ສະມາຄົມທະນາຍຄວາມຫວຽດນາມຄັດຄ້ານບໍລິສັດນ້ຳມັນ ອາຍແກດມະຫາສະໝຸດຈີນ (CNOOC)
ປະກາດເປີດການປະມູນສາກົນສຳຫຼວດ - ຂຸດຄົ້ນນ້ຳມັນອາຍແກດໃນເຂດທະເລຕາເວັນອອກ
(ພາບ: PVI)
(vovworld) ສະມາຄົມທະນາຍຄວາມຫວຽດນາມຫາກໍ່ຖະແຫຼງຄັດຄ້ານເລື່ອງບໍລິສັດນ້ຳມັນອາຍແກດມະຫາສະໝຸດຈີນ (CNOOC) ປະກາດເປີດການປະມູນສາກົນສຳຫຼວດ - ຂຸດຄົ້ນນ້ຳມັນອາຍແກດຢູ່ 9 ແຫ່ງໃນທະເລຕາເວັນອອກທີ່ຂຶ້ນກັບໄຫຼ່ທະວີບຂອງຫວຽດນາມ. ຖະແຫຼງ ການຊີ້ແຈ້ງວ່າ, ນີ້ແມ່ນເຂດບໍ່ມີການພິພາດກັນຢ່າງສິ້ນເຊີງ. ສະມາຄົມທະນາຍຄວາມຫວຽດນາມສະໜັບສະໜູນຖະແຫຼງການຂອງໂຄສົກກະຊວງການຕ່າງປະເທດຫວຽດນາມ ເມື່ອວັນທີ 26/6/2012; ພ້ອມທັງຄັດຄ້ານຢ່າງຮຸນແຮງ ແລະ ຮຽກຮ້ອງໃຫ້ຝ່າຍຈີນຕ້ອງຍົກເລີກເລື່ອງເປີດການປະມູນຢ່າງຜິດພາດດັ່ງກ່າວ ກໍ່ຄືບໍ່ເປີດກວ້າງການພິພາດ ແລະ ບໍ່ມີການກະທຳທີ່ເຮັດໃຫ້ສະພາບການຢູ່ທະເລຕາເວັນອອກສັບສົນຂຶ້ນຕື່ມ. ສະມາຄົມທະນາຍຄວາມຫວຽດນາມ ຮຽກຮ້ອງໃຫ້ຝ່າຍຈີນຕ້ອງປະຕິບັດສົນທິສັນຍາກົດໝາຍວ່າດ້ວຍທະເລປີ 1982 ກໍ່ຄືກົດໝາຍສາກົນທີ່ກ່ຽວຂ້ອງຢ່າງເຂັ້ມງວດ; ປະຕິບັດບັນດາຄຳໝັ້ນສັນຍາເຊິ່ງໄດ້ລະບຸໄວ້ໃນຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ; ຍົກເລີກເລື່ອງປະກາດເປີດການປະມູນທີ່ຜິດພາດດັ່ງກ່າວ. ສະມາຄົມທະນາຍຄວາມຫວຽດນາມ ກໍ່ຮຽກຮ້ອງວົງການທະນາຍຄວາມຂອງປະເທດຕ່າງໆຢູ່ໃນໂລກຈົ່ງອອກສຽງປົກປ້ອງຄວາມຍຸດຕິທຳ, ສົນທິສັນຍາກົດ ໝາຍວ່າດ້ວຍທະເລປີ 1982 ແລະ ຮຽກຮ້ອງໃຫ້ບັນດາບໍລິສັດນ້ຳມັນອາຍແກດສາກົນ ເຄົາລົບສິດອະທິປະໄຕ, ສິດອຳນາດຂອງຫວຽດນາມ, ບໍ່ເຂົ້າຮ່ວມການປະມູນທີ່ຜິດພາດຂອງ CNOOC ໃນເຂດເສດຖະກິດພິເສດ ແລະ ໄຫຼ່ທະວີບຂອງຫວຽດນາມ. ໃນຖະແຫຼງການຂອງຕົນ. ສະມາຄົມທະນາຍຄວາມຫວຽດນາມ ຍາມໃດກໍ່ປາຖະໜາ ຢາກຊຸກຍູ້ການພົວພັນມິດຕະພາບ, ການຮ່ວມມືທີ່ເປັນມູນເຊື້ອລະຫວ່າງປະຊາຊົນຫວຽດນາມ - ຈີນ ເວົ້າລວມ ແລະ ລະຫວ່າງວົງການທະນາຍຄວາມສອງປະເທດເວົ້າສະເພາະ; ແຕ່ກໍ່ພ້ອມແລ້ວທີ່ຈະເຮັດຈົນສຸດຄວາມສາມາດຂອງຕົນ ເພື່ອປະກອບສ່ວນປົກປັກຮັກສາຄວາມຍຸດຕິທຳ, ກົດໝາຍສາກົນ, ເຄົາລົບເອກະລາດ ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດຕ່າງໆ, ຮັກສາສັນຕິພາບ ແລະ ຄວາມໝັ້ນຄົງໃນພາກພື້ນ ແລະ ຢູ່ໃນໂລກ