ສະເຫຼີມສະຫຼອງວັນສ້າງຕັ້ງການ ພົວພັນທາງການທູດລະຫວ່າງ ຫວຽດນາມ-ອິນເດຍ
ກຳປັ່ນກອງທັບເຮືອອິນເດຍ Sudarshini
(ພາບ:ອິນເຕີແນັດ)
(vovworld) - ໃນຊຸມມື້ນີ້, ຢູ່ນະຄອນດ່ານັງ, ໄດ້ຈັດບັນດາການເຄື່ອນໄຫວພົບປະແລກປ່ຽນວັດທະນະທຳ, ການຄ້າ, ການລົງທຶນລະຫວ່າງບັນດາວິສາຫະກິດຫວຽດນາມ ແລະ ອິນເດຍ ເນື່ອງໃນໂອກາດສະເຫຼີມສະຫຼອງ 40 ປີແຫ່ງວັນສ້າງຕັ້ງການພົວພັນທາງການທູດລະຫວ່າງຫວຽດນາມ-ອິນເດຍ, 5 ປີແຫ່ງວັນສ້າງຕັ້ງການພົວພັນຄູ່ຮ່ວມມືຍຸດທະສາດລະຫວ່າງຫວຽດນາມ-ອິນເດຍ, 20 ປີແຫ່ງວັນສ້າງຕັ້ງການພົວພັນລະຫວ່າງອິນເດຍ-ອາຊຽນ. ໃນວັນທຳອິດຂອງປີໃໝ່ 2013, ກຳປັ່ນກອງທັບເຮືອອິນເດຍ Sudarshini ໄດ້ເຂົ້າທຽບທ່າກຳປັ່ນຕຽນຊາ ເລີ່ມຕົ້ນການຢ້ຽມຢາມນະຄອນດ່ານັງ. ໃນຂອບເຂດການຢ້ຽມຢາມ, ນາຍທະຫານ, ລູກເຮືອກຳປັ່ນກອງທັບເຮືອອິນເດຍ ໄດ້ເຂົ້າຮ່ວມງານພົບປະແລກປ່ຽນວັດທະນະທຳ, ກິລາກັບກອງບັນຊາການເຂດ C ກອງທັບເຮືອ, ທ່ຽວຊົມຄຸ້ມຖະໜົນເກົ່າໂຮ້ຍອານ, ເທື່ອທຽນເຫ້ວ. ຕອນຄ່ຳຂອງວັນທີ 2/1, ກອງສິລະປະກອນ Shwaas Rock Bank ໄດ້ສະແດງສິລະປະ ແລະ ພົບປະແລກປ່ຽນກັບນັກສຶກສາມະຫາວິທະຍາໄລດ່ານັງ. ທ່ານເລືອງມິນເຊີມ ຫົວໜ້າພະແນກພົວພັນກັບຕ່າງປະເທດນະຄອນດ່ານັງ ໃຫ້ຮູ້ວ່າ:
“ບັນດາການເຄື່ອນໄຫວນີ້ມີຄວາມໝາຍທີ່ສຸດສຳລັບພວກຂ້າພະເຈົ້າ. ເປັນຄັ້ງທຳອິດທີ່ຝ່າຍອິນເດຍ ໄດ້ຈັດການເຄື່ອນໄຫວຕ່າງໆໃນຫຼາຍຂົງເຂດ. ຜ່ານນັ້ນ, ບັນດານັກລົງທຶນດ່ານັງ ກໍ່ຄືເຂດພາກກາງຫວຽດນາມ ຈະຮູ້ຈັກກັບອິນເດຍ ແລະ ມີແຜນການຮ່ວມມື ແລະ ຂຸດຄົ້ນຕະຫຼາດນີ້. ນີ້ກໍ່ແມ່ນໂອກາດເພື່ອໃຫ້ນັກທຸລະກິດອິນເດຍ ຮູ້ຮັກເຖິງນະຄອນດ່ານັງ ເພື່ອເພີ່ມທະວີການຮ່ວມມື, ພິເສດແມ່ນການຮ່ວມມືດ້ານການຄ້າ, ການລົງທຶນ ແລະ ການທ່ອງທ່ຽວ“