(vovworld)- ພາຍຫລັງກະກຽມມາເປັນເວລາຫລາຍປີ, ສຸດທ້າຍ ປະຊາຄົມ ອາຊຽນ ໄດ້ລົງນາມໃນຖະແຫລງການສ້າງຕັ້ງປະຊາຄົມ ອາຊຽນ, ປະກາດຕໍ່ໂລກຢ່າງເປັນທາງການກ່ຽວກັບການສ້າງຕັ້ງປະຊາຄົມ ຂອງພາກພື້ນ ດ້ວຍຫລາຍເປົ້າໝາຍ, ນັ້ນແມ່ນເປັນເອກະພາບ, ສັນຕິພາບ, ວັດທະນາຖາວອນ, ມານະພະຍາຍາມປະກອບສ່ວນຫລາຍກວ່າໃຫ້ແກ່ສັນຕິພາບ, ສະຖຽນລະພາບ ແລະການ ພັດທະນາຂອງໂລກ.
ການນຳບັນດາປະເທດສະມາຊິກອາຊຽນ ລົງນາມໃນຖະແຫລງການ
ສ້າງຕັ້ງປະຊາຄົມ ອາຊຽນ 2015
|
ວັນທີ 21/11, ກອງປະຊຸມສຸດຍອດ ອາຊຽນ ຄັ້ງທີ 27 ດຳເນີນໄປຢູ່ ນະຄອນຫລວງ ກົວລາລຳເປີ ປະເທດ ມາເລເຊຍ ໄດ້ສ້າງຫນ້າປະຫວັດສາດ ເມື່ອການນຳ 10 ປະເທດ ສະມາຊິກ ອາຊຽນ ລົງນາມໃນຖະແຫລງການສ້າງຕັ້ງປະຊາຄົມ ອາຊຽນ 2015 ແລະ ວາງອອກວິໄສທັດ ອາຊຽນ 2025 ດ້ວຍການເປັນສັກຂີພິຍານຂອງທ່ານເລຂາທິການໃຫຍ່ ສປຊ Ban Ki moon ແລະ ການນຳ 8 ປະເທດຄູ່ຮ່ວມມືຄູ່ເຈລະຈາຂອງ ອາຊຽນ.
ອາຊຽນ ສວມບົດບາດໃຫຍ່ກວ່າໃນເວທີການເມືອງທົ່ວໂລກ
ຕາມເນື້ອໃນຂອງຖະແຫລງການ, ປະຊາຄົມ ອາຊຽນ ຈະສ້າງຕັ້ງຢ່າງເປັນທາງການໃນວັນທີ 31/12/2015 ໂດຍອີງໃສ່ 3 ເສົາຄ້ຳ ຕົ້ນຕໍ ນັ້ນແມ່ນ ປະຊາຄົມການເມືອງ ຄວາມໝັ້ນຄົງ, ປະຊາຄົມເສດຖະກິດ ແລະ ປະຊາຄົມວັດທະນະທຳສັງຄົມ. ການສ້າງຕັ້ງປະຊາຄົມ ມີຄວາມໝາຍອັນໃຫຍ່ຫລວງ, ນຳອາຊຽນ ໄປສູ່ໄລຍະພັດທະນາໃຫມ່, ສະຫນິດຕິດພັນກັບດ້ານການເມືອງກວ່າ, ຮ່ວມສຳພັນກ່ຽວກັບເສດຖະກິດ ພ້ອມກັນແບ່ງປັນຄວາມຮັບຜິດຊອບຕໍ່ສັງຄົມ, ນຳມາເຊິ່ງຜົນປະໂຫຍດລວມໃຫ້ປະເທດສະມາຊິກທັງໝົດ.
