ທ່ານເລຂາທິການໃຫຍ່ ຫງວຽນຟູ່ຈ້ອງ ພົບປະກັບຜູ້ແທນ
(ພາບ: TTXVN)
(vovworld) – ວັນທີ 21/9, ຢູ່ຮ່າໂນ້ຍ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ່ຈ້ອງ ໄດ້ເຮັດວຽກກັບຄະນະພັກສະຫະພັນບັນດາສະມາຄົມວັດທະນະທຳ - ສິລະປະຫວຽດນາມ ແລະ ບັນດາສະມາຄົມຂະແໜງສະເພາະສູນກາງ. ພາຍຫຼັງ 15 ປີ ແຫ່ງການປະຕິບັດມະຕິສູນກາງທີ 5 (ຊຸດທີ 8) ກ່ຽວກັບການກໍ່ສ້າງ ແລະ ພັດທະນາພື້ນຖານວັດທະນະທຳຫວຽດນາມທີ່ກ້າວໜ້າ, ເຂັ້ມຄົ້ນໄປດ້ວຍສີສັນຊາດ; 5 ປີ ແຫ່ງການປະຕິບັດມະຕິ 23 ຂອງກົມການເມືອງ (ຊຸດທີ 10) ກ່ຽວກັບການສືບຕໍ່ກໍ່ສ້າງແລະ ພັດທະນາວັດທະນະທຳ - ສິລະປະໃນໄລຍະໃໝ່, ພື້ນຖານວັດທະນະທຳສິລະປະຫວຽດນາມ ສືບຕໍ່ມີບາດກ້າວພັດທະນາ, ບັນລຸໄດ້ບັນດາຜົນງານທີ່ສຳຄັນ. ກ່າວຄວາມເຫັນຢູ່ທີ່ນີ້, ທ່ານເລຂາທິການໃຫຍ່ ຫງຽນຟູ໋ຈ້ອງ ຮຽກຮ້ອງ ຄະນະພັກສະຫະພັນບັນດາສະມາຄົມວັດທະນະທຳ - ສິລະປະຫວຽດນາມ , ການນຳສະມາຄົມຂະແໜງສະເພາະຄວນຖືເປັນສຳຄັນວຽກງານກໍ່ສ້າງພັກ, ວຽກງານພະນັກງານ, ການຊັບຊ້ອນພະນັກງານຂັ້ນສະມາຄົມ, ຍົກສູງຄວາມຮັບຮູ້ດ້ານການເມືອງ, ຄວາມສາມາດຫົວຄິດປະດິດສ້າງ, ຄວາມຮັບຜິດຊອບຂອງພົນລະເມືອງ, ທັກສະວິຊາຊີບໃຫ້ແກ່ນັກສິລະປະ. ສາມັກຄີກັນ, ລະດົມກຳລັງໃຈ, ສ້າງເງື່ອນໄຂເພື່ອໃຫ້ວັດທະນະທຳ ສິລະປະຕິດແທດກັບຊີວິດການເປັນຢູ່, ມີບັນດາບົດປະພັນທີ່ມີຄຸນນະພາບສູງທາງດ້ານເນື້ອໃນ ແລະ ສິລະປະ, ສ່ອງແສງສະພາບຕົວຈິງຂອງປະເທດຊາດ, ຜົນງານຂອງພາລະກິດປ່ຽນໃໝ່, ສ້າງສາ ແລະ ປົກປັກຮັກສາປະເທດສັງຄົມນິຍົມຢ່າງເລິກເຊິ່ງ.