ສະພາແຫ່ງຊາດໃຫ້ສັດຕະຍາບັນແຕ່ງຕັ້ງບັນດາສະມາຊິກລັດຖະບານ
ທ່ານນາຍົກລັດຖະມົນຕີ ຫງວຽນຊວນຟຸກ
(vovworld) - ໂດຍສືບຕໍ່ກອງປະຊຸມສະໄໝສາມັນຄັ້ງປະຖົມມະເລີກ, ສະພາແຫ່ງຊາດຊຸດທີ 14, ຕອນເຊົ້າວັນທີ 28/07, ບັນດາສະມາຊິກສະພາແຫ່ງຊາດໄດ້ຮັບຟັງບົດລາຍງານໝາກຜົນແຫ່ງການປຶກສາຫາລືຕາມຄະນະ ກ່ຽວກັບເລື່ອງໃຫ້ສັດຕະຍາບັນສະເໜີແຕ່ງຕັ້ງບັນດາຮອງນາຍົກລັດຖະມົນຕີ, ບັນດາລັດຖະມົນຕີ ແລະ ສະມາຊິກອື່ນໆຂອງລັດຖະບານ; ທ່ານນາຍົກລັດຖະມົນຕີ ຫງວຽນຊວນຟຸກ ລາຍງານຕໍ່ສະພາແຫ່ງຊາດກ່ຽວກັບການອະພິປາຍ, ຮັບເອົາຄຳເຫັນຂອງສະມາຊິກສະພາແຫ່ງຊາດກ່ຽວກັບເນື້ອໃນດັ່ງກ່າວ. ຕາມໝາກຜົນການປ່ອນບັດປິດລັບໂດຍຄະນະນັບບັດປະກາດ, ສະພາແຫ່ງຊາດເຫັນດີຕໍ່ໃບສະເໜີແຕ່ງຕັ້ງຮອງນາຍົກລັດຖະມົນຕີລວມມີ: ທ່ານ ຟ້າມບີງມິງ, ທ່ານ ເວືອງດີງເຫວ້, ທ່ານ ຫວູດຶກດາມ, ທ່ານ ເຈືອງຮ່ວາບີງ ແລະ ທ່ານ ຈີ້ງດີງຢຸງ. ສະພາແຫ່ງຊາດກໍ່ເຫັນດີໃຫ້ສັດຕະຍາບັນຕໍ່ໃບສະເໜີຂອງທ່ານນາຍົກລັດຖະມົນຕີກ່ຽວກັບການແຕ່ງຕັ້ງຕຳແໜ່ງລັດຖະມົນຕີ ແລະ ບັນດາສະມາຊິກອື່ນໆຂອງລັດຖະບານ.
ແລະກໍ່ໃນຕອນເຊົ້າວັນດຽວກັນ, ສະພາແຫ່ງຊາດໄດ້ດຳເນີນການໃຫ້ສັດຕະຍາບັນແກ່ໃບສະເໜີຂອງປະທານປະເທດກ່ຽວກັບບັນຊີລາຍຊື່ບັນດາຮອງປະທານ ແລະ ບັນດາກຳມະການສະພາປ້ອງກັນຊາດ ແລະ ປ້ອງກັນຄວາມສະຫງົບ. ຕາມນັ້ນແລ້ວ ທ່ານນາຍົກລັດຖະມົນຕີ ຫງວຽນຊວນຟຸກ ຮັບດຳລົງຕຳແໜ່ງເປັນຮອງປະທານສະພາປ້ອງກັນຊາດ ແລະ ປ້ອງກັນຄວາມສະຫງົບ, ບັນດາສະມາຊິກ ສະພາປ້ອງກັນຊາດ ແລະ ປ້ອງກັນຄວາມສະຫງົບ ລວມມີ: ທ່ານນາງປະທານສະພາແຫ່ງຊາດ ຫງວຽນທິກີມເງິນ; ທ່ານລັດຖະມົນຕີກະຊວງປ້ອງກັນປະເທດ ໂງຊວນລິກ ແລະ ທ່ານລັດຖະມົນຕີກະຊວງຕຳຫລວດ ໂຕເລີມ.