(vovworld) - ຕອນເຊົ້າວັນທີ 6/6, ຢູ່ ຮ່າໂນ້ຍ, ຄະນະເລຂາສູນກາງພັກໄດ້ຈັດຕັ້ງກອງປະຊຸມຜ່ານເຄືອຂ່າຍ ອິນເຕີເນັດຢູ່ 63 ສະຖານທີ່ເພື່ອສະຫລຸບ 10 ປີແຫ່ງການປະຕິບັດມະຕິສູນກາງຄັ້ງທີ 5 ຊຸດທີ 9 ກ່ຽວກັບການສືບຕໍ່ປ່ຽນໃໝ່ພັດທະນາ ແລະ ຍົກສູງປະສິດທິຜົນເສດຖະກິດລວມໝູ່. ບົດລາຍງານທີ່ກອງປະຊຸມໃຫ້ເຫັນວ່າ: ພາຍຫລັງ 10 ປີແຫ່ງການປະຕິບັດມະຕິສູນກາງກ່ຽວກັບເສດຖະກິດລວມໝູ່, ມາຮອດປະຈຸບັນ, ໃນທົ່ວປະເທດມີ 370.000 ກຸ່ມຮ່ວມມື, 20.000 ສະຫະກອນ, ດຶງດູດສະມາຊິກເຂົ້າຮ່ວມປະມານ 13 ລ້ານຄົນ. ກ່າວຄຳເຫັນສະຫລຸບກອງປະຊຸມ, ທ່ານ ເລຮົ່ງແອງ, ກຳມະການກົມການເມືອງ, ຜູ້ປະຈຳການຄະນະເລຂາສູນກາງພັກ ຢືນຢັນວ່າ: ເສດຖະກິດ ລວມໝູ່ແມ່ນພາກສ່ວນເສດຖະກິດຍາມໃດກໍ່ໄດ້ຮັບຄວາມເອົາໃຈໃສ່ພັດທະນາຈາກພັກ, ລັດ. ໃນຊຸມປີຜ່ານມາ, ເສດຖະກິດລວມໝູ່ໄດ້ປະກອບສ່ວນຕັ້ງໜ້າເຂົ້າໃນການເຕີບໂຕເສດຖະກິດ, ສ້າງວຽກເຮັດງານທຳ, ປະກອບສ່ວນຮັບປະກັນຊີວິດສັງຄົມຍົກສູງຊີວິດການເປັນຢູ່ທາງດ້ານວັດຖຸ, ຈິດໃຈຂອງສະມາຊິກສະຫະກອນເວົ້າສະເພາະ ແລະ ຂອງປະຊາຊົນເວົ້າລວມ. ທ່ານ ເລຮົ່ງແອງ, ສະເໜີໃຫ້ຄະນະພັກຂັ້ນຕ່າງໆ, ອຳນາດການປົກຄອງ, ກະຊວງ, ຂະແໜງການ, ທ້ອງຖິ່ນ, ແນວໂຮມປະເທດຊາດຫວຽດນາມ, ພັນທະພາບສະຫະກອນ ແລະ ບັນດາອົງການຈດຕັ້ງມະຫາຊົນຂັ້ນຕ່າງໆສືບຕໍ່ປະຕິບັດມະຕິດ້ວຍບັນດາກຸ່ມມາດຕະການ, ໃນນັ້ນສ້າງເງື່ອນໄຂໃຫ້ບັນດາຮູບແບບສະຫະກອນພັດທະນາທັງດ້ານເນື້ອທີ່ດິນ ແລະ ມະນຸດ, ຮ່ວມສຳພັນຢ່າງແໜ້ນແຟ້ນ ລະຫວ່າງປະຊາຊົນ ແລະ ວິສາຫະກິດຕິດພັນກັບການພັດທະນາເສດຖະກິດ ລວມໝູ່ດ້ວຍການປະຕິບັດຈຸດໝາຍໂຄງການກໍ່ສ້າງຊົນນະບົດໃໝ່.
ກອງປະຊຸມໄດ້ຢືນຢັນສືບຕໍ່ຍູ້ແຮງການປະຕິບັດມະຕິສູນກາງຄັ້ງທີ 5, ຊຸດທີ 9 ກ່ຽວກັບການສືບຕໍ່ປ່ຽນໃໝ່, ພັດທະນາ ແລະ ຍົກສູງປະສິດທິຜົນ ເສດຖະກິດລວມໝູ່, ເຖິງບັນດາກະຊວງ, ຂະແໜງການ ແລະ 63 ຄະນະພັກແຂວງ, ນະຄອນໃນທົ່ວປະເທດ.