ວັນທີ 22/12 ແມ່ນວັນສະເຫລີມສະຫລອງ 67 ປີ ແຫ່ງວັນສ້າງຕັ້ງກອງທັບປະຊາຊົນ ຫວຽດນາມ, 22 ປີ ແຫ່ງວັນທົ່ວປວງຊົນປ້ອງກັນຊາດ. ໃນ 67 ປີ ຜ່ານມາ, ກອງທັບປະຊາຊົນຫວຽດນາມ ໄດ້ຕໍ່ສູ້, ເຕີບໂຫຍ່ ແລະ ນັບມື້ນັບຢັ້ງຢືນໃຫ້ເຫັນກົກເຄົ້າ, ຄຸນນະທາດຂອງກອງທັບປະຊາຊົນຫວຽດນາມ ຊຶ່ງແມ່ນກອງທັບພາຍໃຕ້ການນຳພາຂອງ ພັກ ໂດຍປະຊາຊົນ ແລະ ເພື່ອປະຊາຊົນ. ກອງທັບປະຊາຊົນຫວຽດນາມ ໄດ້ພ້ອມກັບຊາດສ້າງເປັນຜົນງານວິລະກຳຢ່າງພິລະອາດຫານໃນການຕໍ່ສູ້ປົດປ່ອຍປະເທດຊາດ, ທ້ອນໂຮມປະເທດເປັນເອກະພາບ. ເນື່ອງໃນໂອກາດນີ້, ຫນັງສືພີມ Quan doi nhan dan ສຽງຂອງກອງທັບປະຊາຊົນຫວຽດນາມ ໄດ້ມີບົດນຳພາຍໃຕ້ຫົວຂໍ້ວ່າ: “ກຳລັງແຮງຂອງກອງທັບ ຈາກປະຊາຊົນ, ເພື່ອປະຊາຊົນ“ ໃນນັ້ນມີຕອນໄດ້ຂຽນວ່າ: ໃນກິດຈະການແຫ່ງການປ່ຽນແປງໃຫມ່, ໄປຄຽງຄູ່ກັບການເຊີດຊູສະຕິລະວັງຕົວ, ເຈດຈຳນົງແຫ່ງການຕໍ່ສູ້ປົກປັກຮັກສາພາລະກິດປະຕິວັດຂອງພັກ, ລັດ ແລະ ປະຊາຊົນໄວ້, ທະຫານຍັງຕັ້ງຫນ້າເຂົ້າຮ່ວມພັດທະນາເສດຖະກິດ ສັງຄົມຢ່າງໝັ້ນຄົງ, ມີຫນ້າຢ່າງທັນການຢູ່ບັນດາເຂດຈຸດສຸມ, ບ່ອນຫຍຸ້ງຍາກ, ລຳບາກ, ເຂດຫ່າງໄກສອກຫລິກ, ເຂດຊາຍແດນ ແລະ ໝູ່ເກາະ, ຊ່ວຍເຫລືອບັນດາທ້ອງຖິ່ນສ້າງຮາກຖານການເມືອງ, ຮັບປະກັນຄວາມເປັນລະບຽບຮຽບຮ້ອຍທົ່ວສັງຄົມ, ຊ່ວຍເຫລືອປະຊາຊົນໃນການລົບລ້າງຄວາມອຶດຫິວ ຫລຸດຜ່ອນຄວາມທຸກຍາກ, ເຮັດຫລ້ອນພາລະຫນ້າທີ່ຂອງກອງກຳລັງຕໍ່ສູ້, ກອງກຳລັງປະຕິບັດງານ, ກອງກຳລັງທຳການຜະລິດ. ບົດນຳໄດ້ເນັ້ນຫນັກວ່າ: ເພື່ອເຮັດຫລ້ອນພາລະກຳປະຫວັດສາດຂອງຕົນ, ໃນໄລຍະປະຕິວັດໃຫມ່, ມີຫລັກການຫນຶ່ງດຽວ ນັ້ນແມ່ນ ຍາມໃດ ກອງທັບ ກໍຕ້ອງຢູ່ພາຍໃຕ້ການນຳພາໂດຍກົງ ແລະ ເດັດຂາດຂອງພັກໃນທຸກດ້ານ. ພ້ອມກັນນັ້ນ ສືບຕໍ່ຄົ້ນຄ້ວາ, ປ່ຽນໃຫມ່ວຽກງານການຂົນຂວາຍປະຊາຊົນ, ໃກ້ຊິດຕິດແທດກັບປະຊາຊົນ, ຊ່ວຍເຫລືອປະຊາຊົນຫລາຍກວ່າອີກ.