(vovworld) - ໂດຍສືບຕໍ່ໂຄງການດຳເນີນງານຂອງກອງປະຊຸມສະໄໝສາມັນເທື່ອທີ 4 ສະພາແຫ່ງຊາດຫວຽດນາມ ຊຸດທີ 13, ຕອນບ່າຍວັນທີ 15/11, ບັນດາສະມາຊິກສະພາແຫ່ງຊາດ (ສສຊ) ໄດ້ປຶກສາຫາລືກ່ຽວກັບຮ່າງລັດຖະທຳມະນູນສະບັບປັບປຸງ ຂອງລັດຖະທຳມະນູນປີ 1992; ຮ່າງມະຕິກ່ຽວກັບການຮັບເອົາຄຳເຫັນຂອງປະຊາຊົນກ່ຽວກັບຮ່າງລັດຖະທຳມະນູນສະບັບປັບປຸງ ຂອງລັດຖະທຳມະນູນປີ 1992. ລັດຖະທຳມະນູນຂອງ ສສ ຫວຽດນາມ ແມ່ນເອກະສານດ້ານກົດໝາຍມີຄວາມສັກສິດສູງສຸດໃນລະບົບກົດໝາຍຂອງຫວຽດນາມ. ລັດຖະທຳມະນູນພວມມີຜົນສັກສິດແມ່ນສະບັບປີ 1992, ເຊິ່ງໄດ້ຮັບການຮັບຮອງເອົາຈາກກອງປະຊຸມສະໄໝສາມັນເທື່ອທີ 11 ສະພາແຫ່ງຊາດຫວຽດນາມ ຊຸດທີ 8 ແລະ ປະຈຸບັນຕ້ອງໄດ້ຮັບການປັບປຸງເພື່ອແທດເໝາະກັບສະພາບການໃໝ່ຂອງປະເທດຊາດ.
ກ່ຽວກັບລະບອບການເມືອງ, ຮ່າງລັດຖະທຳມະນູນສະບັບປັບປຸງ ໄດ້ຢືນຢັນການນຳພາຢ່າງຮອບດ້ານຂອງພັກກອມມູນິດຫວຽດນາມ ທີ່ມີຕໍ່ລັດ ແລະ ສັງຄົມ ເຊິ່ງປະຊາຊົນໂດຍຜູ້ຕາງໜ້າສູງສຸດແມ່ນສະພາແຫ່ງຊາດຮັບຮອງ ແລະ ຈົດເຂົ້າລັດຖະທຳມະນູນ. ລັດຫວຽດນາມ ແມ່ນລັດແຫ່ງອຳນາດນິຕິບັນຍັດ ສັງຄົມນິຍົມຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ. ຮ່າງລັດຖະທຳມະນູນສະບັບປັບປຸງ ຄັ້ງນີ້ແມ່ນເພື່ອແນໃສ່ເສີມຂະຫຍາຍປັດໃຈມະນຸດ, ຮັບປະກັນການປະຕິບັດສິດເສລີຂອງມະນຸດ, ສິດເສລີໃນການເຫຼື້ອມໄສສາສະໜາ. ສຳລັບທາດແທ້ຂອງພື້ນຖານເສດຖະກິດຂອງປະເທດຊາດ, ຮ່າງລັດຖະທຳມະນູນສະບັບປັບປຸງ ຄັ້ງນີ້ແມ່ນສືບຕໍ່ກໍ່ສ້າງ ແລະ ສຳເລັດລະບົບພື້ນຖານເສດຖະກິດການຕະຫຼາດຕາມກຳນົດທິດສັງຄົມນິຍົມ, ໃນນັ້ນເສດຖະກິດແຫ່ງລັດມີບົດບາດສຳຄັນ. ເພີ່ມສິດໃຫ້ແກ່ທ່ານປະທານປະເທດ ກໍແມ່ນໜຶ່ງໃນບັນດາເນື້ອໃນສຳຄັນໃນຮ່າງລັດຖະທຳມະນູນ. ຕາມທ່ານ Trieu La Pham, ສສຊ ແຂວງຮ່າຢາງ ແລ້ວ, ໃນສະພາບການປະຈຸບັນ, ຮ່າງລັດຖະທຳມະນູນສະບັບປັບປຸງຄັ້ງນີ້ແມ່ນຍົກສູງທີ່ຕັ້ງ, ບົດບາດຂອງທະເລ, ໝູ່ເກາະຂອງປະເທດຊາດ. ທ່ານ Trieu La Pham ກ່າວວ່າ.
