ພິທີສະເຫຼີມສະຫຼອງຢູ່ກວາງຫງາຍ-ຫວຽດນາມ
(ພາບ: quangngai.gov.vn)
(vovworld) – ການເຄື່ອນໄຫວຕ່າງໆເພື່ອສະເຫຼີມສະຫຼອງ 68 ປີແຫ່ງວັນໄຊຊະນະ ຟາດຊິດຖືກຈັດຂຶ້ນໃນວັນທີ 9/5 ຢູ່ຫຼາຍປະເທດໃນໂລກ, ໃນນັ້ນມີ ຫວຽດນາມ. ຕອນເຊົ້າວັນທີ 9/5, ຄະນະກຳມະການປະຊາຊົນແຂວງ, ສະຫະສະມາຄົມບັນດາອົງການມິດຕະພາບແຂວງ ແຄ໋ງຮ່ວາ ໄດ້ສົມທົບກັບອົງການຮ່ວມທຸລະກິດ Vietso Petro ຈັດຕັ້ງພິທີສະເຫຼີມສະຫຼອງເຫດການນີ້ ແລະ 59 ປີແຫ່ງວັນໄຊຊະນະ ດ້ຽນບຽນຝູ (7/5/1954). ຜູ້ຕາງໜ້າບັນດາອົງການ, ຫົວໜ່ວຍຮ່ວມທຸລະກິດ, ຮ່ວມສຳພັນລະຫວ່າງສະຫະພັນ ລັດເຊຍ ແລະ ຫວຽດນາມ ຢູ່ແຂວງແຄ໋ງຮ່ວາ ໄດ້ຖະຫວາຍທູບທຽນ, ວາງພວງມາລາຢູ່ອະນຸສາວະລີນັກຮົບ ໂຊວຽດ - ລັດເຊຍ - ຫວຽດນາມ ທີ່ໄດ້ເສຍສະຫຼະຊີວິດເພື່ອສັນຕິພາບ ແລະ ສະຖຽນລະພາບຂອງພາກພື້ນ ຢູ່ນະຄອນ ກາມແຣງ. ສ່ວນຢູ່ນະຄອນ ໂຮ່ຈີມິນ, ໃນຕອນເຊົ້າວັນທີ 9/5, ກໍ່ຈັດຕັ້ງພິທີສະເຫຼີມສະຫຼອງເຫດການນີ້. ບັນດາຜູ້ແທນເຂົ້າຮ່ວມພິທີສະເຫຼີມສະຫຼອງຢືນຢັນວ່າ: ໄຊຊະນະ ຟາດຊິດມີຄວາມໝາຍພິເສດ ບໍ່ພຽງແຕ່ສຳລັບປະຊາຊົນລັດເຊຍ ເທົ່ານັ້ນ ຫາຍັງສຳລັບທົ່ວໂລກອີກດ້ວຍ. ສຳລັບຫວຽດນາມ, ໄຊຊະນະນີ້ໄດ້ປະກອບສ່ວນເຮັດໃຫ້ລະບົບລ່າເມືອງຂຶ້ນຖືກພັງລະລາຍ, ຊ່ວຍໃຫ້ ຫວຽດນາມ ດຳເນີນການປະຕິວັດເດືອນສິງຫາສຳເລັດຜົນ. ກ່າວຄຳເຫັນນະພິທີ, ທ່ານ Vladimir Klimov, ຫົວໜ້າສະຖານກົງສູນສະຫະພັນລັດເຊຍ ປະຈຳນະຄອນ ໂຮ່ຈີມິນ ເວົ້າວ່າ:
“ແຕ່ດົນນານມາແລ້ວ, ປະຊາຊົນ ລັດເຊຍ ແລະ ຫວຽດນາມ ຍາມໃດກໍ່ມີຄວາມສະໜິດຕິດພັນກັນຍ້ອນວ່ານ້ຳໃຈຂອງລັດທິຮັກຊາດ, ດ້ວຍນ້ຳໃຈມິດຕະພາບບໍລິສຸດຜຸດຜ່ອງທີ່ບໍ່ອາດທຳລາຍໄດ້.ດັ່ງນັ້ນຊາວ ຫວຽດນາມ ແຕ່ລະຄົນຍາມໃດກໍ່ຈົດຈຳ ແລະ ເຄົາລົບໄຊຊະນະທີ່ຍິ່ງໃຫຍ່ນີ້, ສ່ວນຢູ່ລັດເຊຍ ຍາມໃດກໍ່ຄິດເຖິງວັນທີ 30/4 ເຊິ່ງແມ່ນວັນປົດປ່ອຍພາກໃຕ້ ຫວຽດນາມ ແລະ ວັນທີ 7/5 ແມ່ນວັນໄຊຊະນະດ້ຽນບຽນຝູ. ຂ້າພະເຈົ້າເຊື່ອໝັ້ນວ່າ: ເລື່ອງສຶກສາອົບຮົມລຸ້ນໜຸ່ມຂອງ 2 ປະເທດບົນຈິດໃຈດັ່ງນັ້ນແມ່ນການເພີ່ມພຸນຄຸນສ້າງສາຍພົວພັນ 2 ຝ່າຍຂອງພວກເຮົາ”
