(vovworld) - ໂດຍສືບຕໍ່ກອງປະຊຸມສະໄໝສາມັນເທື່ອທີ 5 ສະພາແຫ່ງຊາດຫວຽດນາມ ຊຸດທີ 13, ຕອນເຊົ້າວັນທີ 25/05, ສະພາແຫ່ງຊາດໄດ້ເຮັດວຽກຢູ່ຫໍປະຊຸມ ເພື່ອຮັບຟັງໃບສະເໜີ ແລະ ບົດລາຍງານກວດກາຮ່າງກົດໝາຍປັບປຸງ, ເພີ່ມເຕີ່ມມາດຕາ 170 ຂອງກົດໝາຍວ່າດ້ວຍວິສາຫະກິດ; ບົດລາຍງານກ່ຽວກັບການເຈລະຈາລົງນາມໃນຂໍ້ຕົກລົງຂັ້ນລັດຖະບານ ໃນການແກ້ໄຂບັນດາຊາວອົບພະຍົບຢ່າງເສລີ ແລະ ການສົມລົດໂດຍບໍ່ຈົດທະບຽນໃນເຂດຊາຍແດນຫວຽດນາມ - ລາວ. ແລະກໍໃນຕອນເຊົ້າວັນດຽວກັນ, ສະພາແຫ່ງຊາດໄດ້ປຶກສາຫາລືກ່ຽວກັບການສະຫລຸບຂາດຕົວງົບປະມານແຫ່ງລັດປີ 2011 ແລະ ປຶກສາຫາລືກ່ຽວກັບບາງເນື້ອໃນທີ່ຍັງມີຄວາມເຫັນແຕກຕ່າງກັນຂອງຮ່າງກົດໝາຍວ່າດ້ວຍວິທະຍາສາດ ແລະ ເຕັກໂນໂລຊີ (ສະບັບປັບປຸງ).
ເມື່ອປຶກສາຫາລືກ່ຽວກັບສະຫລຸບຂາດຕົວງົບປະມານແຫ່ງລັດປີ 2011, ມີຫຼາຍຄຳເຫັນໄດ້ຍົກອອກຈຸດດີ ກໍຄືຈຸດທີ່ຄົງຄ້າງໃນວຽກງານຄຸ້ມຄອງ, ບໍລິຫານງົບປະມານ ແລະ ສະຫລຸບຂາດຕົວງົບປະມານ. ບັນດາສະມາຊິກສະພາແຫ່ງຊາດ ຖືວ່າ ຍັງມີຂໍ້ຄົງຄ້າງຈຳນວນໜຶ່ງໃນວຽກງານຄຸ້ມຄອງ, ບໍລິຫານງົບປະມານແຫ່ງລັດບໍ່ທັນໄດ້ຮັບການແກ້ໄຂຢ່າງເຖິງຖອງ. ວຽກງານຄາດຄະເນຍັງບໍ່ທັນໄດ້ດີ ອັນໄດ້ສົ່ງຜົນທະທ້ອນເຖິງການວາງແຜນງົບປະມານ. ການຊີ້ນຳບໍລິຫານງົບປະມານ, ການຈັດແບ່ງງົບປະມານແຫ່ງລັດຍັງມີຂໍ້ຄົງຄ້າງຕ້ອງໄດ້ຮັບການແກ້ໄຂ...
ກ່ຽວກັບລາຍຈ່າຍງົບປະມານ, ຕາມສະມາຊິກສະພາແຫ່ງຊາດຫຼາຍທ່ານແລ້ວ, ລາຍຈ່າຍງົບປະມານສຳລັບຂົງເຂດວັດທະນະທຳ, ສັງຄົມບໍ່ບັນລຸໄດ້ຕາມແຜນການທີ່ໄດ້ວາງອອກ. ມີບາງຄວາມເຫັນສະເໜີວ່າ ຕ້ອງໄຈ້ແຍກຕື່ມອີກກ່ຽວກັບດ້ານນະໂຍບາຍການເງິນມີການກະທົບຄືແນວໃດເຖິງເສດຖະກິດສັງຄົມນັບທັງໃນໄລຍະກາງ ແລະ ໄລຍະຍາວ.