(vovworld) ຕອນບ່າຍວັນທີ 18/6, ພາຍໃຕ້ການເປັນປະທານຂອງທ່ານນາງຮອງປະທານສະພາແຫ່ງຊາດ Nguyen Thi Kim Ngan, ສະພາແຫ່ງຊາດດຳເນີນການລົງຄະແນນສຽງຮັບຮອງເອົາກົດໝາຍ 5 ສະບັບ ດ້ວຍບັດສະໜັບສະໜູນສ່ວນຫຼາຍ. ກອບກົດໝາຍ 5 ສະບັບລວມມີ: ກົດໝາຍວ່າດ້ວຍການປະກັນເງິນຟາກ, ກົດໝາຍວ່າດ້ວຍການປ້ອງກັນ, ຕ້ານການຟອກເງິນ, ກົດໝາຍວ່າດ້ວຍການສຶກສາຂັ້ນມະຫາວິທະຍາໄລ, ກົດໝາຍວ່າດ້ວຍການປ້ອງກັນ, ຕ້ານຜົນຮ້າຍຈາກຢາສູບ ແລະ ກົດໝາຍວ່າດ້ວຍແຮງງານ (ສະບັບປັບປຸງ).
ກ່ອນໜ້ານັ້ນ, ໃນຕອນເຊົ້າວັນທີ 18/6, ພາຍໃຕ້ການເປັນປະທານຂອງທ່ານນາງຮອງປະທານສະພາແຫ່ງຊາດ Tong Thi Phong, ສະພາແຫ່ງຊາດໄດ້ປຶກສາຫາລື ຢູ່ຫໍປະຊຸມ ກ່ຽວກັບຮ່າງກົດໝາຍວ່າດ້ວຍການພິມຈຳໜ່າຍ (ສະບັບປັບປຸງ). ບັນດາຄຳຄິດຄຳເຫັນລ້ວນແຕ່ເຫັນດີຕ້ອງປະກາດໃຊ້ກົດໝາຍວ່າດ້ວຍການພິມຈຳໜ່າຍ (ສະບັບປັບປຸງ). ເລື່ອງປະກາດໃຊ້ກົດໝາຍວ່າດ້ວຍການພິມຈຳໜ່າຍ (ສະບັບປັບປຸງ) ຈະສ້າງເງື່ອນໄຂເພື່ອສ້າງສຳເລັດກອບກົດໝາຍ ເພື່ອແກ້ໄຂບັນດາຂໍ້ຕິດຂັດໃນພຶດຕິກຳຕົວຈິງ, ດັດປັບການພົວພັນທີ່ຫາກໍເກີດຂຶ້ນໃນການເຄື່ອນໄຫວພິມຈຳໜ່າຍ, ພ້ອມທັງສ້າງເງື່ອນໄຂເພື່ອຊ່ວຍໃຫ້ຂົງເຂດພິມຈຳໜ່າຍສືບຕໍ່ພັດທະນາ, ຕອບສະໜອງໜ້າທີ່ກຳນົດທິດດ້ານວັດທະນະທຳ - ແນວຄິດ ແລະ ການພັດທະນາເສດຖະກິດ - ສັງຄົມ. ສະມາຊິກສະພາແຫ່ງຊາດ (ສສຊ) ຫຼາຍທ່ານ ສະເໜີຄວນຮັກສາບັນດາຂໍ້ກຳນົດຄືກົດໝາຍປະຈຸບັນ, ກ່ຽວກັບສິດອອກໃບອະນຸຍາດໃຫ້ເຄື່ອນໄຫວພິມຈຳໜ່າຍ, ມອບໝາຍໃຫ້ກະຊວງຖະແຫຼງຂ່າວ ແລະ ສື່ສານ ອອກໃບອະນຸຍາດໃຫ້ບັນດາໂຮງພິມຂອງອົງການ, ສຳນັກງານຂັ້ນສູນກາງ, ຄະນະກຳມະການປະຊາຊົນຂັ້ນແຂວງອອກໃບອະນຸຍາດໃຫ້ແກ່ໂຮງພິມຂອງທ້ອງຖີ່ນ
ທ່ານນາງ Tran Thi Dieu Thuy, ສສຊ ນະຄອນ ໂຮ່ຈີມິນ ໃຫ້ຄຳເຫັນວ່າ:
“ກ່ຽວກັບຮູບແບບຈັດຕັ້ງສຳນັກພິມ, ຂ້າພະເຈົ້າບໍ່ເຫັນດີກັບຮ່າງກົດໝາຍວ່າດ້ວຍການພິມຈຳໜ່າຍ (ສະບັບປັບປຸງ) ແລະ ການເຄື່ອນໄຫວຕາມຮູບແບບຫົວໜ່ວຍພາລະກິດຂອງລັດ ຫຼື ບໍລິສັດຈຳກັດຜູ້ດຽວ ໂດຍ ລັດຄຸ້ມຄອງ ເຊິ່ງຮັກສາຄືກົດໝາຍວ່າດ້ວຍການພິມຈຳໜ່າຍ ແມ່ນ ໂຮງພິມຈຳໜ່າຍໄດ້ຈັດຕັ້ງຕາມຮູບແບບວິສາຫະກິດ ດຳເນີນທຸລະກິດມີເງື່ອນໄຂ ຫຼື ຫົວໜ່ວຍພາລະກິດມີລາຍຮັບ. ໃນສະພາບຕົວຈິງ, ສິ່ງດັ່ງກ່າວບໍ່ກໍ່ຮົ້ວກິດຂວາງໃຫ້ແກ່ການກຳນົດທິດແນວຄິດ ເພາະວ່າ ໂຮງພິມຈຳໜ່າຍ ໄດ້ຈັດຕັ້ງຕາມຮູບແບບວິສາຫະກິດດຳເນີນທຸລະກິດ ມີເງື່ອນໄຂ ເພື່ອຮັບປະກັນບໍ່ໃຫ້ສວຍໃຊ້ເຮັດຜິດຈຸດໝາຍ ແລະ ການກຳນົດທິດດ້ານແນວຄິດ.”
ສ່ວນທ່ານນາງ Tran Thi Hong Tham, ສສຊ ນະຄອນ ເກີນເທີ ຖືວ່າ:
“ຂ້າພະເຈົ້າສະເໜີໃຫ້ຄະນະຮຽບຮຽງຄວນຄົ້ນຄ້ວາ, ເພີ່ມເຕີມບັນດາຂໍ້ກຳນົດ ກ່ຽວກັບການຄຸ້ມຄອງລັດ ກ່ຽວກັບການເຄື່ອນໄຫວພິມຈຳໜ່າຍ ແລະ ນະໂຍບາຍພັດທະນາບັນດາສິ່ງພິມ, ໃນນັ້ນຄວນສ້າງບັນດາເອກະສານ ເພື່ອສຸມໃສ່ຄຸ້ມຄອງບັນດາສິ່ງພິມ. ເລື່ອງສ້າງພື້ນຖານຂໍ້ມູນ ດ້ວຍເຕັກໂນໂລຢີປະຈຸບັນແມ່ນບໍ່ຍາກ, ບໍ່ເສຍເງິນຫຼາຍ ແລະ ວ່ອງໄວ. ”