ຢູ່ປະເທດລັດເຊຍ ກໍ່ໄດ້ດຳເນີນການເຄື່ອນໄຫວຕ່າງໆເພື່ອສະເຫຼີມສະຫຼອງ 68 ປີແຫ່ງວັນໄຊຊະນະ ຟາດຊິດ. ເຊິ່ງພົ້ນເດັ່ນແມ່ນຂະບວນແຫ່ຢູ່ຈັດຕູລັດແດງ ດ້ວຍການເຂົ້າຮ່ວມຂອງທ່ານປະທານາທິບໍດີ Vladimir Putin, ນາຍົກລັດຖະມົນຕີ Dmitry Medvedep... ທ່ານເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສສ ຫວຽດນາມ ປະຈຳ ລັດເຊຍ ຟ້າມຊວນເຊີນ ກໍ່ເຂົ້າຮ່ວມດ້ວຍຖານະເປັນແຂກຖືກເຊີນ.
ແລະກໍເນື່ອງໃນໂອກາດນີ້, ຫນັງສືພິມ Quan doi nhan dan ສຽງຂອງກອງທັບປະຊາຊົນຫວຽດນາມ ສະບັບອອກວັນທີ 9/5 ໄດ້ລົງພິມບົດຂຽນດ້ວຍຫົວຂໍ້ວ່າ: “ສອງຊາດ-ສົງຄາມສອງຄັ້ງ-ໄຊຊະນະສອງເທື່ອ“ ຊື່ງໄດ້ຍ້ອງຍໍສັນລະເສີນໄຊຊະນະອັນສະຫງ່າອົງອາດ, ປະຫວັດສາດອັນສະຫງ່າລາສີຂອງສອງຊາດ, ກໍ່ຄືຄວາມສະໜິດຕິດພັນອັນຍາວນານຂອງສາຍພົວພັນມິດຕະພາບທີ່ເປັນມູນເຊື້ອລະຫວ່າງຫວຽດນາມ-ສະຫະພັນລັດເຊຍ. ບົດໜັງສືພິມໄດ້ຂຽນວ່າ: ໄຊຊະນະວັນທີ 30/4 ຢູ່ຫວຽດນາມ ແລະ ວັນທີ 9/5 ຢູ່ລັດເຊຍ ລ້ວນແຕ່ສ້າງວັນຕິພາບໃຫ້ແກ່ສອງປະເທດ. ຄວາມຊົງຈຳກ່ຽວກັບບັນດາວິລະກຳອັນໃຫ່ຍຫຼວງຂອງຊາດແມ່ນຊັບສົມບັດດ້ານຈິດໃຈຂອງລຸ່ນປະຈຸບັນຢູ່ຫວຽດນາມ ກໍ່ຄືຢູ່ລັດເຊຍ. ຕາມບົດໜັງສືພິມດັ່ງກ່າວແລ້ວ, ທຸກຊົນຊາດລ້ວນແຕ່ຕ້ອງຈື່ຈຳໄຊຊະນະຂອງຊາດຕົນ, ຕ້ອງມີຄວາມເອກອ້າງທະນົງໃຈກ່ຽວກັບຜູ້ທີ່ໄດ້ປົກປັກຮັກສາປະເທດຊາດ. ບົດໜັງສືພິມໄດ້ສະຫລຸບວ່າ: ເຖິງວ່າ, ມີຫຼາຍສິ່ງຫຼາຍຢ່າງໄດ້ປ່ຽນແປງໄປແລ້ວກໍ່ຕາມແຕ່ຢູ່ຫວຽດນາມ ກໍ່ຄືລັດເຊຍ, ທຸກຄົນກໍ່ລ້ວນແຕ່ຄິດເຖິງ “ວັນໄຊະນະ“ ອັນສະຫງ່າອົງອາດ ແລະ ພ້ອມກັນນັ້ນໄດ້ຕັດສິນໃຈສ້າງ ແລະ ປັບປຸງນ້ຳໃຈມິດຕະພາບລະຫວ່າງສອງຊາດໃຫ້ນັບມື້ນັບໝັ້ນຄົງເຂັ້ມແຂງ.
