(ພາບ:ອິນເຕີແນັດ)
(VOV)- ວັນທີ 19/11, ໂດຍໄດ້ສືບຕໍ່ກອງປະຊຸມສະໄໝສາມັນເທື່ອທີ 4, ສະພາແຫ່ງຊາດຫວຽດນາມ ຊຸດທີ 13, ບັນດາສະມາຊິກສະພາແຫ່ງຊາດໄດ້ປຶກສາຫາລືຢູ່ຫໍປະຊຸມກ່ຽວກັບຮ່າງກົດໝາຍວ່າດ້ວຍທີ່ດິນ (ສະບັບປັບປຸງ). ບັນດາ ສສຊ ເຫັນດີເຫັນພ້ອມສູງຕໍ່ຮ່າງກົດໝາຍວ່າດ້ວຍທີ່ດິນ (ສະບັບປັບປຸງ) ຊື່ງກຳນົດວ່າທີ່ດິນຂຶ້ນກັບກຳມະສິດທົ່ວປວງຊົນ ໂດຍລັດເປັນຜູ້ຕາງໜ້າເຈົ້າຂອງກຳມະສິດ, ສູ້ຊົນໃນປີ 2013 ຈະສະໜອງໃບຕາດິນໃຫ້ແກ່ຜູ້ນຳໃຊ້ທີ່ດິນສຳເລັດ. ກ່ຽວກັບການຊົດເຊີຍເມື່ອຖອນທີ່ດິນຄືນຕ້ອງຮັບປະກັນປະຊາທິປະໄຕ, ເປີດເຜີຍ, ພາວະວິໄສ, ຍຸດຕິທຳ, ຕິດແທດກັບສະພາບຕົວຈິງ. ທ່ານ Tran Ngoc Vinh ສສຊ ນະຄອນຫາຍຟອງ ເນັ້ນໜັກວ່າ:
“ກ່ຽວກັບການຊົດເຊີຍ, ໜູນຊ່ວຍ, ຕັ້ງຖິ່ນຖານຄົງທີ່ຄືນໃໝ່ເມື່ອລັດຖອນທີ່ດິນຄືນ, ຕາມຂ້າພະເຈົ້າແລ້ວ, ນີ້ແມ່ນສາຍເຫດພາໄປເຖິງສະພາບການຟ້ອງຮ້ອງທີ່ດິນນັບມື້ນັບເພີ່ມຂຶ້ນ. ສະນັ້ນຕ້ອງປັບປຸງບັນດາຂໍ້ກຳນົດກ່ຽວກັບການຊົດເຊີຍ, ໜູນຊ່ວຍການຕັ້ງຖິ່ນຖານຄົງທີ່ຄືນໃໝ່ຢ່າງຮອບດ້ານເມື່ອລັດໄດ້ຖອນທີ່ດິນຄືນ. ຂ້າພະເຈົ້າສະເໜີໃຫ້ລັດໜູນຊ່ວຍຄ່າໃຊ້ຈ່າຍຕື່ມອີກເພື່ອໃຫ້ຜູ້ຖືກຖອນທີ່ດິນຄືນສ້າງຊີວິດຢູ່ບ່ອນໃໝ່ເປັນປົກກະຕິໂດຍໄວ. ທີສອງແມ່ນຍົກລະດັບຊົດເຊີຍໃຫ້ແກ່ຊາວກະສິກອນຖືກຖອນທີ່ດິນກະສິກຳຄືນ, ພ້ອມກັນນັ້ນລັດຕ້ອງບຳລຸງສ້າງວິຊາຊີບເພື່ອຫັນປ່ຽນອາຊີບໃຫ້ແກ່ຊາວກະສິກອນພາຍຫຼັງຖືກຖອນທີ່ດິນຄືນ, ຄົ້ນຄ້ວາແກ້ໄຂວຽກເຮັດງານທຳໃຫ້ແກ່ຊາວກະສິກອນຖືກຖອນທີ່ດິນຄືນ“
ບາງຄຳເຫັນຖືວ່າ, ການນຳໃຊ້ທີ່ດິນຢູ່ຫຼາຍແຫ່ງຍັງຟູມເຟືອຍຢູ່, ປະສິດທິຜົນຍັງຕໍ່; ການສໍ້ລາດບັງຫຼວງ, ຄວາມຫຍໍ້ທໍ້ໃນຂົງເຂດນີ້ຍັງຫຼາຍຢູ່. ທ່ານນາງ Nguyen Thanh Hai ສະມາຊິກສະພາແຫ່ງຊາດແຂວງຮ່ວາບິ່ງ, ປະກອບຄຳເຫັນວ່າ:
(ພາບ:ອິນເຕີແນັດ)
”ຂ້າພະເຈົ້າສະເໜີວ່າ, ຮ່າງກົດໝາຍຄວນເພີ່ມເຕີ່ມກ່ຽວກັບການປ່ຽນໃໝ່ໂດຍພື້ນຖານສຳຫຼັບຂັ້ນຕອນ ແລະ ການຮັບເອົາຄຳເຫັນປະກອບຂອງນັກວິທະຍາສາດ, ບັນດາຜູ້ຊ່ຽວຊານ ແລະ ມະຫາຊົນເປັນຈຳນວນຫຼວງຫຼາຍ ໃນການວາງແຜນກຳນົດນຳໃຊ້ທີ່ດິນ. ພ້ອມນັ້ນຄວນກຳນົດຕື່ມໃນຮ່າງກົດໝາຍ ກ່ຽວກັບຄູນຄ່າດ້ານກົດໝາຍຂອງການຮັບເອົາຄຳເຫັນຈາກປະຊາຊົນ ກໍ່ຄືຄວາມຮັບຜິດຊອບໃນການຮັບເອົາຄຳເຫັນ, ການອະທິບາຍຕໍ່ປະຊາຊົນກ່ຽວກັບການສ້າງແຜນກຳນົດ, ແຜນການນຳໃຊ້ທີ່ດິນຂອງອົງການຮຽບຮຽງກົດໝາຍ. ຄວນກຳນົດກົນໄກເຈລະຈາ, ການແລກປ່ຽນເປັນປະຈຳລະຫວ່າງອົງການຮຽບຮຽງກົດໝາຍ ກັບຜູ້ປະກອບຄຳເຫັນໃສ່ຮ່າງເອກະສານດ້ານກົດໝາຍໃນຂົງເຂດທີ່ດິນ”