(vovworld) – ຕອນເຊົ້າວັນທີ 16/10, ຢູ່ຮ່າໂນ້ຍ, ໄດ້ຈັດກອງປະຊຸມປະຈຳປີບັນດານັກລົງທຶນ 2014 ໂດຍກຸ່ມບໍລິສັດ VinaCapital ຈັດຕັ້ງຂຶ້ນ. ແຂກນັບຮ້ອຍຄົນແມ່ນບັນດານັກລົງທຶນສາກົນ, ບັນດາຄູ່ຮ່ວມມືໄດ້ເຂົ້າຮ່ວມກອງປະຊຸມ. ກ່າວຄຳເຫັນໄຂກອງປະຊຸມ, ທ່ານຮອງນາຍົກລັດຖະມົນຕີຮ່ວາງຈຸງຫາຍ ຕີລາຄາສູງຄວາມໝາຍຂອງເລື່ອງບັນດາອົງການຈັດຕັ້ງ, ວິສາຫະກິດເປັນເຈົ້າການໃນການສົ່ງເສີມການລົງທຶນ, ຮຽກຮ້ອງບັນດາຄູ່ຮ່ວມມືຕ່າງປະເທດຮ່ວມມື, ຮ່ວມທຸລະກິດຢູ່ຕະຫຼາດຫວຽດນາມ, ຖືວ່ານີ້ແມ່ນບາດກ້າວຫັນບັນດາຊ່ອງດຶງດູດການລົງທຶນເປັນຫຼາຍຮູບຫຼາຍແບບ. ທ່ານຮອງນາຍົກລັດຖະມົນຕີຮ່ວາງຈຸງຫາຍ ຢືນຢັນແຜນນະໂຍບາຍຂອງລັດຖະບານໃນການສົ່ງເສີມ ແລະ ສ້າງເງື່ອນໄຂອຳນວຍຄວາມສະດວກເພື່ອໃຫ້ບັນດາກຸ່ມບໍລິສັດ, ວິສາຫະກິດ, ນັກລົງທຶນຕ່າງປະເທດເຂົ້າຮ່ວມການຜະລິດ, ດຳເນີນທຸລະກິດຢູ່ຫວຽດນາມ.
ພິເສດ, ທ່ານຮອງນາຍົກລັດຖະມົນຕີຮ່ວາງຈຸງຫາຍ ໄດ້ແລກປ່ຽນໂດຍກົງກັບບັນດານັກລົງທຶນກ່ຽວກັບກາລະໂອກາດ, ນະໂຍບາຍລົງທຶນໃນບາງຂົງເຂດໄດ້ຮັບຄວາມສົນໃຈຢູ່ກອງປະຊຸມຄື: ພະລັງງານ, ພື້ນຖານໂຄງລ່າງ, ຜະລິດອຸດສາຫະກຳ, ທ່ານຢືນຢັນວ່າ ຍາມໃດລັດຖະບານກໍ່ເອົາໃຈໃສ່ເປັນພິເສດຕໍ່ການດຶງດູດບັນດາແຫຼ່ງກຳລັງສັງຄົມໃນຂົງເຂດນີ້ເພື່ອຫລຸດຜ່ອນການລົງທຶນຂອງລັດ. ພ້ອມກັນນັ້ນ, ບັນດານະໂຍບາຍພາສີອາກອນ, ລະບຽບການກ່ຽວຂ້ອງເຖິງການລົງທຶນຕ່າງປະເທດກໍ່ພວມໄດ້ຮັບການສ້າງເປັນສົມບູນແບບເພື່ອແນໃສ່ສ້າງຄວາມຈະແຈ້ງ, ດຶງດູດບັນດານັກລົງທຶນກ່ວາອີກ./.