“ຂ້າພະເຈົ້າສະເໜີໃຫ້ສະພາແຫ່ງຊາດ ເພີ່ມເຕີມຂໍ້ມາດຕາຕ່າງຫາກ ເພື່ອກຳນົດຊັບພະຍາກອນທະເລ, ໝູ່ເກາະ ເພາະ ຫວຽດນາມ ແມ່ນປະເທດມີທະເລກວ້າງໃຫຍ່, ມີຊັບພະຍາກອນອຸດົມສົມບຸນ ແລະ ຫຼາຍຮູບຫຼາຍສີ ດ້ວຍປະລິມານທີ່ໃຫຍ່ຫຼວງ, ສາມາດໃຫ້ການພັດທະນາຫຼາຍຂົງເຂດທີ່ສຳຄັນ, ປະກອບສ່ວນອັນໃຫຍ່ຫຼວງໃຫ້ແກ່ພື້ນຖານເສດຖະກິດແຫ່ງຊາດ. ລັດຖະທຳມະນຸນ ແລະ ກົດໝາຍ ຕ້ອງໄດ້ຮັບປະກັນການຂຸດຄົ້ນເຂດເສດຖະກິດທະເລຢ່າງມີປະສິດທິຜົນ , ປົກປັກຮັກສາສິ່ງແວດລ້ອມທະເລ, ວາງແຜນກຳນົດ, ຂຸດຄົ້ນຕາມຂັ້ນຕອນແຫຼ່ງຊັບພະຍາກອນທະເລ, ໃຫ້ບຸລິມະສິດພັດທະນາເສດຖະກິດຕິດພັນກັບການປ້ອງກັນຊາດ ປ້ອງກັນຄວາມສະຫງົບ ກໍຄືອະທິປະໄຕເຂດທະເລ, ໝູ່ເກາະ”.
ແລະກໍໃນຕອນເຊົ້າຂອງວັນດຽວກັນ, ສະພາແຫ່ງຊາດປຶກສາຫາລືກ່ຽວກັບຮ່າງກົດໝາຍວ່າດ້ວຍການປັບປຸງ, ເພີ່ມເຕີມບາງຂໍ້ມາດຕາຂອງກົດໝາຍວ່າດ້ວຍອາກອນລາຍຮັບສ່ວນບຸກຄົນ. ຄຳເຫັນຂອງ ສສຊ ສ່ວນຫລາຍເຫັນດີ ແລະ ເປັນເອກະພາບສູງກ່ຽວກັບລະດັບເງິນເດືອນທີ່ຕອ້ງເສຍອາກອນ ແຕ່ 4 ລ້ານປະຈຸບັນ ຂຶ້ນເຖິງ 9 ລ້ານດົ່ງ, ຍົກລະດັບຈຳນວນເງິນທີ່ໄດ້ຮັບການຫລຸດຜ່ອນສຳລັບຜູ້ທີ່ຕ້ອງລ້ຽງ ລູກເຕົ້າ ຫລືພໍ່ແມ່ ແຕ່ 1,6 ດົ່ງ ຂຶ້ນເຖິງ 3,6 ດົ່ງ/ຄົນ, ແມ່ນເໝາະສົມກັບສະພາບຕົວຈິງ. ເພາະວ່າ ໃນສະພາບເສດຖະກິດປະຈຸບັນພວມປະສົບກັບຄວາມຫຍຸ້ງຍາກ ຄວນສ້າງເງື່ອນໄຂແບ່ງປັນຄວາມຫຍຸ້ງຍາກໃຫ້ແກ່ປະຊາຊົນ ເພື່ອສົ່ງເສີມການອອກແຮງງານ, ການໃຊ້ສອຍ. ກ່ຽວກັບຈຸດເວລາປະຕິບັດກົດໝາຍ, ຄຳເຫັນສ່ວນຫລາຍແມ່ນເອກະພາບກັບຂໍ້ສະເຫນີຂອງລັດຖະບານກ່ຽວກັບ ຈຸດເວລາມີຜົນບັງຄັບໃຊ້ໃນການປະຕິບັດກົດໝາຍ (ນັບແຕ່ 1/7/2013) ເປັນຕົ້ນໄປ ເພື່ອຮັບປະກັນໄລຍະເວລາຈຳເປັນເພື່ອໃຫ້ລັດຖະບານຜັນຂະຫຍາຍການສ້າງ ແລະ ປະກາດໃຊ້ເອກະສານແນະນຳການປະຕິບັດກົດໝາຍ.
ກ່ອນໜ້ານັ້ນ, ສະພາແຫ່ງຊາດໄດ້ຮັບຮອງເອົາມະຕິສຳຄັນສອງສະບັບສຳຄັນ. ນັ້ນແມ່ນມະຕິ ກ່ຽວກັບການຈັດແບ່ງງົບປະມານສູນກາງປີ 2013 ແລະ ມະຕິກ່ຽວກັບໂຄງການເຄື່ອນໄຫວຕິດຕາມກວດກາຂອງສະພາແຫ່ງຊາດປີ 2013. ໂດຍລະອຽດ ແມ່ນຍອດລາຍຮັບໃນການດຸນດຽງງົບປະມານສູນກາງປີ 2013.