(vovworld) - ວັນທີ 02/03, ທ່ານປະທານປະເທດ ເຈືອງເຕີນຊາງ ໄດ້ຝາກຈົດໝາຍອວຍພອນເຖິງພະນັກງານ, ນັກຮົບທະຫານປ້ອງກັນຊາຍແດນ ແລະ ປະຊາຊົນເຂດຊາຍແດນ ເນື່ອງໃນໂອກາດສະເຫຼີມສະຫຼອງ 55 ປີແຫ່ງວັນມູນເຊື້ອທະຫານປ້ອງກັນຊາຍແດນ.
ໃນຈົດໝາຍ, ທ່ານປະທານປະເທດເຈືອງເຕີນຊາງ ຢືນຢັນ ການປະກອບສ່ວນຢ່າງຕັ້ງໜ້າຂອງບັນດາພະນັກງານ, ນັກຮົບທະຫານປ້ອງກັນຊາຍແດນ ແລະ ປະຊາຊົນເຂດຊາຍແດນ ໄດ້ສ້າງເປັນໄຊຊະນະ, ຜົນງານຂອງຫວຽດນາມ ໃນທຸກຂົງເຂດຂອງຊີວິດສັງຄົມ, ສືບຕໍ່ຍົກສູງທີ່ຕັ້ງຂອງຫວຽດນາມໃນເວທີສາກົນ. ທ່ານປະທານປະເທດຊີ້ແຈ້ງວ່າ, ໃນຊຸມປີຕໍ່ໜ້າ, ຫວຽດນາມທັງມີກາລະໂອກາດ ແລະ ການທ້າທາຍຫຼາຍຢ່າງ, ໜ້າທີ່ວຽກງານປ້ອງກັນຊາຍແດນນັບມື້ນັບຮອບດ້ານກວ່າ, ດັ່ງນັ້ນທ່ານປະທານປະເທດຫວັງວ່າ, ພະນັກງານນັກຮົບ, ທະຫານປ້ອງກັນຊາຍແດນ ແລະ ປະຊາຊົນເຂດຊາຍແດນ ຕ້ອງເປັນເຈົ້າການກຳແໜ້ນກາລະໂອກາດ, ຜ່ານຜ່າການທ້າທາຍ, ແກ້ໄຂຄວາມຫຍຸ້ງຍາກ, ພ້ອມກັບທົ່ວພັກ, ທົ່ວປວງຊົນ ແລະ ທົ່ວກອງທັບກໍ່ສ້າງ, ປົກປັກຮັກສາອະທິປະໄຕຜືນແຜ່ນດິນ, ຄວາມສະຫງົບປອດໄພຢູ່ເຂດຊາຍແດນ, ເຂດທະເລໝູ່ເກາະຂອງປະເທດຢ່າງໝັ້ນຄົງ, ກໍ່ສ້າງຊາຍແດນສັນຕິພາບ, ມິດຕະພາບ, ປະກອບສ່ວນເຂົ້າໃນພາລະກິດປ່ຽນໃໝ່ປະເທດຊາດ.
ແລະກໍ່ໃນຕອນເຊົ້າວັນທີ 2/3 ກອງບັນຊາການທະຫານປ້ອງກັນຊາຍແດນກໍ່ຈັດຕັ້ງພິທີສະເຫຼີມສະຫຼອງ 55 ປີ ແຫ່ງວັນມູນເຊື້ອ ທະຫານປ້ອງກັນຊາຍແດນ, 25 ປີ ແຫ່ງວັນທົ່ວປວງຊົນປ້ອງກັນຊາຍແດນ ແລະ ”ຕ້ອນຮັບຫຼຽນໄຊ ໂຮ່ຈີມິນ”. ເຂົ້າຮ່ວມ ແລະ ກ່າວຄວາມເຫັນທີ່ພິທີ, ທ່ານປະທານສະພາແຫ່ງຊາດ ຫງວຽນຊິງຮຸ່ງ, ສະເໜີວ່າ:
”ພ້ອມກັບທົ່ວພັກ, ທົ່ວປວງຊົນ ແລະ ທົ່ວກອງທັບເຮັດຫຼ້ອນໜ້າທີ່ການເມືອງໃນໄລຍະໃໝ່, ພະນັກງານ, ນັກຮົບທະຫານປ້ອງກັນຊາຍແດນຄວນເສີມຂະຫຍາຍມູນເຊື້ອວິລະຊົນ, ປະຕິບັດມະຕິກອງປະຊຸມໃຫຍ່ຄັ້ງທີ 11 ຂອງພັກ, ມະຕິກອງປະຊຸມສູນກາງຄັ້ງທີ 8 ຜ່ານມາ ກ່ຽວກັບ ”ຍຸດທະສາດປົກປັກຮັກສາປະເທດຊາດໃນສະພາບການໃໝ່” ເປັນຢ່າງດີ, ສືບຕໍ່ຮຳ່ຮຽນ, ຫຼໍ່ຫຼອມ, ກໍ່ສ້າງທະຫານປ້ອງກັນຊາຍແດນໃຫ້ໝັ້ນຄົງເຂັ້ມແຂງຮອບດ້ານ”.
ທ່ານປະທານສະພາແຫ່ງຊາດ ຫງວຽນຊິງຮຸ່ງ ສະແດງຄວາມເຊື່ອໝັ້ນວ່າ, ໃນໄລຍະຈະມາເຖິງ, ທະຫານປ້ອງກັນຊາຍແດນຈະສືບຕໍ່ເສີມຂະຫຍາຍ, ມານະພະຍາຍາມສູ້ຊົນ, ຫຼໍ່ຫຼອມ ເພື່ອປະຕິບັດສຳເລັດໜ້າທີ່ປົກປັກຮັກສາອະທິປະໄຕ, ຄວາມສະຫງົບປອດໄພຢູ່ເຂດຊາຍແດນຂອງປະເທດຊາດຢ່າງໝັ້ນຄົງ.
ກ່ອນໜ້ານັ້ນ, ຕອນຄຳ່ວັນທີ 1/3, ຢູ່ຮ່າໂນ້ຍ, ໄດ້ດຳເນີນງານພົບປະແລກປ່ຽນພິເສດ ”ຊາຍແດນທີ່ເຕັມໄປດ້ວຍນຳ້ໃຈມິດຕະພາບ”. ທ່ານຮອງນາຍົກລັດຖະມົນຕີ ຫງວຽນຊວນຟຸກ, ທ່ານປະທານສູນກາງແນວໂຮມປະເທດຊາດ ຫງວຽນທ້ຽນເຍິນ, ທ່ານລັດຖະມົນຕີກະຊວງປ້ອງກັນປະເທດ ຟຸ່ງກວາງແທງ ໄດ້ເຂົ້າຮ່ວມ ແລະ ຊີ້ແຈ້ງຄວາມໝາຍ, ຜົນປະໂຫຍດອັນໃຫຍ່ຫຼວງຂອງວຽກງານການຕ່າງປະເທດປ້ອງກັນຊາຍແດນ ໃນການກໍ່ສ້າງ, ຄຸ້ມຄອງ ແລະ ປົກປັກຮັກສາຊາຍແດນ, ພ້ອມທັງຢືນຢັນບົດບາດຂອງກຳລັງທະຫານປ້ອງກັນຊາຍແດນໃນວຽກງານການຕ່າງປະເທດ, ການທະຫານປ້ອງກັນຊາຍແດນ.