ສສຊ ປຶກສາຫາລືກ່ຽວກັບການປ້ອງກັນ, ຕ້ານການສໍ້ລາດບັງຫຼວງ
(ພາບ: google.com.vn)
(vovworld) - ຕອນບ່າຍວັນທີ 2/11, ກອງປະຊຸມສະໄຫມສາມັນເທື່ອທີ 4 ສະພາແຫ່ງຊາດຫວຽດນາມຊຸດທີ 13 ໄດ້ປຶກສາຫາລືຢູ່ຕາມຫນ່ວຍກ່ຽວກັບຮ່າງກົດໝາຍປ້ອງກັນ ແລະ ຕ້ານການສໍ້ລາດບັງຫລວງ (ສະບັບປັບປຸງ). ຮ່າງກົດໝາຍປ້ອງກັນ ແລະ ຕ້ານການສໍ້ລາດບັງຫລວງ (ສະບັບປັບປຸງ ) ຄັ້ງນີ້ແມ່ນສຸມໃສ່ປັບປຸງ, ເພີ່ມເຕີມການກຳນົດກ່ຽວກັບການເປີດເຜີຍໝາກຜົນແຈ້ງຊັບສົມບັດ, ລາຍຮັບຢູ່ສະຖານທີ່ເຮັດວຽກ ແລະ ບ່ອນຢູ່ອາໄສ. ກ່ຽວກັບຮູບແບບຄະນະຊີ້ນຳສູນກາງກ່ຽວກັບການປ້ອງກັນ ແລະ ຕ້ານການສໍ້ລາດບັງຫລວງ, ທ່ານ Huynh Ngoc Son, ສສຊ ນະຄອນ Da Nang ປະກອບຄຳເຫັນວ່າ:
“ມະຕິສູນກາງພັກຄັ້ງທີ 5 ໄດ້ຢືນຢັນວ່າ: ຄະນະຊີ້ນຳສູນກາງກ່ຽວກັບການປ້ອງກັນ ແລະ ຕ້ານການສໍ້ລາດບັງຫລວງ ແມ່ນຍ້າຍໄປສູ່ກົມການເມືອງ ໂດຍແມ່ນທ່ານເລຂາທິການໃຫຍ່ເປັນຫົວຫນ້າຄະນະ. ສ່ວນຄະນະຊີ້ນຳຂັ້ນແຂວງ, ນະຄອນ ບໍ່ຄົງຕົວອີກ. ຂ້າພະເຈົ້າສະຫນັບສະຫນູນຕໍ່ເລື່ອງຍ້າຍຄະນະຊີ້ນຳສູນກາງກ່ຽວກັບການປ້ອງກັນ ແລະ ຕ້ານການສໍ້ລາດບັງຫລວງມາໃຫ້ພັກຮັບຜິດຊອບ.”
ກ່ອນຫນ້ານັ້ນ, ຕອນເຊົ້າວັນດຽວກັນສະມາຊິກສະພາແຫ່ງຊາດ (ສສຊ)ສືບຕໍ່ປຶກສາຫາລືວຽກງານປ້ອງກັນ, ຕ້ານການລະເມີດກົດໝາຍ ແລະ ອາດຊະຍາກຳ; ວຽກງານປ້ອງກັນ, ຕ້ານການສໍ້ລາດບັງຫຼວງປີ 2012.
ບັນດາ ສສຊ ຖືວ່າ ຄວນເພີ່ມທະວີການໂຄສະນາສຶກສາ, ເສີມຂະຫຍາຍກຳລັງແຮງສັງລວມຂອງທົ່ວລະບົບການເມືອງ, ສັງຄົມ ແລະ ປະຊາຊົນທຸກຊັ້ນວັນນະເຂົ້າຮ່ວມຂະບວນການສະກັດກັ້ນ, ຄົ້ນພົບ, ຕໍ່ສູ້ກັບກັບອາດຊະຍາກຳ, ໄພສັງຄົມທຸກປະເພດ…
ສຳລັບວຽກງານປ້ອງກັນ, ຕ້ານການສໍ້ລາດບັງຫຼວງ, ກ່ອນອື່ນໝົດຕ້ອງສືບຕໍ່ຍູ້ແຮງການປະຕິຮູບລະບຽບການບໍລິຫານ, ເພີ່ມທະວີ, ເພີ່ມເຕີມບັນດາມາດຕະການ, ຂໍ້ກຳນົດທີ່ມີລັກສະນະສັ່ງສອນຂົ່ມຂູ່ຢ່າງພຽງພໍ ກໍ່ຄືເພີ່ມທະວີບັນດາມາດຕະການປ້ອງກັນຜູ້ທີ່ໄດ້ກ່າວຟ້ອງກໍລະນີສໍ້ລາດບັງຫຼວງ. ຕາມທ່ານ Truong Trong Nghia ສສຊ ນະຄອນ ໂຮ່ຈີມິນ ແລ້ວ, ການປ້ອງກັນ ແລະ ຕ້ານການສໍ້ລາດບັງຫຼວງຕ້ອງເອົາໃຈໃສ່ເປັນພິເສດເຖິງຄຸນນະທາດດ້ານການເມືອງ, ຄຸນສົມບັດຂອງຜູ້ທີ່ດຳລົງຕຳແໜ່ງສຳຄັນໃນກົງຈັກບໍລິຫານຂອງລັດ
”ຖ້າຫາກຫົວໜ້າມີຄຸນນະທາດການເມືອງ, ຄຸນສົມບັດດີ ເຂົາເຈົ້າຈະຕ້ານການສໍ້ລາດບັງຫຼວງຢ່າງເດັດຂາດ. ເມື່ອມີຄວາມເດັດດຽວໃນການຕ້ານການສໍ້ລາດບັງຫຼວງແລ້ວ, ເຂົາເຈົ້າຈະເຕົ້າໂຮມບັນດາພະນັກງານທີ່ມີຄຸນນະທາດການເມືອງ, ຄຸນສົມບັດດີເພື່ອພ້ອມກັບຕົນຕ້ານການສໍ້ລາດບັງຫຼວງ. ນີ້ແມ່ນປັດໃຈຕັດສິນຊີ້ຂາດ. ເມື່ອເຮັດສິ່ງດັ່ງກ່າວບໍ່ໄດ້, ຈະບໍ່ໄດ້ຮັບຄວາມໄວ້ເນື້ອເຊື່ອໃຈຈາກປະຊາຊົນໃນການປ້ອງກັນ, ຕ້ານການສໍ້ລາດບັງຫຼວງ”