ເຮືອບິນ SU30-MK2
ພາບ: vietbao.vn
|
(vovworld)-ຕອນບ່າຍວັນທີ 24/6, ເມື່ອແຈ້ງຂ່າວຕໍ່ສື່ມວນຊົນກ່ຽວກັບກໍລະນີ ເຮືອບິນ SU30-MK2 ໝາຍເລກ 8585 ແລະ ເຮືອບິນ CASA 212 ໝາຍເລກ 8983 ຖືກປະສົບໄພ, ພົນໂທ ຫວໍວັນຕວນ, ຮອງຫົວຫນ້າກົມໃຫຍ່ເສນາທິການ ກອງທັບປະຊາຊົນ ຫວຽດນາມ ໃຫ້ຮູ້ວ່າ: ພາຍຫລັງໄດ້ຮັບຂ່າວບັນດາເຮືອບິນດັ່ງກ່າວຖືກປະສົບໄພ, ຄະນະພັກການທະຫານສູນກາງ, ກະຊວງປ້ອງກັນປະເທດ ໄດ້ເປັນເຈົ້າການໃນການລະດົມບັນດາກຳລັງທະຫານ ແລະ ກຳລັງຊອກຫາກູ້ໄພກູ້ຊີບຈາກກະຊວງຄົມມະນາຄົມຂົນສົ່ງ, ກຳລັງກວດກາປະມົງ, ກຳປັ່ນຂອງຊາວປະມົງ ຮີບເຮັ່ງສົມທົບກັນເພື່ອຊອກຫາກູ້ໄພກູ້ຊີບຢູ່ 2 ເຂດທະເລທີີ່ກວ້າງໃຫຍ່ ໃນ ເງ້ອານ - ແທງຮວາ ແລະ ຫາຍຟ່ອງ. ພ້ອມກັນນັ້ນ ກະຊວງປອ້ງກັນປະເທດໄດ້ຕິດຕໍ່ກັບຝ່າຍຈີນ ສະເຫນີ ສ້າງເງື່ອນໄຂສະດວກໃຫ້ແກ່ກຳລັງຊອກຫາກູ້ໄພກູ້ຊີບຢູ່ທາງທິດຕາເວັນອອກຂອງຂີດຂັ້ນ ຫວຽດນາມ - ຈີນ ຢູ່ ອ່າວພາກເຫນືອ. ມາຮອດປະຈຸບັນ ສຳລັບເຮືອບິນ SU 30- MK 2 ແລະ ນັກບິນ, ບັນດາກຳລັງຊອກຫາກູ້ໄພກູ້ຊີບ ກູ້ເອົາຊີວິດນັກບິນ ຫງວຽນຫືງເກື່ອງ ແລະ ຊອກເຫັນຊາກສົບຂອງນັກບິນ ພັນເອກ ເຈີນກວາງຂາຍ.
ສ່ວນເຮຶອບິນ CASA 212 ແລະ ຈຸບິນ, ບັນດາກຳລັງຊອກຫາກູ້ໄພກູ້ຊີບ ຢັ້ງຢືນໄດ້ວ່າ ເຮືອບິນຕົກຢູ່ບ່ອນຫ່າງໄກກັບເສັ້ນຂີດຂັ້ນທາງທິດຕາເວັນຕົກປະມານ 2,7 ໄມທະເລ, ທາງໃຕ້ທິດຕາເວັນອອກສ່ຽງໃຕ້ ເກາະແບກລອງຫວີ ປະມານ 15 ໄມທະເລ. ຢູ່ເຂດນີ້ ກຳລັງກູ້ໄພກູ້ຊີບ ໄດ້ຊອກເຫັນບັນດາຊິ້ນສ່ວນເຮືອບິນ ແລະ ຊາກສົບຂອງບັນດາສະມາຊີກໃນຈຸບິນ.