ຜູ້ວ່າການທະນາຄານແຫ່ງລັດຫວຽດນາມ Nguyen Van Binh
(ພາບ:vneconomy.vn)
(VOV): ສືບຕໍ່ການເຮັດວຽກມື້ທີ 2 ຂອງວາລະຊັກຖາມ ແລະ ຕອບຄຳຊັກຖາມຂອງບັນດາສະມາຊິກສະພາແຫ່ງຊາດທີ່ກອງປະຊຸມສະໄຫມ ສາມັນເທື່ອທີ 4 ສະພາແຫ່ງຊາດ ຫວຽດນາມ ຊຸດທີ 13, ວັນທີ 13/11 ທ່ານນາງ Nguyen Thi Kim Tien ລັດຖະມົນຕີກະຊວງສາທາລະນະສຸກ ຫວຽດນາມ ໄດ້ຕອບຄຳຊັກຖາມກ່ຽວກັບບັນຫາ: ລາຄາຢຸກຢາ, ການຂາດດຸນທາງເພດຢູ່ໃນລະດັບສູງ, ຄ່າປິ່ນປົວພະຍາດ ແລະ ຄຸນນະພາບຂອງຂະແຫນງສາທາລະນະສຸກ, ການຄຸ້ມຄອງຄວາມປອດໄພຫລັກອະນາໄມດ້ານສະບຽງອາຫານ. ຕາມທ່ານນາງ Nguyen Thi Kim Tien ແລ້ວ, ກະຊວງສາທາລະນະສຸກ ພວມສ້າງແຜນຮ່າງທົດລອງເພື່ອຄຸ້ມຄອງລາຄາຢຸກຢາ.
“ພວກຂ້າພະເຈົ້າປະກາດໃຊ້ຄຳສັ່ງແນະນຳການຄຸ້ມຄອງລາຄາ ຢຸກຢາ ແລະ ການປະມູນ. ພວກຂ້າພະເຈົ້າຢາກທົດລອງສ້າງຕັ້ງຄະນະກຳມະການຂາຍປະມູນ, ການປະມູນແຫ່ງຊາດ ຊື່ງລວມມີ: ກະຊວງການເງິນ, ກະຊວງອຸດສາຫະກຳ, ປະກັນໄພຫວຽດນາມ ແລະ ກະຊວງສາທາລະນະສຸກ ເພື່ອເລືອກເຟັ້ນລາຄາຫນຶ່ງເປັນເອກະພາບ ແລະ ເລືອກເຟັ້ນລາຄາຕຳ່ສຸດ.”
ເພື່ອຍົກສູງຄຸນນະພາບຂະແຫນງສາທາລະນະສຸກ, ທ່ານນາງລັດຖະມົນຕີກະຊວງສາທາລະນະສຸກ Nguyen Thi Kim Tien ໃຫ້ຮູ້ວ່າ: ຈະເອົາໃຈໃສ່ເຖິງການຍົກສູງຄຸນນະພາບການບຳລຸງສ້າງ, ວິຊາສະເພາະກໍຄືຈັນຍາບັນຂອງບັນດາທ່ານໝໍ.
ກ່ອນຫນ້ານັ້ນ, ຕອນເຊົ້າວັນດຽວກັນ, ທ່ານ Nguyen Van Binh ຜູ້ວ່າການທະນາຄານແຫ່ງລັດຫວຽດນາມ ໄດ້ຕອບຄຳຊັກຖາມ. ກ່ຽວກັບການບໍລິຫານ, ຄຸ້ມຄອງລາຄາຄຳພາຍໃນປະເທດ, ຜູ້ວ່າການທະນາຄານແຫ່ງລັດຫວຽດນາມ Nguyen Van Binh ໃຫ້ຮູ້ວ່າ: ລັດໄດ້ປະກາດໃຊ້ມະຕິຕົກລົງກ່ຽວກັບການດຳເນີນທຸລະກິດຄຳໄດ້ແລ້ວ. ໃນເບື້ອງຕົ້ນຫວຽດນາມ ສາມາດຄວບຄຸມຕະຫຼາດຄຳໄດ້ແລ້ວ, ອັດຕາແລກປ່ຽນເງິນຕາຕ່າງປະເທດເປັນປົກກະຕິ, ໄພເງິນເຟີ້ຖືກຫລຸດລົງ. ເພື່ອຊ່ວຍໃຫ້ບັນດາວິສາຫະກິດຟື້ນຟູການຜະລິດດຳເນີນທຸລະກິດ, ທະນາຄາແຫ່ງລັດຈະສືບຕໍ່ຫລຸດອັດຕາດອກເບັ້ຍໃຫ້ກູ້ຢືມ. ກ່ຽວກັບບັນດາມາດຕະການແກ້ໄຂໜີ້ເສຍ, ຜູ້ວ່າການທະນາຄານ ແຫ່ງລັດຫວຽດນາມ Nguyen Van Binh ໃຫ້ຮູ້ວ່າ:
“ລະບົບທະນາຄານໄດ້ນຳໃຊ້ບັນດາມາດຕະການທີ່ຂ້ຽວຂາດ. ທີໜຶ່ງແມ່ນບັນດາອົງການສິນເຊື່ອຕ້ອງດຳເນີນການສ້າງໂຄງປະກອບໜີ້ສິນຄືນໃໝ່, ຕີລາຄາສະພາບການເຄື່ອນໄຫວຂອງບັນດາວິສາຫະກິດຄືນໃໝ່. ທີສອງແມ່ນໃນໄລຍະຜ່ານມາ, ການຫັກເງິນເພື່ອສ້າງເປັນບ້ວງເງິນແຮຮັບມືກັບຄວາມສ່ຽງຂອງບັນດາອົງການສິນເຊື່ອໄດ້ຮັບການຄວບຄຸມໄດ້ດີ. ອົງການສິນເຊື່ອໃດທີ່ບໍ່ທັນຫັກເງິນເພື່ອສ້າງເປັນບ້ວງເງິນແຮ່ຮັບມືກັບຄວາມສ່ຽງຢ່າງຄົບຖ້ວນຈະບໍ່ໄດ້ຮັບການແບ່ງຜົນກຳໄລຫຸ້ນ ເຮັດໄດຄືແນວນັ້ນພວກເຮົາຈະບໍ່ປະໃຫ້ໜີ້ເສຍເພີ່ມຂຶ້ນອີກ ແລະ ຖ້າສົມທົບກັບມາດຕະການອື່ນໆອີກ, ພວກຂ້າພະເຈົ້າຖືວ່າບັນຫາໜີ້ເສຍຈະສາມາດແກ້ໄຂໄດ້“