ພິທີສະເຫຼີມສະຫຼອງຢູ່ລັດເຊຍ
(ພາບ:vov.vn)
ບັນດາການເຄື່ອນໄຫວສະເຫຼີມສະຫຼອງ 68 ປີແຫ່ງວັນໄຊຊະນະຟາດຊິດ (9/5/1945) ໄດ້ຖືກຈັດຂຶ້ນຢູ່ຫຼາຍປະເທດ ເພື່ອຫວນຄືນວິລະກຳທີ່ອົ່ງອາດກ້າຫານຂອງກອງທັບ ແລະ ປະຊາຊົນໂຊວຽດ ໃນການຕໍ່ສູ້ອັນທຸກຍາກລຳບາກ ເພື່ອປົກປັກຮັກສາປະເທດຊາດ ແລະ ກູ້ເອົາມວນມະນຸດຫລຸດໃຫ້ພົ້ນອອກຈາກແອກຄອບຄອງຂອງຟາດຊິດ. ວັນທີ 9/5, ຢູ່ສະຫະພັນລັດເຊຍ, ໄດ້ຈັດການສວນສະໜາມສະເຫຼີມສະຫຼອງເຫດການນີ້. ກ່ອນໜ້ານັ້ນ, ວັນທີ 8/5, ບັນດາການນຳລັດເຊຍ ແລະ ຜູ້ຕາງໜ້າບັນດາພັກການເມືອງ, ອົງການອະດີດນັກຮົບ, ອົງການສັງຄົມ….ໄດ້ໄປວາງພວງມາລາທີ່ສຸສານນັກຮົບນິລະນາມຢູ່ກຳແພງວັງແກຼມລີ. ໃນວັນດຽວກັນ, ການນຳ ສເຊັກ ໄດ້ເຂົ້າຮ່ວມການເຄື່ອນໄຫວອາໄລຫາຢູ່ສຸສານນັກຮົບນິລະນາມທີ່ນະຄອນຫຼວງປາຣາຮາ. ຢູ່ແບກແລງ ປະເທດເຢຍລະມັນ, ບັນດາຜູ້ຕາງໜ້າລັດຖະບານ ແລະ ສະພາແຫ່ງຊາດເຢຍລະມັນ, ຜູ້ຕາງໜ້າສະຖານທູດລັດເຊຍ, ປະຊາຄົມບັນດາປະເທດເອກະລາດ (SNG), ແລະ ອົງການນາໂຕ ປະຈຳປະເທດນີ້... ໄດ້ວາງດອກໄມ້ສົດຢູ່ອະນຸສາວະລີບັນດານັກຮົບໂຊວຽດ ປົດປ່ອຍແບກແລງ ທີ່ສວນສາທາລະນະ Treptov. ຢູ່ປາຣີ ປະເທດຝະລັ່ງ, ປະທານາທິບໍດີ Francois Hollande ເປັນປະທານພິທີສະເຫຼີມສະຫຼອງ “ວັນໄຊຊະນະຢູ່ເອີລົບ“ ເນື່ອງໃນໂອກາດ 68 ປີແຫ່ງວັນສິ້ນສຸດສົງຄາມໂລກຄັ້ງທີ 2. ການເຄື່ອນໄຫວສະເຫຼີມສະຫຼອງຕ່າງໆທີ່ອຸດດົມສົມບູນກໍ່ໄດ້ຈັດຂຶ້ນຢູ່ແດນມາກ, ບູນກາຣີ, ແຟງລັງ….