ສະເຫຼີມສະຫຼອງ45ປີແຫ່ງວັນສ້າງຕັ້ງການພົວພັນທາງການທູດລະຫວ່າງຫວຽດນາມ-ຊູແອດ
(ງານພົບປະແລກປ່ຽນ ແລະ ໂອ້ລົມສົນທະນາ
“ມູນເຊື້ອມິດຕະພາບຫວຽດນາມ - ຊູແອດ” )
(vovworld) – ງານພົບປະແລກປ່ຽນ ແລະ ໂອ້ລົມສົນທະນາ “ມູນເຊື້ອມິດຕະພາບຫວຽດນາມ - ຊູແອດ” ເນື່ອງໃນໂອກາດສະເຫຼີມສະຫຼອງ 45 ປີແຫ່ງວັນສ້າງຕັ້ງການພົວພັນທາງການທູດລະຫວ່າງຫວຽດນາມ - ຊູແອດ ດຳເນີນໄປໃນຕອນເຂົ້າວັນທີ 30/10, ຢູ່ຮ່າໂນ້ຍ. ກ່າວຄຳເຫັນທີ່ງານພົບປະແລກປ່ຽນ, ທ່ານ ຮ່ວາງເທ໋ລຽນ, ອະດີດລັດຖະມົນຕີຊ່ວຍວ່າການກະຊວງຍຸຕິທຳ, ປະທານສະມາຄົມມິດຕະພາບຫວຽດນາມ - ຊູແອດ ເນັ້ນໜັກວ່າ, ຫວຽດນາມ ແລະ ຊູແອດ ມີສາຍພົວພັນມິດຕະພາບທີ່ເປັນມູນເຊື້ອໃນຫຼາຍທົດສະວັດທີ່ຜ່ານມາ. ການຊ່ວຍເຫຼືອຢ່າງຕໍ່ເນື່ອງ ແລະ ມີປະສິດທິຜົນຂອງລັດຖະບານ ແລະ ປະຊາຊົນຊູແອດ ທີ່ສະຫງວນໃຫ້ແກ່ຫວຽດນາມ ໃນຫຼາຍປີຜ່ານມາ ໄດ້ປະກອບສ່ວນສຳຄັນເຂົ້າໃນບັນດາຜົນງານດ້ານເສດຖະກິດ, ສັງຄົມ ກໍ່ຄືຊຸກຍູ້ວິວັດການປະຕິຮູບ, ເປີດປະຕູ ແລະ ເຊື່ອມໂຍງເຂົ້າກັບສາກົນຂອງຫວຽດນາມ.
ກ່າວຄຳເຫັນທີ່ພິທີ, ທ່ານນາງ Camilla Mellander ເອກອັກຄະລັດຖະທູດຊູແອດ ປະຈຳຫວຽດນາມ ຢືນຢັນວ່າ.
“ພວກເຮົາພວມກ້າວເຂົ້າສູ່ໄລຍະໃໝ່ແຫ່ງການພົວພັນຮ່ວມມື 2 ຝ່າຍ, ມຸ່ງໄປເຖິງການພົວພັນຄູ່ຮ່ວມມືສະເໝີພາບກວ່າ ກັບການພົວພັນດ້ານເສດຖະກິດ, ການຄ້າ ເປັນໃຈກາງ. ຊູແອດ ປາດຖະໜາ ຢາກເປີດກວ້າງການພົວພັນກັບຫວຽດນາມ. ດ້ວຍຖານະເປັນບັນດາເພື່ອນມິດທີ່ດີ, ພວກເຮົາຈະເຈລະຈາຢ່າງເປີດເຜີຍ ແລະ ກົງໄປກົງມາ ບໍ່ພຽງແຕ່ໃນບັນຫາການຄ້າ ເທົ່ານັ້ນ ຫາກຍັງໃນບັນດາບັນຫາກ່ຽວຂ້ອງອີກ. ຂ້າພະເຈົ້າຢືນຢັນວ່າ, ຊູແອດ ຈະມີໜ້າຢູ່ຫວຽດນາມ ຢ່າງຍາວນານ ແລະ ຈະມີການເຄື່ອນໄຫວຢ່າງຕັ້ງຫນ້າກວ່າອີກ.”