ສະພາແຫ່ງຊາດປຶກສາຫາລືກ່ຽວກັບບັນດາຮ່າງກົດໝາຍກ່ຽວຂ້ອງເຖິງໄອຍະການປະຊາຊົນ,ສານປະຊາຊົນ
(ກອງປະຊຸມສະໄໝສາມັນເທື່ອທີ 8, ສະພາແຫ່ງຊາດຫວຽດນາມຊຸດທີ 13)
(vovworld) – ວັນທີ 27/10, ກອງປະຊຸມສະໄໝສາມັນເທື່ອທີ 8, ສະພາແຫ່ງຊາດຫວຽດນາມຊຸດທີ 13 ໄດ້ກ້າວເຂົ້າສູ່ອາທິດເຮັດວຽກທີ 2.
ຕອນບ່າຍວັນທີ 27/10, ສືບຕໍ່ກອງປະຊຸມສະໄຫມເທື່ອທີ 8 ສະພາແຫ່ງຊາດຫວຽດນາມ ຊຸດທີ 13, ສະພາແຫ່ງຊາດ ໄດ້ຮັບຟັງ ທ່ານ ຫງວຽນວັນຫ້ຽນ, ກຳມະການຄະນະປະຈຳສະພາແຫ່ງຊາດ, ຫົວຫນ້າກຳມາທິການຍຸຕິທຳຂອງສະພາແຫ່ງຊາດ ສະເຫນີບົດລາຍງານຮັບເອົາ, ປັບປຸງຮ່າງກົດໝາຍວ່າດ້ວຍການຈັດຕັ້ງໄອຍະການປະຊາຊົນ (ສະບັບປັບປຸງ). ແລະກໍໃນຕອນບ່າຍວັນດຽວກັນ, ສະພາແຫ່ງຊາດປຶກສາຫາລືບາງເນື້ອໃນທີ່ຍັງມີຄຳເຫັນແຕກຕ່າງກັນຂອງຮ່າງກົດໝາຍວ່າດ້ວຍການຈັດຕັ້ງໄອຍະການປະຊາຊົນ (ສະບັບປັບປຸງ). ກ່ອນຫນ້ານັ້ນ ໃນຕອນເຊົ້າວັນດຽວກັນ, ສະພາແຫ່ງຊາດ ໄດ້ຈັດວາລະປະຊຸມຄົບຄະນະເພື່ອປຶກສາຫາລືກ່ຽວກັບບາງເນື້ອໃນທີ່ຍັງມີຄຳເຫັນແຕກຕ່າງກັນຂອງຮ່າງກົດໝາຍວ່າດ້ວຍການຈັດຕັ້ງສານປະຊາຊົນ (ສະບັບປັບປຸງ). ຄຳເຫັນຂອງສະມາຊິກສະພາແຫ່ງຊາດ ສ່ວນຫລາຍແມ່ນເຫັນດີກັບບັນດາການນຳນົດວ່າ: ສານປະຊາຊົນມີຫນ້າທີ່ປົກປ້ອງຍຸຕິທຳ, ຮັບປະກັນສິດທິມະນຸດ, ສິດພົນລະເມືອງ, ປົກປັກຮັກສາລະບອບສັງຄົມນິຍົມ, ປົກປ້ອງຜົນປະໂຫຍດຂອງລັດ, ສິດ ແລະ ຜົນປະໂຫຍດອັນຊອບທຳຂອງອົງການຈັດຕັ້ງ, ສ່ວນບຸກຄົນ. ນອກນັ້ນ ສະພາແຫ່ງຊາດ ຮັບຟັງບົດສະເຫນີ ແລະ ບົດລາຍງານການກວດກາຮ່າງປະມວນກົດໝາຍແພ່ງ(ສະບັບປັບປຸງ).
ໃນອາທິດ, ສະພາແຫ່ງຊາດໄດ້ສະຫງວນເວລາສ່ວນຫຼາຍໃຫ້ແກ່ວຽກງານຕິດຕາມກວດກາ ແລະ ຕົກລົງບັນດາບັນຫາສຳຄັນ. ສະພາແຫ່ງຊາດໄດ້ປຶກສາຫາລືບັນດາເນື້ອໃນຄື: ສະພາບເສດຖະກິດ - ສັງຄົມປີ 2014 ແລະ ໜ້າທີ່ປີ 2015; ໝາກຜົນການປະຕິບັດງົບປະມານຂອງລັດປີ 2014; ວາງແຜນງົບປະມານແຫ່ງລັດ ແລະ ມາດຕະການຈັດແບ່ງງົບປະມານສູນກາງປີ 2015. ກໍ່ໃນອາທິດນີ້, ສະພາແຫ່ງຊາດສືບຕໍ່ເຮັດວຽກກ່ຽວກັບວຽກງານສ້າງບັນດາແຜນຮ່າງ, ຮ່າງກົດໝາຍ: ກົດໝາຍປະກາດໃຊ້ເອກະສານນິຕິກຳ; ກົດໝາຍວ່າດ້ວຍສຳມະໂນພົນລະເມືອງ; ກົດໝາຍວ່າດ້ວຍບັດປະຈຳຕົວພົນລະເມືອງ; ກົດໝາຍວ່າດ້ວຍການບິນພົນລະເຮືອນຫວຽດນາມ; ຮ່າງກົດໝາຍວ່າດ້ວຍງົບປະມານສະບັບປັບປຸງ.