(vovworld)- ໃນຈຳນວນ 98 ປະເທດ ແລະ ເຂດແຄ້ວນລົງທຶນໂດຍກົງ(FDI) ເຂົ້າຫວຽດນາມ, ມາຮອດປະຈຸບັນ ຍີ່ປຸ່ນ ຍັງຄົງແມ່ນປະເທດນຳຫນ້າກ່ຽວກັບຈຳນວນໂຄງການກໍຄືຍອດເງິນລົງທຶນ. ຫລາຍໂຄງການ FDI ຂອງຍີ່ປຸ່ນ ໄດ້ຮັບການຕີລາຄາເໝາະສົມກັບການກຳນົດທິດດຶງດູດທຶນ FDI ຂອງຫວຽດນາມ, ເປັນຕົ້ນແມ່ນບັນດາໂຄງການເຕັກໂນໂລຊີສູງ ແລະ ຜົນສະທ້ອນເຖິງພື້ນຖານເສດຖະກິດ. ເຖິງຢ່າງໃດກໍຕາມ, ຫວຽດນາມ ຄວນຍູ້ແຮງວິວັດທະນາການສ້າງໂຄງປະກອບພື້ນຖານເສດຖະກິດຄືນໃຫມ່, ສ້າງເງື່ອນໄຂສືບຕໍ່ດຶງດູດເງິນລົງທຶນ, ເປີດກວ້າງບັນດາໂຄງການ FDI ຈາກຍີ່ປຸ່ນ. ໃນລາຍການເສດຖະກິດພາກນີ້ ເຊີນທ່ານຮັບຟັງບົດຂອງນັກຂ່າວໂຕຕວນ + ຫງວຽນຮັ່ງ ທີ່ພາດຫົວເລື່ອງວ່າ: ສ້າງໂຄງປະກອບເສດຖະກິດຄືນໃຫມ່ຕິດພັນກັບກາລະໂອກາດດຶງດູດທຶນ FDI ຈາກ ຍີ່ປຸ່ນ.
ທີ່ວາລະໂອ້ລົມສົນທະນາດ້ວຍເນື້ອໃນວ່າ:“ສ້າງໂຄງປະກອບພື້ໜຖານເສດຖະກິດຢູ່ຫວຽດນາມ ແລະ ກາລະໂອກາດເພີ່ມທະວີແຫລ່ງທຶນ FDI ຈາກຍີ່ປຸ່ນ” ຫາກໍດຳເນີນໄປຢູ່ ຮ່າໂນ້ຍ, ມີບັນຫາຫນຶ່ງຊື່ງຜູ້ແທນຫວຽດນາມ ແລະ ຍີ່ປຸ່ນສົນໃຈ ນັ້ນແມ່ນ ແກ້ໄຂຄວາມຫຍຸ້ງຍາກເພື່ອສືບຕໍ່ດຶງດູດບັນດາໂຄງການ FDI ຂອງຍີ່ປຸ່ນເຂົ້າຫວຽດນາມ. ບັນດາຕົວເລກນະທີ່ນີ້ໃຫ້ຮູ້ວ່າ: ໄລ່ມາຮອດເດືອນ 8/2013, ຍີປຸ່ນ ຍັງຄົງແມ່ນປະເທດນຳຫນ້າໃນຈຳນວນບັນດາປະເທດລົງທຶນເຂົ້າຫວຽດນາມ ດ້ວຍກວ່າ 2000 ໂຄງການ ດ້ວຍຍອດທຶນຈົດທະບຽນກວ່າ 33 ຕື້ USD. ແຫລ່ງທຶນ FDI ເຂົ້າຫວຽດນາມ ຂອງບັນດາວິສາຫະກິດຍີ່ປຸ່ນ ພວມເພີ່ມຂຶ້ນຢ່າງແຮງ, ສຸມໃສ່ຕົ້ນຕໍເຂົ້າບັນດາວິສາຫະກິດຂະຫນາດກາງ ແລະ ນ້ອຍ ຢູ່ທັງ 3 ພາກ: ພາກເຫນືອ, ພາກໃຕ້ ແລະ ພາກກາງຫວຽດນາມ. ຜ່ານຜ່າໄລຍະຫຍຸ້ງຍາກ ດ້ວຍການຜັນແປຫລາຍຢ່າງຂອງເສດຖະກິດໂລກ ແລະ ພາກພື້ນ, ມາຮອດປະຈຸບັນ ບັນດາໂຄງການ FDI ຂອງຍີ່ປຸ່ນ ເກືອບທັງໝົດ ຍັງພັດທະນາຢູ່,ບາງໂຄງການເພີ່ມເງິນລົງທຶນ. ທ່ານ ຟານຫືວທັງ, ນັກວິຊາການກົມລົງທຶນຕ່າງປະເທດ, ສັງກັດກະຊວງແຜນການ ແລະ ການລົງທຶນ ຫວຽດນາມ ຕີລາຄາວ່າ:
