(vovworld)- ວັນທີ 29/5, ສະພາແຫ່ງຊາດ ບຸນກາຣີ ໄດ້ເຫັນດີຮັບຮອງເອົາລັດຖະບານໃຫມ່ໂດຍນັກເສດຖະກິດ Plamen Oresharski ອາຍຸ 53 ປີຜູ້ທີ່ບໍ່ເຂົ້າຮ່ວມພັກຝ່າຍໃດນຳຫນ້າ. ການກະທຳດັ່ງກ່າວໄດ້ຮັບຖືວ່າ ຈະຢຸດຕິສະພາບບໍ່ມີທາງອອກດ້ານການເມືອງທີ່ແກ່ຍາວຫລາຍເດືອນຜ່ານມາຢູ່ປະເທດທຸກຍາກກວ່າໝູ່ໃນສະຫະພາບເອີລົບ(ອີຢູ). ທ່ານ Oresharski ແລະ ສະມາຊິກຄະນະລັດຖະບານຂອງຕົນໄດ້ສາບານຕົວຮັບດຳລົງຕຳແຫນ່ງພາຍຫລັງສະພາແຫ່ງຊາດປ່ອນບັດຮັບຮອງເອົາດ້ວຍບັດສະຫນັບສະຫນູນ 120 ບັດ, ບັດຄ້ານ 97 ບັດ. ກ່າວຄຳເຫັນຕໍ່ສະພາແຫ່ງຊາດ, ທ່ານ Oresharski ຢືນຢັນວ່າ: ບຸລິມະສິດຕົ້ນຕໍຂອງທ່ານແມ່ນຟື້ນຟູບົດບາດທີ່ຕັ້ງຂອງປະເທດຊາດກໍຄືພື້ນຖານເສດຖະກິດ, ຊຸກຍູ້ວິສາຫະກິດ ແລະ ຄວາມສະເຫມີພາບທາງສັງຄົມ. ທ່ານ Oresharski ຮຽກຮ້ອງໃຫ້ປະຊາຊົນເຫັນດີຢ່າງສູງຕໍ່ບັນດາມາດຕະການທີ່ຈຳເປັນ ເພື່ອຮັກສາສະຖຽນລະພາບ ແລະ ຄວາມສາມັກຄີໃນສັງຄົມ, ຟື້ນຟູເສດຖະກິດ, ເພີ່ມທະວີກຳລັງແຮງຂອງບັນດາລະບອບ. ການນຳພັກສັງຄົມ ບຸນກາຣີ, ທ່ານ Sergei Stanishev ຖືວ່າ: ລັດຖະບານຂອງທ່ານ Oresharski ມີນະໂຍບາຍມຸ່ງໄປເຖິງວິສາຫະກິດ ແລະ ປະຊາຊົນ, ຊຸກຍູ້ເສດຖະກິດ, ດຶງດູດການລົງທຶນ, ສ້າງວຽກເຮັດງານທຳ, ເພີ່ມລາຍຮັບ ແລະ ຄຳໝັ້ນສັນຍາຕໍ່ສັງຄົມ.