(vovworld) – “ມະຫາສາມັກຄີທົ່ວປວງຊົນທັງຊາດແມ່ນປັດໄຈຫຼັກແຫຼ່ງແກ່ນສານເພື່ອສຸມກຳລັງແຮງປະຊາຊົນທຸກຊັ້ນວັນນະ, ສ້າງຄວາມເຂັ້ມແຂງທົ່ວປວງຊົນທັງຊາດ ແລະ ນຳປະເທດ ຫວຽດນາມ ຍາດໄດ້ໄຊຊະນະນີ້ໄປສູ່ໄຊຊະນະອື່ນ”. ທ່ານປະທານສະພາແຫ່ງຊາດ ຫງວຽນຊິງຮູ່ງ ເນັ້ນໜັກສິ່ງດັ່ງກ່າວເມື່ອເຂົ້າຮ່ວມ “ວັນບຸນມະຫາສະມັກຄີທົ່ວປວງຊົນທັງຊາດ” ກັບປະຊາຊົນຕາແສງ ເຈີ່ນຮຶງດ້າວ, ເມືອງ ຮ່ວານກ໋ຽມ, ຮ່າໂນ້ຍ ໃນຕອນຄຳ່ວັນທີ 13/11. ກ່າວຄຳເຫັນນະທີ່ນີ້, ທ່ານປະທານສະພາແຫ່ງຊາດ ຫງວຽນຊິງຮູ່ງ ຢັ້ງຢືນຄວາມສາມັກຄີແມ່ນກຳລັງແຮງເພື່ອເສີມຂະຫຍາຍປະຊາທິປະໄຕ, ເພື່ອຂຸດຄົ້ນ ແລະ ເສີມຂະຫຍາຍກຳລັງແຮງຂອງແຕ່ລະຄອບຄົວ, ແຕ່ລະບຸກຄົນ ແລະ ສ້າງເຂດຊຸມຊົນໃຫ້ນັບມື້ນັບພັດທະນາ. ທ່ານປະທານສະພາແຫ່ງຊາດ ຫງວຽນຊິງຮູ່ງ ຊີ້ແຈ້ງວ່າ: ການກໍ່ສ້າງປັບປຸງກຸ່ມກ້ອນມະຫາສາມັກຄີທົ່ວປວງຊົນຈາກແຕ່ລະເຂດຊຸມຊົນແມ່ນສຳຄັນທີ່ສຸດ. ທ່ານປະທານສະພາແຫ່ງຊາດ ເຊື່ອໝັ້ນວ່າ: ດ້ວຍຂະບວນການສາມັກຄີ, ມີບຸກຄົນຕັ້ງໜ້າ, ເປັນແບບຢ່າງຫຼາຍຄົນ, ປະຊາຊົນຕາແສງ ເຈີ່ນຮຶງດ້າວ ຈະບັນລຸໄດ້ໝາກຜົນຫຼາຍຢ່າງໃນຂະບວນການແຂ່ງຂັນສ້າງເຂດຊຸມຊົນວັດທະນະທຳ, ໜ່ວຍວັດທະນະທຳ, ປະກອບສ່ວນກໍ່ສ້າງເຂດຊຸມຊົນສີວິໄລ. ທ່ານປະທານສະພາແຫ່ງຊາດ ຫງວຽນຊິງຮູ່ງ ເນັ້ນໜັກວ່າ:
“ພວກຂ້າພະເຈົ້າຫວັງວ່າ: ພໍ່ແມ່ປະຊາຊົນເຂດຊຸມຊົນ, ພ້ອມກັບບັນດາເຂດຊຸມຊົນອື່ນໃນເມືອງ, ນະຄອນ ແລະ ທົ່ວປະເທດ ສືບຕໍ່ປະຕິບັດວຽກງານຮຳ່ຮຽນ ແລະ ປະຕິບັດຕາມແບບຢ່າງຄຸນສົມບັດປະທານ ໂຮ່ຈີມິນ ເປັນຢ່າງດີ, ການຂົນຂວາຍທົ່ວປວງຊົນສາມັກຄີສ້າງຊີວິດວັດທະນະທຳຢູ່ເຂດຊຸມຊົນ ແລະ ການຂົນຂວາຍວັນເພື່ອຄົນທຸກຍາກ. ແຕ່ລະຄອບຄົວ, ປະຊາຊົນແຕ່ລະຄົນໃນບໍລິເວນເມືອງຮ່ວມແຮງຮ່ວມໃຈ, ສຸມກຳລັງແຮງ, ພຸມປັນຍາເພື່ອເພີ່ມພຸນຄຸນສ້າງນ້ຳໃຈສາມັກຄີ, ສູ້ຊົນບັນລຸບັນດາມາດຖານຊີວິດວັດທະນະທຳ, ປະກອບສ່ວນພ້ອມກັບບັນດາ ຕາແສງ, ເມືອງຂອງນະຄອນສ້າງນະຄອນຫຼວງໃຫ້ນັບມື້ນັບສີວິໄລ, ສວຍງາມ, ຮັ່ງມີ.”