ຖະແຫລງການວິໄສທັດປະຊາຄົມ ອາຊຽນ 2025 ເນັ້ນຫນັກວ່າ: ອາຊຽນ ຕັດສິນໃຈປັບປຸງຄວາມເຂັ້ມແຂງຂອງປະຊາຄົມ, ເສີມຂະຫຍາຍບັນດາໝາກຜົນທີ່ບັນລຸໄດ້ ແລະເຮັດໃຫ້ວິວັດການຮ່ວມສຳພັນເລິກເຊິ່ງກວ່າ ຫັນປະຊາຄົມອາຊຽນໃຫ້ປະກົດຜົນເປັນຈິງໂດຍອີງໃສ່ລະບົບກົດໝາຍ, ມຸ່ງໄປເຖິງປະຊາຊົນ ແລະ ຖືປະຊາຊົນເປັນໃຈກາງ. ເມື່ອສ້າງຕັ້ງປະຊາຄົມ ອາຊຽນ ປະຊາຊົນຈະໄດ້ຮັບບັນດາສິດເສລີພື້ນຖານ, ຊີວິດມີ ຄຸນນະພາບກວ່າ ພ້ອມກັບບັນດາຜົນປະໂຫຍດຊື່ງວິວັດການສ້າງຕັ້ງປະຊາຄົມໄດ້ນຳມາໃຫ້.
ຕາມທ່ານເລຂາທິການໃຫຍ່ ອາຊຽນ ເລເລືອງມີງ ແລ້ວ, ການສ້າງຕັ້ງ ປະຊາຄົມ ອາຊຽນ ນຳມາເຊິ່ງຜົນປະໂຫຍດອັນໃຫຍ່ຫລວງ, ກ່ອນອື່ນ ແມ່ນດ້ານການເມືອງຄວາມໝັ້ນຄົງ. ຈາກກົນໄກຮ່ວມມືບໍ່ທັນຮ່ວມສຳພັນຢ່າງແທ້ຈິງ ດ້ວຍການສ້າງຕັ້ງປະຊາຄົມເປັນເອກະພາບ, ອາຊຽນ ໄດ້ສະແດງໃຫ້ເຫັນຄວາມຕັດສິນໃຈອັນໃຫຍ່ຫລວງຂອງຕົນ ແລະ ສວມບົດບາດເປັນເຈົ້າການໃນການວາງມາດຕະການສຳລັບບັນດາບັນຫາສັນຕິພາບ ແລະ ຄວາມໝັ້ນຄົງໃນພາກພື້ນ.
“ໃນບັນດາກົນໄກພາກພື້ນ ໂດຍ ອາຊຽນ ລິເລີ່ມ ພວມນັບມື້ນັບກາຍເປັນເວທີປາໄສໄວ້ເນື້ອເຊື່ອໃຈສຳລັບການເຈລະຈາຮ່ວມມື ກ່ຽວກັບບັນດາບັນຫາສັນຕິພາບ, ສະຖຽນລະພາບ ຄວາມໝັ້ນຄົງ ການຮ່ວມມືພັດທະນາ, ບໍ່ພຽງແຕ່ຂອງພາກພື້ນ ອາຊຽນ ເທົ່ານັ້ນ ຫາກນັບທັງພາກພື້ນ ອາຊີ ປາຊີຟີກ ທີ່ມີຫລາຍຮູບຫລາຍແບບ ແລະ ສັບສົນ ດ້ວຍການແຊກແຊງນັບມື້ນັບເພີ່ມຂຶ້ນຂອງບັນດາປະເທດໃຫຍ່ ດ້ວຍບັນດາຜົນປະໂຫຍດແຊກຊ້ອນ, ຊ້່ຳບໍ່ໜຳຍັງເປັນການກົງກັນຂ້າມອີກ.”
ຫວຽດນາມ ແບ່ງປັນຜົນປະໂຫຍດ ແລະ ຄວາມຮັບຜິດຊອບລວມ
ເລື່ອງສ້າງຕັ້ງປະຊາຄົມ ອາຊຽນ ມີຄວາມໝາຍປະຫວັດສາດສຳລັບທັງກຸ່ມ ເວົ້າລວມ ແລະ ຫວຽດນາມເວົ້າສະເພາະ. ການສ້າງຕັ້ງປະຊາຄົມ ອາຊຽນ ໄດ້ສ້າງບາດກ້າວຫັນປ່ຽນພື້ນຖານໃຫ້ວິວັດການເຊື່ອມໂຍງຂອງຫວຽດນາມ, ເປີດໄລຍະພັດທະນາໃຫມ່.
