ສະມາຊິກລັດຖະສະພາຍີ່ປຸ່ນ,ຟິລິບປິນຊຸກຍູ້ການແກ້ໄຂການຂັດແຍ້ງກັນຢູ່ທະເລຕາເວັນອອກໂດຍສັນຕິວິທີ
ກຳ່ປັນຂົນສົ່ງສິນຄ້າຂອງຍີ່ປຸ່ນ
(ພາບ: Kyodo/TTXVN)
(vovworld) – ຕອນບ່າຍວັນທີ 3/9, ກຸ່ມບັນດາສະມາຊິກລັດຖະສະພາ (ສສຊ) ຍີ່ປຸ່ນ ແລະ ຟິລິບປິນ ໄດ້ເຫັນດີເປັນເອກະສັນຊຸກຍູ້ມາດຕະການແກ້ໄຂໃຫ້ບັນດາຄວາມຂັດແຍ້ງໃນການເດີນເຮືອຢູ່ ອາຊີ ບົນພື້ນຖານກົດໝາຍສາກົນຢ່າງສັນຕິພາບ, ພ້ອມທັງຊອກຫາວິທີສ້າງຕັ້ງ “ພັນທະມິດບັນດາ ສສຊ ກ່ຽວກັບການປ້ອງກັນຄວາມສະຫງົບໃນການເດີນທະເລຢູ່ອາຊີ”. ຄະນະປະຕິບັດງານລວມມີ ສສຊ ຍີ່ປຸ່ນ 6 ທ່ານພວມຢູ່ຢ້ຽມຢາມ ຟິລິບປິນ ພ້ອມກັບ ສສຊ ຂອງປະເທດເຈົ້າພາບ 13 ທ່ານ, ໄດ້ເຊັນ “ເອກະສານລວມກ່ຽວກັບການຮ່ວມມືຊຸກຍູ້ກົດໝາຍວ່າດ້ວຍທະເລ”, ຕາມນັ້ນແລ້ວ, ທັງ 2 ຝ່າຍໄດ້ສົ່ງເສີມລັດຖະສະພາແຕ່ລະປະເທດເຂົ້າຮ່ວມບັນດາຄວາມມານະພະຍາຍາມເພື່ອແນໃສ່ສ້າງຕັ້ງພັນທະມິດ ສສຊ ກ່ຽວກັບຄວາມສະຫງົບປອດໄພໃນການເດີນທະເລອາຊີ, ເພື່ອແນໃສ່ປົກປົກຮັກສາ ແລະ ຊຸກຍູ້ຄວາມເປັນລະບຽບຮຽບຮ້ອຍໃນການເດີນທະເລບົນພື້ນຖານກົດໝາຍສາກົນ. ເອກະສານໃຫ້ຮູ້ວ່າ: ທັງ 2 ຝ່າຍ “ຍອມຮັບວ່າກ່ຽວກັບບັນຫາທະເລ, ບັນດາປະເທດຄວນຍົກອອກ ແລະ ເຮັດແຈ້ງບັນດາຄຳຖະແຫຼງອະທິປະໄຕບົນພື້ນຖານກົດໝາຍສາກົນ, ບໍ່ນຳໃຊ້ກຳລັງອາວຸດ ຫຼື ນາບຂູ່ນຳໃຊ້ອາວຸດເພື່ອແນໃສ່ປະຕິບັດບັນດາຖະແຫຼງອະທິປະໄຕ, ແກ້ໄຂຄວາມຂັດແຍ້ງໂດຍສັນຕິວິທີ ແລະ ຫຼີກລ້ຽງທຸກຄວາມມານະພະຍາຍາມພຽງລຳພັງຝ່າຍດຽວເພື່ອແນໃສ່ເຮັດໃຫ້ສະພາບການປ່ຽນແປງດ້ວຍການນຳໃຊ້ອາວຸດ ຫຼື ນາບຂູ່ ແລະ ເພີ່ມທະວີການຮ່ວມມືບົນພື້ນຖານເປັນເອກະພາບນຳກັນ.