ກອງປະຊຸມໃຫຍ່ສະຫະພັນຊາວຫນຸ່ມຫວຽດນາມ
ພາບ:http://dantri.com.vn
|
(vovworld)- ຕອນເຊົ້າວັນທີ 28/12, ກອງປະຊຸມໃຫຍ່ສະຫະພັນຊາວຫນຸ່ມຫວຽດນາມ ສືບຕໍ່ມື້ເຮັດວຽກທີ 2, ຫົວຫນ້າບັນດາກະຊວງ, ຂະແຫນງການສູນກາງ ໄດ້ຢືນຢັນວ່າ: ຈະເພີ່ມທະວີການປະສານສົມທົບ ແລະ ສ້າງເງື່ອນໄຂສະດວກເພື່ອເສີມຂະຫຍາຍກຳລັງແຮງໄວຫນຸ່ມກວ່າອີກໃນບັນດາການເຄື່ອນໄຫວ, ເປັນຕົ້ນແມ່ນບັນດາບັນຫາຮັບປະກັນຊີວິດສັງຄົມ ແລະ ດຶງດູດແຫລ່ງຊັບພະຍາກອນມະນຸດຫນຸ່ມໃນການພັດທະນາວິທະຍາສາດເຕັກໂນໂລຊີ.
ທີ່ວາລະປຶກສາຫາລື, ທ່ານນາງ ຟ້າມທິຫາຍຈ່ວຽນ, ລັດຖະມົນຕີວ່າການກະຊວງແຮງງານ ທະຫານເສຍອົງຄະ ແລະ ສັງຄົມ ຕີລາຄາສູງ ການປະກອບສ່ວນຂອງກຳລັງຊາວຫນຸ່ມໃນໄລຍະຜ່ານມາ ພ້ອມທັງໃຫ້ຮູ້ວ່າ ໄລຍະຈະມາເຖິງ, ກະຊວງແຮງງານທະຫານເສຍອົງຄະ ແລະ ສັງຄົມ ຈະສືບຕໍ່ສົມທົບກັບບັນດາອົງການກ່ຽວຂ້ອງຍູ້ແຮງວຽກງານໂຄສະນາ, ຊ່ວຍຊາວຫນຸ່ມມີຄວາມຮັບຮູ້ຢ່າງຖືກຕ້ອງກ່ຽວກັບການກຳນົດວິຊາຊີບ, ເພີ່ມທະວີວຽກງານໃຫ້ຄຳປຶກສາ, ແນະນຳອາຊີບໃນໂຮງຮຽນ, ຄົ້ນຄ້ວາບັນດາລາຍການ, ໂຄງການຫນູນຊ່ວຍໃຫ້ເໝາະສົມກັບແຕ່ລະໝວດເປົ້າໝາຍນັກສຶກສາ, ຊາວຫນຸ່ມ.
ເມື່ອເຕື້ອງເຖິງບົດບາດຂອງຊາວຫນຸ່ມໃນການຄົ້ນຄ້ວາ ແລະ ໝູນໃຊ້ວິທະຍາສາດເຕັກໂນໂລຊີ, ທ່ານ ຫງວຽນກວນ, ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ປາດຖະຫນາວ່າ: ຊາວຫນຸ່ມຈະຮ່ຳຮຽນຢ່າງບໍ່ຢຸດຢັ້ງ ເພື່ອເປັນເຈົ້າການດ້ານວິທະຍາສາດ ແລະ ເຕັກໂນໂລຊີໃຫມ່, ບັນລຸຜົນງານດີເດັ່ນ, ທັດທຽມກັບຊາວຫນຸ່ມບັນດາປະເທດໃນໂລກ. ທ່ານ ຫງວຽນກວນ ກ່າວວ່າ:
“ພວກເຮົາມີພື້ນຖານວິທະຍາສາດ, ຊາວຫນຸ່ມຫລາຍຄົນມີຄວາມເກັ່ງກ້າສາມາດ ແຕ່ບໍ່ມີເງື່ອນໄຂຄົ້ນຄ້ວາວິທະຍາສາດ. ສະນັ້ນ ຫລາຍຄົນຕ້ອງເສີມຂະຫຍາຍພູມປັນຍາຂອງຕົນຢູ່ຕ່າງປະເທດ. ຄວາມຮັບຜິດຊອບຂອງພວກຂ້າພະເຈົ້າແມ່ນເຮັດແນວໃດສ້າງເງື່ອນໄຂສະດວກທີ່ສຸດເພື່ອໃຫ້ຊາວຫນຸ່ມເຂົ້າຮ່ວມການເຄື່ອນໄຫວວິທະຍາສາດເຕັກໂນໂລຊີຂອງປະເທດຊາດ.”
ກ່ອນຫນ້ານັ້ນ, ໃນວາລະໄຂກອງປະຊຸມໃຫຍ່ໃນຕອນບ່າຍວັນທີ 27/12 ໂດຍມີການເຂົ້າຮ່ວມຂອງຜູ້ແທນ 800 ຄົນ. ບັນດາຜູ້ແທນໄດ້ຮັບຟັງບົດລາຍງານກ່ຽວກັບສະພາບການຜູ້ແທນເຂົ້າຮ່ວມກອງປະຊຸມ, ບົດລາຍງານຂອງຄະນະກຳມະການສູນກາງສະຫະພັນຊາວຫນຸ່ມຫວຽດນາມ ຊຸດທີ 6 ທີ່ກອງປະຊຸມໃຫຍ່ຄັ້ງທີ 7, ບົດລາຍງານສຳຫລວດກວດຄືນຂອງຄະນະກຳມະການສູນກາງສະຫະພັນຊາວຫນຸ່ມຫວຽດນາມ ຊຸດທີ 6, ບົດລາຍງານກ່ຽວກັບເລື່ອງບໍ່ປັບປຸງກົດລະບຽບຂອງສະຫະພັນຊຸດທີ 6.