ເຖິງວ່າ ກາລະໂອກາດນຳມາໃຫ້ຫວຽດນາມແມ່ນໃຫຍ່ຫລວງ ແຕ່ ຍັງມີການທ້າທາຍອີກດ້ວຍ ເປັນຕົ້ນ ແມ່ນຂົງເຂດເສດຖະກິດ, ການຄ້າ. ເມື່ອເຂົ້າຮ່ວມປະຊາຄົມ ອາຊຽນ ຫວຽດນາມ ຕ້ອງມີຄວາມຮັບຮູ້ຢ່າງຄົບຖ້ວນ ແລະ ທັນການ. ນັ້ນແມ່ນບັນດາສິ່ງທ້າທາຍກ່ຽວກັບດ້ານນິຕິກຳ, ການເປີດປະຕູຕະຫລາດ ແລະ ການສຳພັດກັບຕະຫລາດ, ການແກ້ງແຍ້ງຢ່າງສະເຫມີພາບ ແລະ ໂປ່ງໃສ, ຄວາມຮັບຜິດຊອບຂອງແຕ່ລະສະມາຊິກ ຕໍ່ປະຊາຄົມ, ການສະຫນິດຕິດພັນໃນອະນາຄົດສະເພາະ ຂອງຕົນ ກັບອະນາຄົດລວມຂອງ ອາຊຽນ. ໄຈ້ແຍກສິ່ງດັ່ງກ່າວ ທ່ານ ເລກົງຟຸ້ງ, ອະດີດລັດຖະມົນຕີຊ່ວຍວ່າການກະຊວງການຕ່າງປະເທດ ຫວຽດນາມ ຖືວ່າ:
“ປະຊາຄົມເສດຖະກິດ ອາຊຽນ ໄດ້ຮັບການສ້າງຕັ້ງ, ນັ້ນແມ່ນສິ່ງທີ່ສະດວກບໍ່ພຽງແຕ່ໃຫ້ຫວຽດນາມ ເທົ່ານັ້ນ ຫາກນັບທັງບັນດາປະເທດສະມາຊິກ ອີກດ້ວຍ. ກ່ອນອື່ນ, ນັ້ນແມ່ນຕະຫລາດໃຫຍ່, ບັນດາປະເທດສະມາຊິກຈະຊ່ວຍເຫລືອກັນໃນການແລກປ່ຽນຄ້າຂາຍສິນຄ້າ ພ້ອມກັນພັດທະນາ. ທີສອງ ແຫລ່ງຄົນງານ, ແຫລ່ງທຶນໃນພາກພື້ນແມ່ນອຸດົມສົມບູນ ຈະຊ່ວຍໃຫ້ຫວຽດນາມ ມີກາລະໂອກາດແກ້ງແຍ້ງທ່າໄດ້ປຽບຂອງບັນດາພື້ນຖານເສດຖະກິດອື່ນ, ຮັບໃຊ້ການພັດທະນາຂອງຕົນ. “
ປະຊາຄົມ ອາຊຽນ ໄດ້ຮັບການສ້າງຕັ້ງຂຶ້ນກົງກັບໂອກາດ 20 ປີທີ່ ຫວຽດນາມ ເຂົ້າເປັນສະມາຊິກ ອາຊຽນ. ດ້ວຍຄວາມຮັບຮູ້ອັນຖືກຕ້ອງກ່ຽວກັບການຮ່ວມມືອາຊຽນ ແມ່ນຜົນປະໂຫຍດແທ້ຈິງທີ່ມີຕໍ່ການພັດທະນາຂອງປະເທດຊາດ, ຫວຽດນາມ ຢືດໝັ້ນເຈດຈຳນົງ ແລະ ຄວາມຕັດສິນໃຈ, ສະຫນິດຕິດພັນກັບກຸ່ມ ອາຊຽນ ກວ່າ ພ້ອມທັງສືບຕໍ່ມີການກະທຳລະອຽດ, ປະກອບສ່ວນຢ່າງແທດຈິງໃຫ້ ອາຊຽນກວ່າ.