ງານຊຸມນຸມມິດຕິງສະເຫຼີມສະຫຼອງ 65 ປີແຫ່ງວັນສ້າງຕັ້ງການພົວພັນທາງດານທູດ ຫວຽດນາມ - ສະຫະພັນ ລັດເຊຍ
(ພາບ: Ngoc An)
|
(vovworld) – ຕອນເຊົ້າວັນທີ 30/1, ຢູ່ຮ່າໂນ້ຍ, ສະຫະພັນບັນດາອົງການມິດຕະພາບ ຫວຽດນາມ ແລະ ສະມາຄົມມິດຕະພາບ ຫວຽດນາມ - ສະຫະພັນ ລັດເຊຍ ໄດ້ຈັດຕັ້ງງານຊຸມນຸມມິດຕິງສະເຫຼີມສະຫຼອງ 65 ປີແຫ່ງວັນສ້າງຕັ້ງການພົວພັນທາງດານທູດ ຫວຽດນາມ - ສະຫະພັນ ລັດເຊຍ (30/1/1950 – 30/1/2015) ຢ່າງສົມກຽດ.
ກ່າວຄຳເຫັນທີ່ພິທີສະເຫຼີມສະຫຼອງ, ທ່ານປະທານສະມາຄົມມິດຕະພາບ ຫວຽດນາມ - ສະຫະພັນ ລັດເຊຍ ດ່າວຈ້ອງທິ ຢັ້ງຢືນວ່າ: ໃນຕະຫຼອດ 65 ປີຜ່ານມາ, ນັບແຕ່ເມື່ອ 2 ປະເທດສ້າງຕັ້ງການພົວພັນທາງການທູດ, ການພົວພັນ 2 ຝ່າຍໄດ້ພັດທະນາອັນດີງາມນັບທັງລວງກ້ວາງ ແລະ ລວງເລິກໃນທຸກຂົງເຂດ. 2 ປະເທດໄດ້ສ້າງຕັ້ງກົນໄກໂອ້ລົມສົນທະນາຍຸດທະສາດເປັນປະຈຳ, ແລກປ່ຽນຄະນະຜູ້ແທນຂັ້ນສູງ, ບັນດາການພົບປະລະຫວ່າງການນຳ 2 ປະເທດເພື່ອແລກປ່ຽນບັນດາບັນຫາປ້ອງກັນຄວາມສະຫງົບ, ສະຖຽນລະພາບດ້ານການເມືອງທີ່ຕ່າງຝ່າຍຕ່າງມີຄວາມສົນໃຈ, ສົມທົບກັນຢ່າງແໜ້ນແຟ້ນໃນບັນດາເວທີປາໄສສາກົນ ແລະ ພາກພື້ນເປັນປະຈຳ.
ອຸປະທູດຊົ່ວຄາວສະຫະພັນ ລັດເຊຍ ປະຈຳ ຫວຽດນາມ ທ່ານ Vadim Vladimirovich Bublikov ກໍ່ຢັ້ງຢືນບັນດາຂົງເຂດບຸລິມະສິດລະຫວ່າງ 2 ປະເທດໃນໄລຍະຈະມາເຖິງເພື່ອຮັດແໜ້ນການພົວພັນຮ່ວມມື 2 ຝ່າຍ:
“ພວກຂ້າພະເຈົ້າຈະສືບຕໍ່ເພີ່ມທະວີການຮ່ວມມືດ້ານເສດຖະກິດເພື່ອເພີ່ມທະວີປະລິມານການຄ້າ 2 ຝ່າຍຕາມຈຸດໝາຍໄດ້ວາງອອກ. ພວກຂ້າພະເຈົ້າກໍ່ຊຸກຍູ້ສາຍພົວພັນຮ່ວມມືໃນບັນດາຂົງເຂດທີ່ບັນລຸໄດ້ຫຼາຍໝາກຜົນຕັ້ງໜ້າໃນໄລຍະຜ່ານມາຄືພະລັງງານ ແລະ ນ້ຳມັນອາຍແກັສ. ຫວັງວ່າເຊັນສັນຍາການຄ້າເສລີ (FTA) ລະຫວ່າງບັນດາປະເທດສະມາຊິກສຳພັນທະມິດພາສີ ແລະ ຫວຽດນາມ ໃນອາດຈະໄດ້ຮັບການລົງນາມໃນ 6 ເດືອນຕົ້ນປີນີ້.”
ເນື່ອງໃນໂອກາດນີ້, ໂດຍຕາງໜ້າໃຫ້ການນຳພັກ, ລັດ, ທ່ານຮອງນາຍົກລັດຖະມົນຕີ ຮ່ວາງຈູງຫາຍ ໄດ້ມອບຫຼຽນໄຊແຮງງານຊັ້ນໜຶ່ງໃຫ້ແກ່ສະມາຄົມມິດຕະພາບ ຫວຽດນາມ - ສະຫະພັນລັດເຊຍ, ເພື່ອແນໃສ່ຮັບຮູ້ບັນດາຜົນງານໃນການປະຕິບັດງານ, ປະກອບສ່ວນຕັ້ງໜ້າຊຸກຍູ້ການພົວພັນມິດຕະພາບ, ການຮ່ວມມືລະຫວ່າງປະຊາຊົນ ຫວນຽດນາມ ແລະ ປະຊາຊົນ ໂຊວຽດ ໃນເມື່ອກ່ອນ ແລະ ສະຫະພັນລັດເຊຍ ໃນປະຈຸບັນ.