ສາກົນສືບຕໍ່ຄັດຄ້ານເລື່ອງຈີນກໍ່ຄວາມເຄັ່ງຕຶງຢູ່ທະເລຕາເວັນອອກ
(vovworld)- ຫາງສຽງສາກົນສືບຕໍ່ອອກສຽງຄັດຄ້ານພາຍຫລັງຝ່າຍຈີນ ນຳຮ້ານເຈາະນຳ້ມັນ HD 981 ເຂົ້າເຄື່ອນໄຫວຢູ່ເຂດອະພິສິດເສດຖະກິດຂອງຫວຽດນາມ. ຫລາຍປະເທດຕຳນິຕິຕຽນຈີນ ແລະ ຖືວ່າ ການກະທຳນີ້ ແມ່ນລະເມີດອະທິປະໄຕຂອງຫວຽດນາມ ແລະ ເຮັດໃຫ້ສະພາບການຢູ່ພາກພື້ນເຄັ່ງຕຶງຂຶ້ນຕື່ມ.
ຄຳຖະແຫລງລ້າສຸດໃນວັນທີ 9/5, ຝ່າຍ ຍີ່ປຸ່ນ ຢືນຢັນອີກຄັ້ງຫນື່ງ ວ່າ ປະເທດນີ້ ຖືເລື່ອງຈີນ ນຳຮ້ານເຈາະນຳ້ມັນເຂົ້າເຄື່ອນໄຫວຢູ່ເຂດອະພິສິດເສດຖະກິດຂອງຫວຽດນາມຢູ່ທະເລຕາເວັນອອກແມ່ນການກະທຳເກາະຜິດທີ່ມີຕໍ່ຄວາມໝັ້ນຄົງຂອງພາກພື້ນ ພ້ອມທັງເນັ້ນຫນັກວ່າ: ປັກກ່ີງ ຄວນເຮັດແຈ້ງຕໍ່ຫວຽດນາມ ແລະ ປະຊາຄົມໂລກກ່ຽວກັບບັນດາການເຄ່ືອນໄຫວເດີນທະເລນັບມື້ນັບເພີ່ມຂຶ້ນຂອງປະເທດນີ້ ຢູ່ ທະເລຕາເວັນອອກ. ວັນທີ 9/5, ທ່ານ ລັດຖະມົນຕີການຕ່າງປະເທດ ຍີ່ປຸ່ນ Fumio Kishida ໄດ້ເນັ້ນຫນັກວ່າ: ປັກກິ່ງ ຕ້ອງອະທິບາຍບັນດາຫລັກຖານຢ່າງຈະແຈ້ງ ແລະ ລະອຽດກ່ຽວກັບບັນດາການກະທຳດັ່ງກ່າວສຳລັບ ຫວຽດນາມ ແລະ ປະຊາຄົມໂລກ.
ໃນວັນດຽວກັນ, ໂຄສົກຂອງຜູ້ຕາງຫນ້າການທູດຂັ້ນສູງກ່ຽວກັບນະໂຍບາຍປ້ອງກັນຄວາມສະຫງົບ ແລະ ການຕ່າງປະເທດ, ສະຫະພາບເອີລົບ ໄດ້ຖະແຫລງວ່າ: ສະຫະພາບເອີລົບ ມີຄວາມວິຕົກກັງວົນເປັນພິເສດຕໍ່ບັນດາການກະທຳຕາມລຳພັງຝ່າຍດຽວ ອາດຈະສົ່ງຜົນສະທ້ອນເຖິງສະພາບການຢູ່ພາກພື້ນ.
ແລະກໍໃນວັນທີ 8/5, ກະຊວງການຕ່າງປະເທດ ອາເມລິກາ ອີກຄັ້ງຫນຶ່ງ ສະແດງຄວາມວິຕົກກັງວົນຕໍ່ບັນດາການກະທຳຂອງຈີນ ຢູ່ ທະເລຕາເວັນອອກ ແລະ ຢືນຢັນ ສະພາບຄວາມເຄັ່ງຕຶງປະຈຸບັນ ແມ່ນຍ້ອນຈີນກໍ່ຂຶ້ນ. ໃນການຕອບສຳພາດທີ່ສູນສື່ສານ ຢູ່ນະຄອນຫລວງ ວິຊິງຕັນ, ທ່ານ Marie Harf, ຮອງໂຄສົກກະຊວງການຕ່າງປະເທດ ອາເມລິກາ ໄດ້ເນັ້ນຫນັກວ່າ:
“ເລື່ອງຈີນ ນຳຮ້ານເຈາະນຳ້ມັນເຂົ້າເຂດທະເລຂອງຫວຽດນາມ ແມ່ນການກະທຳເກາະຜິດ ແລະ ອັນຕະລາຍທີ່ສຸດ, ມັນອາດຈະພາໄປເຖິງການຄິດໄລ່ທີ່ຜິດພາດ ແລະ ການກະທຳເກາະຜິດອື່ນ, ເຮັດໃຫ້ສະພາບການຢູ່ທະເລຕາເວັນອອກເຄັ່ງຕຶງຂຶ້ນຕື່ມ. ສິ່ງທີ່ໄດ້ ແລະ ພວມເກີດຂຶ້ນຢູ່ທະເລຕາເວັນອອກ ແມ່ນໄປຝືນກັບສິ່ງທີ່ ອາເມລິກາປາດຖະຫນາ.”