(vovworld) - ໂດຍສືບຕໍ່ກອງປະຊຸມສະໄໝສາມັນເທື່ອທີ 6 ສະພາແຫ່ງຊາດຫວຽດນາມ ຊຸດທີ 13, ວັນທີ 08 ພະຈິກ, ສະພາແຫ່ງຊາດໄດ້ຈັດກອງປະຊຸມຄົບຄະນະທີ່ຫໍປະຊຸມ ແລະ ໄດ້ສະຫງວນເວລາມື້ໜຶ່ງເພື່ອຮັບຟັງບົດລາຍງານຂອງຄະປະຈຳສະພາແຫ່ງຊາດ ກ່ຽວກັບໝາກຜົນແຫ່ງການຕິດຕາມການປະຕິບັດນະໂຍບາຍ, ກົດໝາຍປະກັນສຸຂະພາບໄລຍະ 2009 – 2012 ແລະ ປຶກສາຫາລືກ່ຽວກັບການປະຕິບັດນະໂຍບາຍ, ກົດໝາຍປະກັນສຸຂະພາບໄລຍະ 2009 – 2012.
ຕາມບົດລາຍງານຂອງຄະນະປະຈຳສະພາແຫ່ງຊາດແລ້ວ, ຮອດປີ 2012 ຈຳນວນຜູ້ເຂົ້າຮ່ວມປະກັນສຸຂະພາບແມ່ນ 59,3 ລ້ານຄົນ, ເພີ່ມຂຶ້ນ 9 ລ້ານຄົນເມື່ອທຽບໃສ່ປີ 2009, ບັນລຸລະດັບ 67% ຈຳນວນພົນລະເມືອງ. ນີ້ແມ່ນຄວາມມານະພະຍາຍາມທີ່ໃຫຍ່ຫຼວງຂອງພັກ, ລັດ ແລະ ປະຊາຊົນໃນການປຸກລະດົມການປະກອບສ່ວນຂອງໝູ່ຄະນະ, ສ່ວນບຸກຄົນ, ມະຫາຊົນ ແລະ ວົງຄະນະຍາດ ເພື່ອເບິ່ງແຍງດູແລສຸຂະພາບ, ກວດ, ປິ່ນປົວພະຍາດໃຫ້ແກ່ປະຊາຊົນ. ສິດຂອງຜູ້ເຂົ້າຮ່ວມການປະກັນສຸຂະພາບໄດ້ເປີດກວ້າງ ແລະ ໄດ້ຮັບການຮັບປະກັນ, ວຽກງານຈັດຕັ້ງການກວດ, ປິ່ນປົວພະຍາດ ແລະ ຄ້າໃຊ້ຈ່າຍໃຫ້ແກ່ການກວດ, ປິ່ນປົວພະຍາດດ້ວຍບັດປະກັນສຸຂະພາບໄດ້ຮັບການປັບປຸງດີພໍສົມຄວນກ່ຽວກັບຂັ້ນຕອນ, ລະບຽບການ, ໃນການກວດ ແລະ ປິ່ນປົວພະຍາດ. ຜູ້ທຸກຍາກ ແລະ ບັນດາເປົ້າໝາຍນະໂຍບາຍສັງຄົມ, ຜູ້ມີຄຸນງາມຄວາມດີ, ເດັກໃນເກັ່ນອາຍຸຕໍ່າກວ່າ 6 ປີໄດ້ຮັບຄວາມເອົາໃຈໃສ່ໃນການຊົມໃຊ້ບັນດາການບໍລິການສາທາລະນະສຸກຕາມຂໍ້ກຳນົດຂອງກົດໝາຍ. ແຕ່ວ່າ, ມາຮອດປະຈຸບັນ, ການເຂົ້າຮ່ວມປະກັນສຸຂະພາບຂອງກຸ່ມເຂົ້າຮ່ວມປະກັນສຸຂະພາບໂດຍສະໝັກໃຈຍັງຢູ່ໃນລະດັບຕໍ່າ. ປະຈຸບັນຍັງມີ 18 ແຂວງ ມີຈຳນວນຜູ້ເຂົ້າຮ່ວມປະກັນສຸຂະພາບຕໍ່າກວ່າ 60%. ທ່ານນາງ ຫງວຽນທູແອງ, ສະມາຊິກສະພາແຫ່ງຊາດແຂວງ ເລີມດົ່ງ ໃຫ້ຂ້ໍສະເໜີວ່າ.
“ສຳລັບສະພາແຫ່ງຊາດ, ຂ້າພະເຈົ້າສະເໜີສືບຕໍ່ເພີ່ມງົບປະມານໃຫ້ແກ່ຂົງເຂດສາທາລະນະສຸກ ເພື່ອປະຕິບັດການເບິ່ງແຍງດູແລໃຫ້ແກ່ປະຊາຊົນຢ່າງມີຍຸຕິທຳ ແລະ ມີປະສິດທິຜົນກວ່າ. ສຳລັບລັດຖະບານ, ໃນຊຸມປີຜ່ານມາ, ລັດຖະບານໄດ້ເອົາໃຈໃສ່ລົງທຶນໃຫ້ຂົງເຂດສາທາລະນະສຸກ ແຕ່ຄວາມຈິງການລົງທຶນດ້ານສາທາລະນະສຸກຍັງຕໍ່າຢູ່, ຍັງບໍ່ທັນຕອບສະໜອງໄດ້ຄວາມຕ້ອງການເພື່ອກໍ່ສ້າງບັນດາໂຮງໝໍ, ຄວາມຕ້ອງການການແພດປ້ອງກັນ, ສະນັ້ນສະເໜີຕໍ່ລັດຖະບານເພີ່ມລາຍຈ່າຍງົບປະມານລົງທຶນໃຫ້ແກ່ສາທາລະນະສຸກ ເພື່ອຕອບສະໜອງຄວາມຮຽກຮ້ອງຕ້ອງການກວດ, ປິ່ນປົວພະຍາດໃຫ້ປະຊາຊົນ”.