ທ່ານ ຫງວຽນເຕີ໋ນຢຸງ ມອບນາມມະຍົດ ວິລະຊົນກຳລັງປະກອບ
ອາວຸດປະຊາຊົນ ໃຫ້ກົມໃຫຍ່ອຸດສາຫະກຳປ້ອງກັນຊາດ
(ພາບ: tintuc.vn)
(vovworld) – ກ່າວຄຳເຫັນທີ່ພິທີສະເຫຼີມສະຫຼອງ 70 ປີ ແຫ່ງວັນມູນເຊື້ອກົມໃຫຍ່ອຸດສາຫະກຳປ້ອງກັນຊາດ (ກະຊວງປ້ອງກັນປະເທດ (15/9/1945 – 15/9/2015) ດຳເນີນໃນຕອນເຊົ້າວັນທີ 15/9 ຢູ່ຮ່າໂນ້ຍ, ທ່ານນາຍົກລັດຖະມົນຕີ ຫງວຽນເຕີ໋ນຢຸງ ເນັ້ນໜັກວ່າ: ກົມໃຫຍ່ອຸດສາຫະກຳປ້ອງກັນຊາດ ຕ້ອງຊຸມໃສ່ກໍ່ສ້າງພື້ນຖານອຸດສາຫະກຳປ້ອງກັນຊາດກ້າວໜ້າ, ທັນສະໄໝ, ປະກອບສ່ວນສຳຄັນ, ຍົກສູງກຳລັງບົ່ມຊ້ອນດ້ານ
ປ້ອງກັນຊາດ - ປ້ອງກັນຄວາມສະຫງົບຢ່າງແທດຈິງ, ກາຍເປັນພາກສ່ວນໜຶ່ງທີ່ສຳຄັນຂອງພື້ນຖານອຸດສາຫະກຳແຫ່ງຊາດ. ທ່ານນາຍົກລັດຖະມົນຕີ ຫງວຽນເຕີ໋ນຢຸງ ເນັ້ນໜັກວ່າ:
“ໃນຊຸມປີຈະມາເຖິງ, ຂະແໜງອຸດສາຫະກຳປ້ອງກັນຊາດໄດ້ມີບັນດາເງື່ອນໄຂຄົບຖ້ວນໂດຍພື້ນຖານ ເພື່ອສຸມກຳລັງຜະລິດຢ່າງມີຈຸດສຸມ, ມີລັກສະນະບຸກທະລຸສຳລັບອາວຸດທັນສະໄໝບາງປະເພດ, ຕອບສະໜອງຄວາມຕ້ອງການປົກປັກຮັກສາປະເທດຊາດໃນສະພາບການໃໝ່. ຕ້ອງສຸມໃສ່ເປັນເຈົ້າການເຕັກໂນໂລຢີ, ຜະລິດໄວ, ມີປະສິດທິຜົນສຳລັບລູກສອນໄພກ້າວໜ້າ, ທັນສະໄໝບາງປະເພດ, ເພື່ອຍົກສູງຄວາມສາມາດກຽມພ້ອມສູ້ຮົບ, ກຳລັງຂົ່ມຂູ່, ການຮົບຂອງກອງທັບປະຊາຊົນ ຫວຽດນາມ, ມີກຳລັງແຮງຢ່າງພຽງພໍ ເພື່ອປະຕິບັດບົດບາດຫຼັກແຫຼ່ງແກ່ນສານໃນການປົກປັກຮັກສາຜືນແຜ່ນດິນສັກກະລະບູຊາຂອງປະເທດຢ່າງຄົບຖ້ວນໃນທຸກສະຖານະການ”
ທ່ານນາຍົກລັດຖະມົນຕີ ຮຽກຮ້ອງກົມໃຫຍ່ອຸດສາຫະກຳປ້ອງກັນຊາດ ຕ້ອງສ້າງຖັນແຖວພະນັກງານໃຫ້ມີລະດັບຄວາມຮູ້ດ້ານການເມືອງຢ່າງໝັ້ນຄົງ, ກຳແໜ້ນວິທະຍາສາດການທະຫານ, ເຂົ້າໃຈພຶດຕິກຳຕົວຈິງ, ມີຈີນຕະນາການຍຸດທະສາດແຫຼມຄົນ, ເກັ່ງດ້ານວິທະຍາສາດເຕັກໂນໂລຢີ, ຈົ່ງຮັກພັກດີຕໍ່ລັດ ແລະ ປະຊາຊົນ.
ທີ່ພິທີ, ທ່ານນາຍົກລັດຖະມົນຕີ ຫງວຽນເຕີ໋ນຢຸງ ໄດ້ມອບນາມມະຍົດ ວິລະຊົນກຳລັງປະກອບອາວຸດປະຊາຊົນ ໃຫ້ກົມໃຫຍ່ອຸດສາຫະກຳປ້ອງກັນຊາດ.