“ປະຈຸບັນ, ບັນດາວິສາຫະກິດ ຍີ່ປຸ່ນ ກວມຈຳນວນສ່ວນຫລາຍໃນບັນດາຂະແຫນງອຸດສາຫະກຳເຕັກໂລໂຊີສູງ ແລະ ປະດິດສ້າງ. ສິ່ງດັ່ງກ່າວແມ່ນສອດຄ່ອງກັບການກຳນົດທິດດຶງດູດການລົງທຶນ ຊື່ງພວກເຮົາວາງອອກນັບແຕ່ໄລຍະຕົ້ນ, ນັ້ນແມ່ນຍົກສູງແຫລ່ງທຶນ FDI ເຂົ້າຫວຽດນາມ”
ໄລ່ມາຮອດເດືອນ 8/2013, ຍີ່ປຸ່ນ ສືບຕໍ່ນຳຫນ້າຈຳນວນປະເທດ ແລະ ເຂດແຄ້ວນກ່ຽວກັບການດຶງດູດທຶນ FDI ເຂົ້າຫວຽດນາມ ດ້ວຍຍອດຈຳນວນທຶນຈົດທະບຽນໃຫມ່ ແລະ ເພີ່ມເຕີມແມ່ນ 4,35 ຕຶ້ USD, ກວມ 34,5% ໃນຍອດຈຳນວນທຶນ FDI 12,6 ຕື້ USD ຂອງທັງປະເທດ. ສະເພາະໂຄງການຂອງບໍລິສັດກັ່ນນ້ຳມັນ ງີເຊີນ ຈຳກັດ ເພີ່ມທຶນ 2,8 ຕື້ USD ໄດ້ປະກອບສ່ວນນຳແຂວງ ແທງຮວາ ກາຍເປັນທ້ອງຖິ່ນນຳຫນ້າທົ່ວປະເທດກ່ຽວກັບການດຶງດູດເງິນລົງທຶນ. ມາຮອດປະຈຸບັນ, ອຸດສາຫະກຳປຸງແຕ່ງ, ປະດິດສ້າງ ແລະ ບັນດາຂະແຫນງເຕັກໂນໂລຊີສູງ ໄດ້ກວມກວ່າ 68% ຍອດທຶນຈົດທະບຽນ FDI ຂອງຍີ່ປຸ່ນ ເຂົ້າຫວຽດນາມ. ມີວິສາຫະກິດລົງທຶນຂອງຍີ່ປຸ່ນ ຫລາຍແຫ່ງໄດ້ຫັນທິດເຂົ້າຂົງເຂດຜະລິດເຕັກໂນໂລຊີສູງ, ຊອກຫາກຳໄລຢ່າງຍາວນານ, ສິ່ງດັ່ງກ່າວແມ່ນສອດຄ່ອງກັບແຜນນະໂຍບາຍພັດທະນາແບບຍືນຍົງຂອງຫວຽດນາມ. ທ່ານ ຫວູຕຽນໂລກ, ປະທານຫ້ອງການການຄ້າ ແລະ ອຸດສາຫະກຳ ຫວຽດນາມ (VCCI) ໃຫ້ຮູ້ວ່າ:
“ປະຈຸບັນ ໃນນະໂຍບາຍຂອງລັດຖະບານ, ພວກເຮົາພວມສົ່ງເສີມການລົງທຶນເຂົ້າຂົງເຂດຜະລິດຢ່າງແຂງແຮງ, ພິເສດໃນຂົງເຂດອຸດສາຫະກຳ, ເຕັກໂນໂລຊີສູງ. ຂ້າພະເຈົ້າຄິດວ່າ ສະພາບແວດລ້ອມແຫ່ງການລົງທຶນໃນໄລຍະຈະມາເຖິງແມ່ນກຳນົດທິດລົງທຶນຕົ້ນຕໍ່ເຂົ້າຂົງເຂດການຜະລິດເຕັກໂນໂລຊີສູງ.”
