ສະພາແຫ່ງຊາດ ຮັບຮອງເອົາຮ່າງກົດ ໝາຍສຳຄັນ 6 ສະບັບ
(ພາບປະກອບ)
(vovworld) - ຕອນບ່າຍວັນທີ 20/11, ສະພາແຫ່ງຊາດປຶກສາຫາລືກ່ຽວກັບຮ່າງກົດໝາຍວ່າດ້ວຍວິທະຍາສາດ ແລະ ເຕັກໂນໂລຢີ (ສະບັບປັບປຸງ).
ກົດໝາຍວ່າດ້ວຍວິທະຍາສາດ ແລະ ເຕັກໂນໂລຢີ ຖືກປະກາດໃຊ້ເມື່ອປີ 2000, ເວລານັ້ນຫວຽດນາມ ບໍ່ທັນກາຍເປັນສະມາຊິກອົງການການຄ້າໂລກ (WTO). ດັ່ງນັ້ນການປັບປຸງກົດໝາຍແມ່ນພື້ນຖານນິຕິກຳ ເພື່ອແນໃສ່ປະຕິບັດການບຸກທະລຸເຂົ້າຂົງເຂດວິທະຍາສາດ, ເຕັກໂນໂລຢີ ແລະ ທ່ວງທັນກັບທ່າອ່ຽງຂອງໂລກໃນປະຈຸບັນ. ບັນດາສະມາຊິກສະພາແຫ່ງຊາດຖືວ່າ, ຕ້ອງປັບປຸງກົດໝາຍຕາມທິດຖືການພັດທະນາວິທະຍາສາດ, ເຕັກໂນໂລຢີ ແມ່ນກຳລັງໜູນຕົ້ນຕໍ່ເພື່ອພັດທະນາປະເທດຊາດຢ່າງວ່ອງໄວ ແລະ ໝັ້ນຄົງ, ເພື່ອຮອດປີ 2020 ຫວຽດນາມ ກາຍເປັນປະເທດອຸດສາຫະກຳຕາມທິດທັນສະໄໝໂດຍພື້ນຖານ. ຕາມທ່ານ Phung Duc Tien, ສະມາຊິກສະພາແຫ່ງຊາດແຂວງຮ່ານາມ ແລ້ວ, ໃນຮ່າງກົດໝາຍຄວນເອົາໃຈໃສ່ເປັນພິເສດເຖິງວຽກງານບຳລຸງສ້າງຖັນແຖວພະນັກງານວິທະຍາສາດ, ເຕັກໂນໂລຢີ :
”ຄວນຖືບັນດານັກວິທະຍາສາດແມ່ນໃຈກາງຂອງການເຄື່ອນໄຫວວິທະຍາສາດ, ເຕັກໂນໂລຢີ, ບົນພື້ນຖານຍຸດທະສາດຂອງຂະແໜງ, ຂົງເຂດຕ່າງໆ ເພື່ອມີແຜນການບຳລຸງສ້າງແຫຼ່ງຊັບພະຍາກອນມະນຸດວິທະຍາສາດ. ໃນກົດໝາຍຕ້ອງຫັນວຽກງານບຳລຸງສ້າງແຫຼ່ງຊັບພະຍາກອນມະນຸດເປັນລະອຽດ, ບຳລຸງສ້າງຜູ້ມີຄວາມເກັ່ງກ້າສາມາດ ເພື່ອມີຜູ້ຊ່ຽວຊານເກັ່ງຫຼາຍຄົນໃນຂົງເຂດຕ່າງໆເທື່ອລະກ້າວ. ມີນະໂຍບາຍຢ່າງລະອຽດ, ສ້າງເງື່ອນໄຂເຮັດວຽກຢ່າງສະດວກສະບາຍ, ດຶງດູດຜູ້ມີຄວາມສາມາດ, ມີລະບອບຍ້ອງຍໍຊົມເຊີຍ, ເຊີດຊູບັນດານັກວິທະຍາສາດທີ່ມີການປະກອບສ່ວນສຳຄັນທາງດ້ານວິທະຍາສາດ, ເຕັກໂນໂລຢີ. ລະດົມບັນດານັກວິທະຍາສາດ ເຊິ່ງແມ່ນຊາວຫວຽດນາມ ອາໄສຢູ່ຕ່າງປະເທດກັບມາເຮັດວຽກ ເພື່ອປະກອບສ່ວນຮັບໃຊ້ພາລະກິດສ້າງສາປະເທດຊາດ”.
ຕອນເຊົ້າຂອງວັນດຽວກັນ, ສະພາແຫ່ງຊາດຫວຽດນາມ ໄດ້ດຳເນີນການລົງຄະແນນສຽງຮັບຮອງເອົາຮ່າງກົດໝາຍສຳຄັນ 6 ສະບັບຄື: ກົດໝາຍປັບປຸງ ແລະ ເພີ່ມເຕີມບາງຂໍ້ມາດຕາຂອງກົດໝາຍວ່າດ້ວຍທະນາຍຄວາມ; ກົດໝາຍປັບປຸງ ແລະ ເພີ່ມເຕີມບາງຂໍ້ມາດຕາຂອງກົດໝາຍວ່າດ້ວຍໄຟຟ້າ; ກົດໝາຍປັບປຸງ ແລະ ເພີ່ມເຕີມບາງຂໍ້ມາດຕາຂອງກົດໝາຍວ່າດ້ວຍການຄຸ້ມຄອງພາສີອາກອນ; ກົດໝາຍວ່າດ້ວຍການສະສົມແຫ່ງຊາດ; ກົດໝານວ່າດ້ວຍສະຫະກອນ (ສະບັບປັບປຸງ) ແລະ ກົດໝານວ່າດ້ວຍການພິມຈຳໜ່າຍ (ສະບັບປັບປຸງ).