(vovworld) – ຕອນເຊົ້າວັນທີ 19/7, ຢູ່ ຮ່າໂນ້ຍ, ອົງຄະນະພັກກຸ່ມວິສາຫະກິດສູນກາງໄດ້ຈັດຕັ້ງກອງປະຊຸມສະຫລຸບ 5 ປີແຫ່ງການປະຕິບັດວຽກງານຮັບປະກັນຊີວິດສັງຄົມ ແລະ ມະຕິ 30a ຂອງລັດຖະບານກ່ຽວກັບໂຄງການໜູນຊ່ວຍຫລຸດຜ່ອນຄວາມທຸກຍາກຢູ່62 ເມືອງທຸກຍາກຢ່າງວ່ອງໄວ ແລະ ໝັ້ນຄົງໄລຍະ 2008 – 2012. ໃນໄລຍະ 5 ປີ (2008 - 2012), ບັນດາກຸ່ມບໍລິສັດ, ບໍລິສັດໃຫຍ່, ທະນາຄານໃນກຸ່ມເຂົ້າຮ່ວມການໜູນຊ່ວຍ, ອຸປະຖຳວຽກງານຮັບປະກັນຊີວິດສັງຄົມ ດ້ວຍຍອດມູນຄ່າກ່ວາ 8.500 ຕື້ດົ່ງເພື່ອປະຕິບັດບັນດາໂຄງການຄື: ກິນເຂົ້າຄິດຮອດຄຸນນາ ກິນປາຄິດຮອດຄຸນນ້ຳ, ສາຍໃຈຊາຍແດນ ໝູ່ເກາະ, ລົບລ້າງເຮືອນຢູ່ຊົ່ວຄາວ ຂອງຄົນທຸກຍາກ, ຊ່ວຍເຫຼືອພໍ່ແມ່ປະຊາຊົນເຂດປະສົບໄພທຳມະຊາດ, ພະຍຸ, ນ້ຳຖ້ວມ... ກ່າວຄຳເຫັນທີ່ກອງປະຊຸມ, ທ່ານ ບຸ່ຍວັນເກື່ອງ, ເລຂາຄະນະພັກກຸ່ມວິສາຫະກິດ ສູນກາງຢືນຢັນວ່າ:
“ບັນດາວິສາຫະກິດ, ທະນາຄານໃນກຸ່ມເປັນເຈົ້າການນຳໜ້າໃນການປະຕິບັດໂຄງການຕ່າງໆ, ເຮັດໜ້າທີ່ສັງຄົມເປັນຢ່າງດີ, ຜັນຂະຫຍາຍປະຕິບັດມະຕິຂອງພັກ, ລັດຖະບານໃນວຽກງານຮັບປະກັນຊີວິດສັງຄົມເປັນຢ່າງດີ ແລະ ເປັນເຈົ້າການຜັນຂະຫຍາຍການປະຕິບັດມະຕິຂອງລັດຖະບານກ່ຽວກັບການໜູນຊ່ວຍຫລຸດຜ່ອນຄວາມທຸກຍາກຢ່າງວ່ອງໄວ ແລະ ໝັ້ນຄົງສຳລັບບັນດາເມືອງທຸກຍາກຂອງທົ່ວປະເທດຢ່າງມີປະສິດທິຜົນ.”
ທີ່ກອງປະຊຸມ, ບັນດາກຸ່ມບໍລິສັດ, ບໍລິສັດໃຫຍ່, ທະນາຄານໃນກຸ່ມໃຫ້ຄຳໝັ້ນສັນຍາສືບຕໍ່ໜູນຊ່ວຍເງິນກ່ວາ 3.100 ຕື້ດົ່ງໃຫ້ແກ່ວຽກງານຮັບປະກັນຊີວິດສັງຄົມ ແລະ ປະຕິບັດມະຕິ 30a ໃນປີ 2013.