນເຟີ້ກັບຕ່າວຄືນມາ. ຍ້ອນເຫດນີ້ເອງ, ພວກຂ້າພະເຈົ້າໄດ້ຕັ້ງບັນຫາຈຳກັດໄພເງິນເຟີ້ໃນລະດັບ 7% - 8%, ການເຕີບໂຕແມ່ນຕ່ຳກ່ວາ 6% ”
ທ່ານຮອງນາຍົກລັດຖະມົນຕີ Nguyen Xuan Phuc ໄດ້ເນັ້ນໜັກວ່າ ແຜນຮ່າງສັງລວມສ້າງໂຄງປະກອບພື້ນຖານເສຖະກິດຄືນໃໝ່ຂອງລັດຖະບານ ແມ່ນຈະຄິດໄລເຖິງປັດໃຈກົມກຽວ, ສ້າງຄວາມດຸນດຽງກັບ ບັນດາບັນຫາສັງຄົມ. ທ່ານກ່າວວ່າ :
“ ຂ້າພະເຈົ້າຢືນຢັນວ່າ ການສ້າງໂຄງປະກອບພື້ນຖານເສຖະກິດຄືນໃໝ່ຈະຜັນ ຂະຫຍາຍຢ່າງຄົບຊຸດ, ແຂງແຮງ, ມີເສັ້ນທາງກ້າວເດີນ ແລະ ສາມາດຈຳກັດ ບັນດາ ບັນຫາສັງຄົມທີ່ເກີດໃໝ່ໃນລະດັບສູງສຸດ. ແນວທາງ ຂອງພັກແມ່ນພັດທະນາ ເສດຖະກິດຕ້ອງຕິດພັນກັບການພັດທະນາສັງຄົມ. ບໍ່ຄວນເຫັນແກ່ການພັດທະນາ ເສດຖະກິດ, ຫາກບໍ່ເອົາໃຈໃສ່ເຖິງບັນຫາສັງຄົມ. ຢາກເຮັດໄດ້ເຊັ່ນນັ້ນ, ແມ່ນຕ້ອງຍູ້ແຮງດ້ານ ວັດທະນະທຳ, ການສຶກສາ ແລະ ບຳລຸງສ້າງ... ”
ທ່ານຮອງນາຍົກລັດຖະມົນຕີ Nguyen Xuan Phuc ຍັງຮັບຮູ້ຕໍ່ບັນດາ ຄຳຄິດເຫັນຂອງ ຜູ້ມີສິດເລືອກຕັ້ງ, ໂດຍຕາງໜ້າລັດຖະບານ, ທ່ານໄດ້ຍອມຮັບ ຕໍ່ຈຸດອ່ອນເມື່ອປະໃຫ້ເກີດສະພາບຮົ່ວໄຫຼ, ໃຊ້ຈາຍທຶນຟຸມເຟືອຍຢູ່ບາງກຸ່ມບໍລິສັດ, ບໍລິສັດໃຫຍ່ແຫ່ງລັດ. ສຳລັບການປະຕິຮູບລະບຽບການບໍລິຫານ, ທ່ານໃຫ້ຮູ້ວ່າ ລັດຖະບານຈະສືບຕໍ່ຍູ້ແຮງລະດັບ ການປະຕິຮູບລະບຽບການບໍລິຫານໃນປີ 2012. ສຳລັບວຽກງານປ້ອງກັນ ແລະ ຕ້ານໄພສໍ້ລາດບັງຫຼວງ, ການຟຸມເຟືອຍ, ທ່ານຮອງນາຍົກລັດຖະມົນຕີ Nguyen Xuan Phuc ຢືນຢັນວ່າ ລັດຖະບານຈະຕັດສິນໃຈສະກັດກັ້ນ, ຍູ້ໄພສັງຄົມນີ້ໃຫ້ຖອຍໄປ .
ກ່າວຄຳເຫັນສິ້ນສຸດວາລະຊັກຖາມບັນດາສະມາຊິກລັດຖະບານ, ທ່ານປະທານສະພາແຫ່ງຊາດ ຫວຽດນາມ Nguyen Sinh Hung ເນັ້ນໜັກວ່າ :
“ ພາຍຫຼັງສະໄໝປະຊຸມຄັ້ງນີ້, ຈະສືບຕໍ່ດຳເນີນການເຄື່ອນໄຫວຊັກຖາມ. ສະພາຊົນເຜົ່າ, ບັນດາກຳມາທິການຂອງ ສະພາແຫ່ງຊາດ ຈະສືບຕໍ່ດຳເນີນການເຄື່ອນໄຫວຮັບຟັງລາຍງານ, ອະພິປາຍຂອງບັນດາລັດຖະມົນຕີ, ການນຳຂະແໜງການຕ່າງໆກ່ຽວກັບບັນດາບັນຫາ ຊຶ່ງ ຜູ້ມີສິດເລືອກຕັ້ງມີຄວາມສົນໃຈ, ປະກອບສ່ວນຍົກສູງຄຸນນະພາບ, ປະສິດທິຜົນການເຄື່ອນໄຫວຂອງ ສະພາແຫ່ງຊາດ, ບັນດາອົງການຂອງ ສະພາແຫ່ງຊາດ, ແລະ ສສຊ, ເຮັດໃຫ້ການເຄື່ອນໄຫວຂອງລັດ, ສະພາແຫ່ງຊາດ ໄກ້ຊິດຕິດແທດກັບປະຊາຊົນກ່ວາ, ເປີດເຜີຍ ແລະ ກະຈ່າງແຈ້ງກ່ວາ ແລະ ເພື່ອໃຫ້ ຜູ້ມີສິດເລືອກຕັ້ງໃນທົ່ວປະເທດຕິດຕາມກວດກາການເຄື່ອນໄຫວຂອງລັດ ຕາມເນື້ອໃນຈິດໃຈຂອງມະຕິກອງປະຊຸມໃຫຍ່ຄັ້ງທີ່ 11 ຂອງພັກ” .