(vovworld) - ເນື່ອງໃນໂອກາດບຸນປີໃໝ່ ປີມະເມຍ 2014, ທ່ານປະທານສະພາແຫ່ງຊາດຫວຽດນາມ ຫວຽນຊິງຮຸ່ງ ໄດ້ຕອບສຳພາດຕໍ່ນັກຂ່າວ ຂ່າວສານຫວຽດນາມ ກ່ຽວກັບບັນດາໝາກຜົນທີ່ພົ້ນເດັ່ນໃນການເຄື່ອນໄຫວຂອງສະພາແຫ່ງຊາດ, ເພື່ອແນໃສ່ປະກອບສ່ວນນຳປະເທດຜ່ານຜ່າຄວາມຫຍຸ້ງຍາກ, ສິ່ງທ້າທາຍ, ສືບຕໍ່ພັດທະນາຢ່າງໝັ້ນຄົງເຂັ້ມແຂງໃນປີ 2014 ແລະ ໃນຊຸມປີຕໍ່ໆໄປ.
ຫວນຄືນເຄິ່ງໄລຍະທາງທີ່ຜ່ານມາ, ສະພາແຫ່ງຊາດໄດ້ສຳເລັດວຽກງານໃຫ່ຍຫຼາຍຢ່າງ, ດ້ວຍຮ່າງກົດໝາຍຫຼາຍສະບັບໄດ້ຮັບການຮັບຮອງເອົາ ແລະ ໃຫ້ຄຳເຫັນເພື່ອຕອບສະໜອງຄວາມຕ້ອງການຂອງຊີວິດການເປັນຢູ່, ປັບປຸງສະພາບແວດລ້ອມດ້ານນິຕິກຳໃຫ້ແກ່ພາລະກິດພັດທະນາປະເທດຊາດ. ພິເສດໃນປີ 2013 ຜ່ານມາ, ສະພາແຫ່ງຊາດໄດ້ພິຈາລະນາ, ຮັບຮອງເອົາລັດຖະທຳມະນູນ ສສ ຫວຽດນາມ (ສະບັບປັບປຸງ) ສະແດງໃຫ້ເຫັນເຈດຈຳນົງ, ຄວາມມຸ່ງມາດປາດຖະໜາຂອງປະຊາຊົນ, ສ້າງພື້ນຖານດ້ານການເມືອງ, ກົດໝາຍສຳຄັນໃນພາລະກິດສ້າງສາ ແລະ ພັດທະນາປະເທດຊາດໃນໄລຍະປ່ຽນໃໝ່ຢ່າງຮອບດ້ານ. ສະພາແຫ່ງຊາດໄດ້ຮັບຮອງເອົາຫຼາຍມະຕິ, ຕົກລົງຫຼາຍບັນຫາສຳຄັນຂອງປະເທດ ທີ່ກ່ຽວຂ້ອງໂດຍກົງເຖິງຊີວິດການເປັນຢູ່ຂອງປະຊາຊົນ, ຄຸ້ມຄອງ, ບໍລິຫານປະເທດ, ແກ້ໄຂບັນຫາຮ້ອນເຮັ່ງຂອງປະຊາຊົນ, ອັນໄດ້ຮັບການສະໜັບສະໜູນຈາກຜູ້ມີສິດເລືອກຕັ້ງເປັນຈຳນວນຫຼວງຫຼາຍ. ເປັນຄັ້ງທຳອິດທີ່ ສະພາແຫ່ງຊາດດຳເນີນການລົງຄະແນນສຽງໄວ້ວາງໃຈສຳລັບຜູ້ດຳລົງຕຳແໜ່ງໂດຍສະພາແຫ່ງຊາດເລືອກຕັ້ງ ຫຼື ໃຫ້ສັດຕະຍາບັນ. ການເຄື່ອນໄຫວຊັກຖາມໄດ້ດັດປັບ, ແທດຈິງກວ່າ, ສ້າງເງື່ອນໄຂເພື່ອໃຫ້ບັນດາສະມາຊິກລັດຖະບານ, ຫົວໜ້າຂະແໜງອະພິປາຍ, ປຶກສາຫາລືພ້ອມກັບບັນດາສະມາຊິກສະພາແຫ່ງຊາດ ຍົກອອກມາດຕະການແກ້ໄຂໃຫ້ບັນຫາເສດຖະກິດ - ສັງຄົມທີ່ຮ້ອນເຮັ່ງ ເຊິ່ງໄດ້ຮັບຄວາມສົນໃຈຈາກຜູ້ມີສິດເລືອກຕັ້ງ. ການເຄື່ອນໄຫວການຕ່າງປະເທດສະພາແຫ່ງຊາດນັບທັງ 