(vovworld) - ວັນທີ 07/05, ປະຊາຊົນ ຫວຽດນາມ ໄດ້ສະເຫຼີມສະຫຼອງ 59 ປີແຫ່ງວັນໄຊຊະນະ ດ້ຽນບຽນຝູ (07/05/1954), ສິ້ນສຸດ 9 ປີແຫ່ງການຕໍ່ສູ້ຕ້ານລ່າເມືອງຂຶ້ນ ຝຣັ່ງຂອງກອງທັບ ແລະ ປະຊາຊົນ ຫວຽດນາມ. ນີ້ແມ່ນໄຊຊະນະທີ່ຍິ່ງໃຫຍ່ໃນປະຫວັດສາດຕ້ານສັດຕູຜູ້ຮຸກຮານຂອງຊາດ ຫວຽດນາມ, ມີກຳລັງລະດົມອັນໃຫຍ່ຫຼວງໃຫ້ແກ່ຂະບວນການຕ້ານລັດທິລ່າເມືອງຂຶ້ນຂອງປະເທດຕ່າງໆໃນໂລກ.
ໜັງສືພິມ ກວນໂດ້ຍເຍີນເຢີນ (ສຽງຂອງກອງທັບປະຊາຊົນ ຫວຽດນາມ) ສະບັບອອກວັນທີ 7/5 ໄດ້ລົງພິມບົດນຳ “ທະວີຄຸນກຳລັງແຮງມະຫາສາມັກຄີທົ່ວປວງຊົນທັງຊາດ” ເຊິ່ງໄດ້ຊີ້ແຈງວ່າ: ຄຽງຄູ່ກັບບັນດາຄວາມໝາຍ, ຄຸນຄ່າອັນໃຫຍ່ຫຼວງດ້ານການເມືອງ, ການທະຫານ, ການທູດ... ໄຊຊະນະ ດ້ຽນບຽນຝູ ຍັງແມ່ນໄຊຊະນະຂອງກຳລັງແຮງມະຫາສາມັກຄີທົ່ວປວງຊົນທັງຊາດ, ພາຍໃຕ້ການນຳພາທີ່ສະຫຼາດສະຫຼຽວຂອງພັກກອມມູນິດ ຫວຽດນາມ, ນຳໜ້າແມ່ນປະທານ ໂຮ່ຈີມິນ. ໄຊຊະນະ ດ້ຽນບຽນຝູ ຍັງຢືນຢັນບົດຮຽນທີ່ລ້ຳຄ່າກ່ຽວກັບການເສີມຂະຫຍາຍນ້ຳໃຈມະຫາສາມັກຄີທົ່ວປວງຊົນທັງຊາດ.
ໃນໜັງສືພິມ ຮ່າໂນ້ຍເໝີຍ (ຮ່າໂນ້ຍໃໝ່) ມີບົດຂຽນ “ຮູບພາບນັກຮົບ ດ້ຽນບຽນ ຍັງຄົງເປັນແບບຢ່າງຕະຫຼອດໄປ”, ບົດໜັງສືພິມໄດ້ຂຽນກ່ຽວກັບວິລະຊົນກຳລັງປະກອບອາວຸດປະຊາຊົນ ຟູ່ງວັນເຂົາ, ພັນເອກ ຫງວຽນຈ້ອງຈິງ, ບັນດານັກຮົບເກົ່າທີ່ເຄີຍເຂົ້າຮ່ວມບັ້ນຮົບ ດ້ຽນບຽນຝູ. ບັນດາ “ນັກຮົບ ດ້ຽນບຽນ” ນີ້ແມ່ນແບບຢ່າງທີ່ດີເດັ່ນໃນວຽກງານການເມືອງ, ສັງຄົມຢູ່ທ້ອງຖິ່ນ, ປະກອບສ່ວນສຶກສານ້ຳໃຈຮັກຊາດໃຫ້ນັກຮຽນ, ພະນັກງານ, ນັກຮົບລຸ້ນຕ່າງໆຜ່ານບັນດາເລື່ອງລາວປະຫວັດສາດແຫ່ງການຕໍ່ສູ້ເພື່ອຄວາມເສລີພາບຂອງຊາດ.
ພາບປະກອບ
ເນື່ອງໃນໂອກາດນີ້, ຕອນເຊົ້າວັນທີ 7/5, ຄະນະຜູ້ແທນອົງຄະນະພັກ, ອຳນາດການປົກຄອງແຂວງ ດ້ຽນບຽນ ແລະ ກົມໃຫຍ່ພາສີ ໄດ້ວາງພວງມາລາ, ຖະຫວາຍທູບທຽນອາໄລຫາ, ຕອບບຸນແທນຄຸນບັນດານັກຮົບວິລະຊົນໄດ້ເສຍສະຫຼະຊີວິດເພື່ອພາລະກິດປົດປ່ອຍຊາດເຊິ່ງປະຈຸບັນພວມປົງອັດຖິຢູ່ສຸສານນັກຮົບເສຍສະຫຼະຊີວິດເພື່ອຊາດ ເອກະລາດ. ບັນດາຜູ້ແທນໄດ້ສະແດງຄວາມເຄົາລົບ, ຄວາມຮູ້ບຸນຄຸນ ແລະ ໝັ້ນໝາຍຈະສາມັກຄີ, ມານະພະຍາຍາມພ້ອມກັນສ້າງແຂວງ ດ້ຽນບຽນ ໃຫ້ນັບມື້ນັບພັດທະນາທາງດ້ານເສດຖະກິດ, ໝັ້ນຄົງທາງດ້ານປ້ອງກັນຊາດ - ປ້ອງກັນຄວາມສະຫງົບ, ກາຍເປັນສູນເສດຖະກິດ, ການເມືອງ, ວັດທະນະທຳຂອງເຂດ ໄຕບັກ.
