ສຳລັບຫວຽດນາມ, ອະທິປະໄຕແຫ່ງຊາດແມ່ນສູງສຸດ
(ທ່ານ ຮ່ວາງບິ່ງກວນ, ຫົວໜ້າຄະນະພົວພັນຕ່າງປະເທດ
ສູນກາງພັກກອມມູນິດ ຫວຽດນາມ)
(vovworld) - ສຳລັບຫວຽດນາມ, ອະທິປະໄຕແຫ່ງຊາດແມ່ນສູງສຸດ. ນີ້ແມ່ນຄຳຢືນຢັນຂອງທ່ານ ຮ່ວາງບິ່ງກວນ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດ ຫວຽດນາມ ຢູ່ນອກກອງປະຊຸມໃຫຍ່ຄັ້ງທີ 12 ຂອງພັກ, ເມື່ອເຕື້ອງເຖິງບັນຫາທະເລຕາເວັນອອກ. ຕາມທ່ານ ຮ່ວາງບິ່ງກວນ, ຍ້ອນມີຄວາມແຕກຕ່າງກັນລະຫວ່າງ ຫວຽດນາມ ແລະ ຈີນ, ກໍ່ຄືລະຫວ່າງບັນດາປະເທດແຄມທະເລຕາເວັນອອກ, ດັ່ງນັ້ນຕ້ອງມີບັນດາເຄື່ອງມືເພື່ອແກ້ໄຂບັນຫາ. ນັ້ນແມ່ນບັນດາພື້ນຖານນິຕິກຳປະຫວັດສາດ ແລະ ກົດໝາຍສາກົນ, ພິເສດແມ່ນສົນທິສັນຍາກ່ຽວກັບກົດໝາຍວ່າດ້ວຍທະເລປີ 1982 ແລະ ຖະແຫຼງການປະພຶດຢູ່ທະເລຕາເວັນອອກ (DOC) ແລະ ພວມມຸ່ງໄປເຖິງການສ້າງປະມວນຂໍ້ກຳນົດກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC). ທ່ານ ຮ່ວາງບິ່ງກວນ ຢືນຢັນວ່າ, ຫວຽດນາມ ມີພື້ນຖານນິຕິກຳຢ່າງຄົບຖ້ວນເພື່ອຢືນຢັນ ຮ່ວາງຊາ, ເຈື່ອງຊາ ແມ່ນຂອງ ຫວຽດນາມ, ແຕ່ ຫວຽດນາມ ກໍ່ເດັດດຽວແກ້ໄຂບັນຫາທະເລຕາເວັນອອກດ້ວຍສັນຕິວິທີ ບົນພື້ນຖານກົດໝາຍສາກົນ. ຫວຽດນາມຄັດຄ້ານການນຳໃຊ້ກຳລັງອາວຸດ ແລະ ນາບຂູ່ນຳໃຊ້ກຳລັງອາວຸດເພື່ອແກ້ໄຂບັນຫາຢູ່ທະເລຕາເວັນອອກ.
“ຂ້າພະເຈົ້າຖືວ່າເລື່ອງແກ້ໄຂການຂັດແຍ້ງກັນບໍ່ສາມາດປະຕິບັດຢ່າງໄວໄດ້, ແຕ່ຕ້ອງປະຕິບັດຕາມຫຼັກການລວມ. ໃນເອກະສານກອງປະຊຸມໃຫຍ່ຂອງພັກ ໄດ້ເວົ້າຢ່າງຈະແຈ້ງວ່າ, ຫວຽດນາມພ້ອມແລ້ວທີ່ຈະເປັນເພື່ອນມິດ, ເປັນຄູ່ຮ່ວມມືທີ່ໜ້າໄວ້ເນື້ອເຊື່ອໃຈຂອງປະເທດຕ່າງໆໃນໂລກ ແລະ ແມ່ນປະເທດທີ່ມີຄວາມຮັບຜິດຊອບຂອງປະຊາຄົມສາກົນ. ດັ່ງນັ້ນພວກເຮົາຈຶ່ງປະຕິບັດແນວທາງການຕ່າງປະເທດເປັນຫຼາຍຝ່າຍ, ຫຼາຍຮູບຫຼາຍແບບ ໂດຍອີງໃສ່ຄາດໝາຍ ແລະ ຫຼັກການສະເໝີຕົ້ນສະເໝີປາຍຄືດັ່ງກ່າວ“.