2 ຝ່າຍ ແລະ ຫຼາຍຝ່າຍສືບຕໍ່ໄດ້ຮັບການຍູ້ແຮງ, ມີການປະກອບສ່ວນສຳຄັນຫຼາຍຢ່າງທີ່ບັນດາເວທີປາໄສລະຫວ່າງສະພາແຫ່ງຊາດພາກພື້ນ ແລະ ສາກົນຄື: AIPA, APPF, IPU, ASEP... ປະກອບສ່ວນເຂົ້າໃນຜົນງານລວມ ໃນວຽກງານພົວພັນຕ່າງປະເທດ. ໃນ 2 ປີຈະມາເຖິງ 2014 – 2015, ທົ່ວປະເທດກ້າວເຂົ້າສູ່ໄລຍະສຳເລັດໜ້າທີ່ພັດທະນາເສດຖະກິດສັງຄົມ ຕາມມະຕິໄດ້ວາງອອກໃນກອງປະຊຸມໃຫຍ່ທົ່ວປະເທດຄັ້ງທີ 11 ຂອງພັກ, ທ່ານປະທານສະພາແຫ່ງຊາດຫວຽນຊິງຮຸ່ງ ຖືວ່າ: ບັນດາຂັ້ນ, ຂະແໜງການຕ່າງໆຄວນສືບຕໍ່ຮັບປະກັນເສດຖະກິດມະຫາພາກເປັນປົກກະຕິ, ຄວບຄຸມໄຟເງິນເຟີ້; ເຕີບໂຕຢ່າງເໝາະສົມ ແລະ ຍົກສູງຄຸນນະພາບ, ປະສິດທິຜົນ, ກຳລັງແກ່ງແຍ່ງຂອງພື້ນຖານເສດຖະກິດບົນພື້ນຖານຍູ້ແຮງການປະຕິບັດ 3 ຂອດບຸກທະລຸຍຸດທະສາດ ຕິດພັນກັບການປ່ຽນໃໝ່ຮູບແບບການເຕີບໂຕ, ສ້າງໂຄງປະກອບພື້ນຖານເສດຖະກິດຄືນໃໝ່. ຮັບປະກັນຊີວິດສັງຄົມ ແລະ ສະຫວັດດີການສັງຄົມ, ປັບປຸງຊີວິດຂອງປະຊາຊົນໃຫ້ດີຂຶ້ນ. ຍູ້ແຮງການປະຕິຮູບດ້ານບໍລິຫານ ແລະ ການປ້ອງກັນ, ຕ້ານການສໍ້ລາດບັງຫຼວງ, ການຟຸມເຟືອຍ; ປັບປຸງສະພາບແວດລ້ອມແຫ່ງການດຳເນີນທຸລະກິດ. ຮັບປະກັນການປ້ອງກັນຊາດປ້ອງກັນຄວາມສະຫງົບດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມ. ເປີດກວ້າງ ແລະ ຍົກສູງປະສິດທິຜົນວຽກງານການຕ່າງປະເທດ ແລະ ເຊື່ອມໂຍງເຂົ້າກັບສາກົນ. ທ່ານປະທານສະພາແຫ່ງຊາດ ຫງວຽນຊິງຮຸ່ງ ຢືນຢັນວ່າ ດ້ວຍຈິດໃຈສືບຕໍ່ປ່ຽນໃໝ່, ສະພາແຫ່ງຊາດ, ບັນດາອົງການຂອງສະພາແຫ່ງຊາດ ແລະ ສະມາຊິກສະພາແຫ່ງຊາດ ຈະເສີມຂະຫຍາຍຈິດໃຈ ຮັບຜິດຊອບ, ປະຊາທິປະໄຕ, ປັນຍາ ເພື່ອປະຕິບັດບົດບາດຂອງຜູ້ຕາງໜ້າປະຊາຊົນໃຫ້ດີກວ່າ, ປະກອບສ່ວນພ້ອມກັບທົ່ວພັກ, ທົ່ວປວງຊົນ ຜ່ານຜ່າທຸກຄວາມຫຍຸ້ງຍາກ, ສິ່ງທ້າທາຍທຸກຢ່າງ, ປະຕິບັດສຳເລັດໜ້າທີ່ແຜນການໄລຍະ 2014 – 2015 ຢ່າງມີໄຊ.