(vovworld) – ວັນທີ 8/6, ຢູ່ ຮ່າໂນ້ຍ, ບັນດາສະມາຊິກສະພາແຫ່ງຊາດ (ສສຊ) ເຂົ້າຮ່ວມກອງປະຊຸມສະໄໝສາມັນເທື່ອທີ 9, ສະພາແຫ່ງຊາດຊຸດທີ 13 ໄດ້ປຶກສາຫາລືຢູ່ຫໍປະຊຸມກ່ຽວກັບການຕີລາຄາເພີ່ມເຕີມໝາກຜົນແຫ່ງການປະຕິບັດແຜນການພັດທະນາເສດຖະກິດ - ສັງຄົມ ແລະ ງົບປະມານແຫ່ງລັດປີ 2014, ສະພາບການປະຕິບັດແຜນການພັດທະນາເສດຖະກິດ - ສັງຄົມ ແລະ ງົບປະມານແຫ່ງລັດຊຸມເດືອນຕົ້ນປີ 2015.
ບັນດາຄຳເຫັນລ້ວນແຕ່ຮັບຮູ້ ແລະ ຕີລາຄາສູງທ່າຟື້ນຟູຂອງພື້ນຖານເສດຖະກິດໃນປີ 2014 ແລະ ຊຸມເດືອນຕົ້ນປີ 2015.
ເພື່ອປະຕິບັດສຳເລັດໜ້າທີ່ຄາດໝາຍເສດຖະກິດ - ສັງຄົມຊຸມເດືອນຕົ້ນປີ 2015, ບັນດາຜູ້ແທນສະເໜີບັນດາມາດຕະການສຸມໃສ່ສ້າງໂຄງປະກອບພື້ນຖານເສດຖະກິດຄືນໃໝ່ຕິດພັນກັບຮູບແບບການເຕີບໂຕ. ໃນນັ້ນ, ກ່ອນອື່ນໝົດແມ່ນປະຕິບັດການສ້າງໂຄງປະກອບລັດວິສາຫະກິດຄືນໃໝ່ ແລະ ສ້າງໂຄງປະກອບການລົງທຶນແຫ່ງລັດ. ທ່ານ ຫງວຽນກາວເຊີນ, ສສຊ ແຂວງ ຮ່ວາບີ່ງ, ປະກອບຄຳເຫັນວ່າ:
“ລັດຖະບານຕ້ອງເດັດດຽວປະຕິບັດບັນດາມາດຕະການສ້າງໂຄງປະກອບວິສາຫະກິດຄືນໃໝ່ຢ່າງຄົບຊຸດ, ລັດກວດກາ, ເພີ່ມເຕີມວິສາຫະກິດຕ້ອງຫັນເປັນຫຸ້ນສ່ວນ… ສະເໜີໃຫ້ລັດຖະບານຍື່ນສະເໜີຕໍ່ສະພາແຫ່ງຊາດອະນຸຍາດໃຫ້ຈຳໜ່າຍພັນທະບັດລັດຖະບານໄລຍະ 2016 – 2020 ເພື່ອແນໃສ່ເພີ່ມທະວີບັນດາແຫຼ່ງກຳລັງໃຫ້ແກ່ການລົງທຶນພັດທະນາ, ໃນນັ້ນບຸລິມະສິດບັນດາກິດຈະກຳຄົມມະນາຄົມ.”
ບັນດາ ສສຊ ກໍ່ສະເໜີຕໍ່ສະພາແຫ່ງຊາດ, ລັດຖະບານສືບຕໍ່ປັບປຸງສະພາບແວດລ້ອມແຫ່ງການລົງທຶນ, ແກ້ໄຂຄວາມຫຍຸ້ງຍາກໃຫ້ແກ່ການຜະລິດ, ດຳເນີນທຸລະກິດ. ທ່ານນາງ ເລທິກົງ, ສສຊ ແຂວງ ບ່າເຮ້ຍ - ຫວູງເຕົ່າ, ຖືວ່າ:
“ຈຸດໝາຍຕົ້ນຕໍຂອງນະໂຍບາຍເສດຖະກິດປີ 2015 ແລະ ຊຸມປີຕໍ່ໄປແມ່ນຍົກສູງຄຸນນະພາບການເຕີບໂຕ, ປ່ຽນໃໝ່ຮູບແບບການເຕີບໂຕໂດຍອີງໃສ່ສະມັດຕະພາບ ແລະ ປະສິດທິຜົນ, ຍົກສູງກຳລັງຄວາມສາມາດແກ່ງແຍ້ງ. ດັ່ງນັ້ນຕ້ອງເສີມຂະຫຍາຍກຳລັງແຮງພຸມປັນຍາຂອງມະນຸດ, ຮັບປະກັນແຫຼ່ງຊັບພະຍາກອນມະນຸດ ແລະ ປະຕິບັດນະໂຍບາຍເປັນຢ່າງດີ, ຍົກສູງກຳລັງຄວາມສາມາດ ແລະ ຄຸນນະທາດຖັນແຖວພະນັກງານ, ຄຸ້ມຄອງລັດ.”
ເມື່ອສະຫລຸບວາລະປະຊຸມໃນວັນທີ 8/6, ທ່ານຮອງປະທານສະພາແຫ່ງຊາດ ຫງວຽນທິກິມເງິນ ສະເໜີໃຫ້ລັດຖະບານມານະພະຍາຍາມ, ເສີມຂະຫຍາຍມາດຕະການວາງອອກເພື່ອປະຕິບັດໜ້າທີ່ເສດຖະກິດ - ສັງຄົມຊຸມເດືອນຍັງເຫຼືອຂອງປີ 2015 ໃຫ້ບັນລຸຜົນສຳເລັດ. ທ່ານນາງຮອງປະທານສະພາແຫ່ງຊາດຫວຽດນາມ ຫງວຽນທິກິມເງິນ ກ່າວວ່າ :
“ ສະພາແຫ່ງຊາດສະເໜີລັດຖະບານຄົ້ນຄ້ວາ 5 ໝວດມາດຕະການ. ທີ 1 ແມ່ນກຸ່ມບັນດາບັນຫາກ່ຽວກັບກະສີກຳ, ຊາວກະສີກອນ, ຊົນນະບົດ. ທີ 2 ແມ່ນກ່ຽວກັບການໜູນຊ່ວຍສັງຄົມ, ວັດທະນະທຳ, ສຶກສາ, ວິທະຍາສາດ, ເຕັກໂນໂລຢີ ແລະ ສິ່ງແວດລ້ອມ. ກຸ່ມທີ 3 ແມ່ນບັນດາບັນຫາກ່ຽວກັບເສດຖະກິດ, ການເງິນ, ງົບປະມານ… ສະພາແຫ່ງຊາດຈະຕິດຕາມ,ກວດກາ ແລະ ຮ່ວມເດີນທາງກັບລັດຖະບານເພື່ອປະຕິບັດໜ້າທີ່ພັດທະນາເສດຖະກິດ-ສັງຄົມ ແລະ ງົບປະມານແຫ່ງລັດປີ 2015 ”