ສະເໜີຕົວສູນກຳມະການການຄ້າທະນາຍຄວາມຫວຽດນາມ
ສະເໜີຕົວສູນກຳມະການການຄ້າທະນາຍຄວາມຫວຽດນາມ
(ພາບ: VTV)
(vovworld) - ວັນທີ 21/4 ສູນກຳມະການການຄ້າທະນາຍຄວາມຫວຽດນາມ ໄດ້ຈັດພິທີສະເໜີຕົວ ແລະ ທຳການເຄື່ອນໄຫວຢ່າງເປັນທາງການ. ນີ້ແມ່ນສູນກຳມະການທີ 15 ທີ່ໄດ້ຮັບອະນຸຍາດສ້າງຕັ້ງຢູ່ ຫວຽດນາມ, ແມ່ນອົງການບໍ່ຂຶ້ນກັບລັດຖະບານ ແລະ ເຄື່ອນໄຫວເປັນເອກະລາດ ບໍ່ແມ່ນເພື່ອກຳໄລຂອງສະມາຄົມທະນາຍຄວາມ ຫວຽດນາມ. ກ່າວຄວາມເຫັນນະພິທີສະເໜີຕົວ, ທ່ານ ເຈືອງຮ່ວາບິ່ງ, ຮອງນາຍົກລັດຖະມົນຕີ ໄດ້ຕີລາຄາສູງບົດບາດ ແລະ ພາລະໜ້າທີ່ການເຄື່ອນໄຫວຂອງສະມາຄົມທະນາຍຄວາມ ຫວຽດນາມ; ໃນນັ້ນມີສູນກຳມະການການຄ້າທະນາຍຄວາມ ຫວຽດນາມ, ປະກອບສ່ວນກໍ່ສ້າງ ແລະ ປະຕິບັດກົນໄກມາດຕະການແກ້ໄຂຄວາມຂັດແຍ້ງກັນຢ່າງສະໜິດສະໜົມ, ດ້ວຍຄວາມໄວ້ເນື້ອເຊື່ອໃຈ, ພາວະວິໄສ, ຍຸຕິທຳ, ມີຄວາມສະດວກ ແລະ ມີປະສິດທິຜົນ, ປົກປ້ອງຜົນປະໂຫຍດອັນຊອບທຳຂອງຝ່າຍຕ່າງໆ. ທ່ານ ເຈືອງຮ່ວາບິ່ງ, ຮອງນາຍົກລັດຖະມົນຕີ ເຊື່ອໝັ້ນວ່າ, ດ້ວຍຖັນແຖວບັນດານັກກຳມະການວິຊາການ, ເຊິ່ງແມ່ນບັນດາທະນາຍຄວາມ, ນັກກົດໝາຍ, ບັນດານັກຊ່ຽວຊານດ້ານເສດຖະກິດ, ການເງິນ, ການຄ້າ ແລະ ການລົງທຶນ, ບັນດາສາສະດາຈານ, ດຣ ທີ່ມີປະສົບການ ແລະ ມີອິດທິພົນຊື່ສຽງໃນຂົງເຂດແກ້ໄຂການຂັດແຍ້ງກັນນັ້ນ, ສູນກຳມະການການຄ້າທະນາຍຄວາມ ຫວຽດນາມຈະໜູນຊ່ວຍດ້ານນິຕິກຳ ແລະ ໃຫ້ຄຳປຶກສາຢ່າງມີປະສິດທິຜົນ, ຊ່ວຍປະຊາຄົມວິສາຫະກິດ, ບັນດາອົງການຈັດຕັ້ງ ແລະ ສ່ວນບຸກຄົນໃນການແກ້ໄຂການຂັດແຍ້ງກັນທີ່ກ່ຽວຂ້ອງເຖິງການເຄື່ອນໄຫວດ້ານການຄ້າ… ເພື່ອບັນລຸໄດ້ຂໍ້ຕົກລົງດີທີ່ສຸດ. ປະຈຸບັນ, ສູນກຳມະການການຄ້າທະນາຍຄວາມ ຫວຽດນາມ ແມ່ນອົງການກຳມະການທີ່ມີອິດທິພົນ ແລະ ໄດ້ຮັບຄວາມໄວ້ເນື້ອເຊື່ອໃຈຈາກບັນດາວິສາຫະກິດ, ອົງການເສດຖະກິດພາຍໃນ ແລະ ຕ່າງປະເທດ.