ສະພາແຫ່ງຊາດປຶກສາຫາລືກ່ຽວກັບບັນດາຮ່າງກົດໝາຍວ່າດ້ວຍພາສີ
ສະມາຊິກສະພາແຫ່ງຊາດ ຫວຽດນາມ ໄດ້ປຶກສາຫາລື
ກ່ຽວກັບຮ່າງກົດໝາຍວ່າດ້ວຍພາສີສົ່ງອອກ, ພາສີນຳເຂົ້າ
(ພາບ: ອິນເຕີແນດ)
(vovworld) – ຕອນບ່າຍວັນທີ 29/10, ບັນດາສະມາຊິກສະພາແຫ່ງຊາດ ຫວຽດນາມ ໄດ້ປຶກສາຫາລືກ່ຽວກັບຮ່າງກົດໝາຍວ່າດ້ວຍພາສີສົ່ງອອກ, ພາສີນຳເຂົ້າ (ສະບັບປັບປຸງ), ຮ່າງກົດໝາຍສະບັບປັບປຸງ, ເພີ່ມເຕີມບາງມາດຕາຂອງກົດໝາຍວ່າດ້ວຍພາສີມູນຄ່າເພີ່ມ, ກົດໝາຍວ່າດ້ວຍພາສີໃຊ້ສອຍພິເສດ ແລະ ກົດໝາຍວ່າດ້ວຍການຄຸ້ມຄອງພາສີ. ປຶກສາຫາລືກ່ຽວກັບຮ່າງກົດໝາຍວ່າດ້ວຍພາສີສົ່ງອອກ ພາສີນຳເຂົ້າ (ສະບັບປັບປຸງ), ບັນດາສະມາຊິກສະພາແຫ່ງຊາດ ເຫັນດີຈຳເປັນຕ້ອງປັບປຸງ, ເພີ່ມເຕີມກົດໝາຍວ່າດ້ວຍພາສິສົ່ງອອກ - ນຳເຂົ້າ ແນໃສ່ຕອບສະໜອງຄວາມຮຽກຮ້ອງຕ້ອງການຫັນບັນດາຄຳໝັ້ນສັນຍາສາກົນເປັນກົດໝາຍພາຍໃນ. ພ້ອມທັງ, ຕອບສະໜອງຄວາມຕ້ອງການປະຕິຮູບດ້ານບໍລິຫານ ແລະ ປະຕິຮູບລະບົບພາສີ, ອາກອນ; ສ້າງສະພາບແວດລ້ອມນິຕິກຳ, ລະບຽບການບໍລິຫານທີ່ງ່າຍດາຍ, ສະດວກໃຫ້ແກ່ເປົ້າໝາຍປະຕິບັດກົດໝາຍ ແລະ ປະກອບສ່ວນປະຕິບັດວຽກງານຄຸ້ມຄອງພາສີເປັນຢ່າງດີ. ບັນດາສະມາຊິກສະພາແຫ່ງຊາດໄດ້ສຸມໃສ່ໃຫ້ຄວາມເຫັນກ່ຽວກັບໝວດບັນຫາປັບປຸງລວມມີ: ສົ່ງເສີມການພັດທະນາ ແລະ ປົກປ້ອງຢ່າງເໝາະສົມໃນການຜະລິດດຳເນີນທຸລະກິດພາຍໃນປະເທດ ໃຫ້ສອດຄ່ອງກັບທິດທາງພັດທະນາຂອງພັກ, ລັດ ແລະ ບັນດາຄຳໝັ້ນສັນຍາສາກົນທີ່ໄດ້ຮັບການລົງນາມ; ຂໍ້ກຳນົດກ່ຽວກັບພາສີຕ້ານການຂາຍບຸບລາຄາ, ຕ້ານເງິນອຸດໜູນ...ກ່ຽວກັບຮ່າງກົດໝາຍປັບປຸງ ເພີ່ມເຕີມບາງມາດຕາຂອງບັນດາກົດໝາຍວ່າດ້ວຍພາສີ, ບັນດາຄວາມເຫັນປະກອບສຸມໃສ່ຂໍ້ກຳນົດຕ່າງໆ ເພື່ອແນໃສ່ປັບປຸງສະພາບແວດລ້ອມແຫ່ງການດຳເນີນທຸລະກິດ.