ເຖິງຢ່າງໃດກໍຕາມ, ເພື່ອສືບຕໍ່ດຶງດູດເງິນລົງທຶນຂອງຕ່າງປະເທດເວົ້າລວມ, ໃນນັ້ນ ມີບັນດານັກລົງທຶນຍີ່ປຸ່ນ, ຫວຽດນາມ ຄວນສືບຕໍ່ມານະພະຍາຍາມປັບປຸງສະພາບແວດລ້ອມແຫ່ງການລົງທຶນ, ເປັນຕົ້ນແມ່ນເພີ່ມທະວີການບຳລຸງສ້າງ
ແຫລ່ງຊັບພະຍາກອນມະນຸດທີ່ມີຄຸນນະພາບສູງ, ກໍ່ສ້າງພື້ນຖານໂຄງລ່າງໃຫ້ສົມບູນແບບເພື່ອສ້າງເງື່ອນໄຂສະດວກເພື່ອຮັບບັນດາໂຄງການລົງທຶນ. ທ່ານ ບູ່ຍກວາງວີງ, ລັດຖະມົນຕີກະຊວງແຜນການ ແລະ ການລົງທຶນ ໃຫ້ຮູ້ວ່າ: ລັດຖະບານ ຫວຽດນາມ ໄດ້ກຳນົດ 3 ບັນຫາຫລັກແຫລ່ງທີ່ຕ້ອງໄດ້ຮັບຄວາມສົນໃຈ, ນັ້ນຄື: ປະຕິຮູບນະໂຍບາຍ, ສ້າງລະບົບກອບກົດໝາຍເພື່ອສ້າງບາດກ້າວບຸກທະລຸໃຫ້ແກ່ພື້ນຖານເສດຖະກິດຫວຽດນາມ ແລະ ກໍ່ສ້າງພື້ນຖານໂຄງລ່າງເປັນຢ່າງດີເພື່ອດຶງດູດການລົງທຶນ.
“ເພື່ອດຶງດູດການລົງທຶນຈາກຕ່າງປະເທດໃຫ້ຫລາຍກວ່າ, ຫວຽດນາມ ຈະຫັນປ່ຽນໂຄງປະກອບເສດຖະກິດຂອງຕົນຕາມທິດເຕີບໂຕ ອີງໃສ່ຄຸນນະພາບ, ເພີ່ມກຳລັງແກ້ງແຍ້ງນຳໃຊ້ສະມັດຕະພາບສັງລວມຄື: ບັນຫາລະດັບຄຸ້ມຄອງ, ສະມັດຕະພາບອອກແຮງງານ, ນຳໃຊ້ຄວາມກ້າວຫນ້າວິທະຍາສາດເຕັກນິກເພື່ອເຮັດໃຫ້ຜະລິດຕະພັນມີລັກສະນະແກ້ງແຍ້ງກວ່າ. ຍູ້ແຮງການບຳລຸງສ້າງແຫລ່ງຊັບພະຍາກອນມະນຸດຕາມຄຸນນະພາບສູງ ແລະ ຕ້ອງມີພື້ນຖານໂຄງລ່າງເປັນຢ່າງດີເພື່ອດຶງດູດເງິນລົງທຶນ.”
ທີ່ວາລະໂອ້ລົມສົນທະນາໃນຂອບເຂດເວທີປາໄສຂັ້ນສູງ ຫວຽດນາມ - ຍີປຸ່ນ ຊື່ງຈັດຂຶ້ນຢູ່ ຮ່າໂນ້ຍ ດ້ວຍເນື້ອໃນ: ສ້າງໂຄງປະກອບພື້ນຖານເສດຖະກິດຄືນໃຫມ່ຢູ່ ຫວຽດນາມ ແລະ ກາລະໂອກາດເພີ່ມທະວີແຫລ່ງທຶນ FDI ຈາກຍີ່ປຸນ, ທ່ານ Daisuke Hiratsuka , ຮອງປະທານບໍລິຫານອົງການສົ່ງເສີມການຄ້າ ຍີ່ປຸ່ນ ໃຫ້ຮູ້ວ່າ : ພຽງແຕ່ໃນຮອບໜື່ງປີ, ນັບແຕ່ເດືອນ ເມສາ ປີ 2012 ຮອດ ເດືອນ ມິນາ ປີ 2013 ໄດ້ມີນັກລົງທຶນ ຈຳນວນ 6.800 ຄົນ ມາສຳນັກງານຂອງ JETRO ທີ່ປະຈຳຢູ່ ຮ່າໂນ້ຍເພື່ອໄດ້ຮັບຄຳປຶກສາ ການລົງທຶນເຂົ້າຫວຽດນາມ. ຕົວເລກນີ້ ນັກລົງທຶນ ຢູ່ນະຄອນຫລວງ ໂຮ່ຈີ່ມິນ ແມ່ນປະມານ 5.700 ຄົນ. ສິ່ງດັ່ງກ່າວນີ້ ຢັ້ງຢືນວ່າ : ບັນດາ ວິສາຫະກິດ ຍີ່ປຸ່ນໄດ້ເອົາໃຈໃສ່ຮອດຫວຽດນາມຢ່າງແທ້ຈິງ ແລະ ຫວຽດນາມ ກຳລັງຢືນຢູ່ຕໍ່ໜ້າໂອກາດໃຫຍ່ ເພື່ອດຶງດູດ ແຫລ່ງທຶນ FDI ຈາກຍີ່ປຸ່ນ.