ສຸສານເອກະລາດ ແມ່ນ 1 ໃນຈຳນວນສຸສານ 3 ແຫ່ງຂອງແຂວງ ດ້ຽນບຽນຝູ ໄດ້ຮັບການຮັບຮອງວ່າເປັນສຸສານນັກຮົບເສຍສະຫຼະຊີວິດເພື່ອຊາດ ລະດັບຊາດ, ໄດ້ເຕົ້າໂຮມອັດຖີຂອງນັກຮົບກ່ວາ 2.400 ຄົນທີ່ໄດ້ເສຍສະຫຼະຊີວິດໃນການຕໍ່ສູ້ຕ້ານລ່າເມືອງຂຶ້ນຝຣັ່ງ, ຕ້ານ ອາເມລິກາ ກູ້ຊາດ, ໃນນັ້ນມີບັນດານັກຮົບເສຍສະຫຼະຊີວິດເມື່ອປະຕິບັດໜ້າທີ່ສາກົນຢູ່ ລາວ.
ແລະກໍ່ໃນຕອນເຊົ້າວັນດຽວກັນ, ສູນກາງສະມາຄົມນັກຮົບເກົ່າ ຫວຽດນາມ ໄດ້ສົມທົບກັບວິທະຍຸກະຈາຍສຽງ ຫວຽດນາມ ແລະ ກຸ່ມບໍລິສັດນຳ້ມັນເຊື້ອໄຟ ແຫ່ງຊາດ ຫວຽດນາມ ໄດ້ປຸກລະດົມການເສັງຂຽນ “ຄວາມຊົງຈຳ ກ່ຽວກັບດ້ຽນບຽນ”.
ກ່າວຄວາມເຫັນນະພິທີປຸກລະດົມການເສັງ, ພົນຕີ ຟຸ່ງຄັກດັງ, ຮອງປະທານສະມາຄົມນັກຮົບເກົ່າຫວຽດນາມ, ຫົວໜ້າຄະນະຈັດຕັ້ງການເສັງ, ຊີ້ແຈ້ງວ່າ:
“ໃນການເສັງຄວາມຊົງຈຳກ່ຽວກັບດ້ຽນບຽນຝູ ຄັ້ງນີ້, ຄະນະຈັດຕັ້ງການເສັງປາຖະໜາຢາກປະກອບສ່ວນເຂົ້າໃນການສຶກສາມູນເຊື້ອປະຫວັດສາດອັນສະຫງ່າລາສີຂອງຊາດ, ເພື່ອສືບຕໍ່ເພີ່ມເຂົ້າສາງເອກະສານໄຊຊະນະດ້ຽນບຽນຝູ ບັນດາເອກະສານອັນລ້ຳຄ່າ ຈາກຜູ້ເຂົ້າຮ່ວມການຕໍ່ສູ້ ແລະ ຮັບໃຊ້ບັ້ນຮົບ ດ້ຽນບຽນຝູໂດຍກົງ”.
ສ່ວນທ່ານ ຫວູຫາຍ, ຮອງຜູ້ອຳນວຍການໃຫຍ່ວິທະຍຸກະຈາຍສຽງຫວຽດນາມ, ໃຫ້ຮູ້ວ່າ:
“ວິທະຍຸກະຈາຍສຽງຫວຽດນາມ ຈະອອກອາກາດບັນດາບົດເຂົ້າຮ່ວມການເສັງໃນລາຍການນັກຮົບເກົ່າຫວຽດນາມ. ພວກຂ້າພະເຈົ້າກໍ່ຈະອອກອາກາດຜ່ານພາຫະນະສື່ມວນຊົນຕ່າງໆຂອງວິທະຍຸກະຈາຍສຽງຄື: ວິທະຍຸ, ໂທລະພາບ, ສື່ເອເລກໂຕນິກ ແລະ ສື່ສິ່ງພິມ. ພວກຂ້າພະເຈົ້າຖືວ່າ ນີ້ແມ່ນໜຶ່ງໃນບັນດາການເຄື່ອນໄຫວມຸ່ງໄປເຖິງການສະເຫຼີມສະຫຼອງ 60 ປີ ແຫ່ງວັນໄຊຊະນະດ້ຽນບຽນຝູ ແລະ 70 ປີ ແຫ່ງວັນສ້າງຕັ້ງກອງທັບປະຊາຊົນຫວຽດນາມ“