(ພາບປະກອບ)
(vovworld) - ໂດຍສືບຕໍ່ກອງປະຊຸມສະໄໝສາມັນເທື່ອທີ 5 ສະພາແຫ່ງຊາດຫວຽດນາມ ຊຸດທີ 13, ຕອນເຊົ້າວັນທີ 27/05, ບັນດາສະມາຊິກສະພາແຫ່ງຊາດໄດ້ປຶກສາຫາລືຢູ່ຕາມໜ່ວຍກ່ຽວກັບຮ່າງລັດຖະທຳມະນູນປີ 1992 ສະບັບປັບປຸງ. ປະກອບຄຳເຫັນໃສ່ເນື້ອໃນລະອຽດຮ່າງລັດຖະທຳມະນູນປີ 1992 ສະບັບປັບປຸງ, ສະມາຊິກສະພາແຫ່ງຊາດບາງທ່ານຍົກຄຳເຫັນວ່າ: ຄຳນຳແມ່ນພາກສ່ວນໜຶ່ງທີ່ສຳຄັນຂອງລັດຖະທຳມະນູນແຕ່ລະສະບັບ. ອີງຕາມມູນເຊື້ອຂອງຊາດ, ປະຫວັດແຫ່ງການສ້າງລັດຖະທຳມະນູນຂອງແຕ່ລະປະເທດຄຳນຳໄດ້ຮັບການຮຽບຮຽງດ້ວຍເນື້ອໃນ, ຄວາມຍາວ, ການສະແດງທີ່ແຕກຕ່າງກັນ. ຜ່ານການຄົ້ນຄວ້າລັດຖະທຳມະນູນ 4 ສະບັບຂອງຫວຽດນາມມາຮອດປະຈຸບັນ, ອາດເຫັນໄດ້ວ່າ ຄຳນຳຂອງລັດຖະທຳທະນູນສະບັບຕ່າງໆ ໄດ້ຮັບການສ້າງຂຶ້ນພື້ນຖານສະແດງບັນດາຂີດໝາຍທີ່ເປັນພື້ນຖານປະຫວັດສາດຂອງຊາດ, ປະຫວັດສາດຂອງຊາດພາຍໃຕ້ການຊີ້ນຳ ນຳພາຂອງພັກກອມມູນິດຫວຽດນາມ, ປະຫວັດແຫ່ງການສ້າງລັດຖະທຳມະນູນ, ເນື້ອໃນທີ່ເປັນພື້ນຖານຂອງລັດຖະທຳມະນູນ, ສິດປະກາດລັດຖະທຳມະນູນ. ຮັບເອົາຄຳຄິດຄຳເຫັນຂອງປະຊາຊົນ, ບົນພື້ນຖານການສືບທອດເນື້ອໃນທີ່ເປັນພື້ນຖານຄຳນຳຂອງລັດຖະທຳມະນູນປີ 1992, ບັນດາສະມາຊິກສະພາແຫ່ງຊາດ ຖືວ່າ ຄຳນຳໃນຮ່າງລັດຖະທຳທະນູນໄດ້ຮັບການປັບປຸງໃຫ້ສັ້ນກວ່າ ແລະ ກະທັດລັດກ່ວາ ລວບລວມມູນເຊື້ອປະຫວັດສາດອັນສະຫງ່າລາສີຂອງຊາດ, ການສ້າງຕັ້ງຂອງພັກ ແລະ ລັດຕິດພັນກັບວິວັດການສ້າງສາ ແລະ ປົກປັກຮັກສາປະເທດຊາດ, ກຳນົດແຈ້ງເປົ້າໝາຍກໍ່ສ້າງ, ປະຕິບັດ ແລະ ປົກປ້ອງລັດຖະທຳມະນູນ.