ສະເຫຼີມສະຫຼອງ 40 ປີແຫ່ງວັນສ້າງສາຍພົວພັນລະຫວ່າງຫວຽດນາມ - ຝລັ່ງ
ຍົກລະດັບການພົວພັນລະຫວ່າງຫວຽດນາມ - ຝລັ່ງ
ຂຶ້ນສູ່ລະດັບຄູ່ຮ່ວມມືຍຸດທະສາດ
(ພາບປະກອບ)
(vovworld) - ການພົວພັນລະຫວ່າງຫວຽດນາມ - ຝລັ່ງ ແມ່ນການພົວພັນທີ່ເປັນສັນຍາລັກ ແລະ ເລື່ອງຍົກລະດັບການພົວພັນລະຫວ່າງຫວຽດນາມ - ຝລັ່ງ ຂຶ້ນສູ່ລະດັບ ຄູ່ຮ່ວມມືຍຸດທະສາດ ຈະສ້າງຂອບເຂດໃໝ່ ເພື່ອນຳການພົວພັນຮ່ວມມືໃຫ້ພັດທະນາຢ່າງກວ້າງຂວາງ ແລະ ເລີກເຊິ່ງກວ່າອີກ. ນັ້ນແມ່ນຂໍ້ສັງເກດຂອງທ່ານລັດຖະມົນຕີການຕ່າງປະເທດຫວຽດນາມ ຟ້າມບິ່ງມິງ ທີ່ພິທີສະເຫຼີມສະຫຼອງ 40 ປີແຫ່ງວັນສ້າງສາຍພົວພັນລະຫວ່າງຫວຽດນາມ - ຝລັ່ງ ເຊິ່ງດຳເນີນໄປໃນຕອນຄໍ່າວັນທີ 27/03, ຢູ່ປາຣີ, ປະເທດຝລັ່ງ. ທ່ານລັດຖະມົນຕີການຕ່າງປະເທດຫວຽດນາມ ຟ້າມບິ່ງມິງ ຢືນຢັນວ່າ.
“ເພື່ອສະເຫຼີມສະຫຼອງ 40 ປີແຫ່ງວັນສ້າງສາຍພົວພັນທາງການທູດ, ຫວຽດນາມ ແລະ ຝລັ່ງ ພວມຕັ້ງໜ້າຈັດຕັ້ງປີຫວຽດນາມ - ຝລັ່ງ 2013 – 2014 ດ້ວຍບັນດາການເຄື່ອນໄຫວທີ່ອຸດົມສົມບຸນທີ່ຂຶ້ນກັບຫຼາຍຂົງເຂດຮ່ວມມື. ນີ້ແມ່ນໂອກາດເພື່ອໃຫ້ 2 ປະເທດ ພ້ອມກັນຫວນຄືນໄລຍະປະຫວັດສາດຂອງການພົວພັນເຊິ່ງ 2 ຊາດເພີ່ມພູນຄຸນສ້າງ, ພ້ອມກັນມຸ່ງໄປເຖິງບັນດາແງ່ຫວັງການຮ່ວມມືໃໝ່ໃນອະນາຄົດ”.
ເມື່ອຕອບສຳພາດຕໍ່ນັກຂ່າວວິທະຍຸກະຈາຍສຽງຫວຽດນາມ ປະຈຳຝລັ່ງແລ້ວ, ທ່ານນາງລັດຖະມົນຕີກະຊວງການຄ້າຕ່າງປະເທດຝລັ່ງ Nicole Bricq ໃຫ້ຮູ້ວ່າ, ລັດຖະບານຝລັ່ງ ຈະມີແຜນນະໂຍບາຍຢ່າງຕັ້ງໜ້າເພື່ອນຳການພົວພັນລະຫວ່າງຫວຽດນາມ - ຝລັ່ງ ພັດທະນາຍິ່ງຂຶ້ນອີກ. ທ່ານນາງກ່າວວ່າ.
“ພວກຂ້າພະເຈົ້າຢາກສ້າງຕັ້ງຂອບເຂດ “ຄູ່ຮ່ວມມືຍຸດທະສາດ” ກັບຫວຽດນາມ ແລະ ໃນອາທິດຈະມາເຖິງ, ຂ້າພະເຈົ້າຈະມາຫວຽດນາມ ເພື່ອຊຸກຍູ້ການພົວພັນເສດຖະກິດການຄ້າຕ່າງປະເທດລະຫວ່າງ 2 ລັດຖະບານ, ກໍຄືປະຊາຄົມວິສາຫະກິດລະຫວ່າງ 2 ປະເທດ”.